एसईई दिएर बसेकालाई जेभियरको सेमिनार

काठमाडौंको कमलादीस्थित नेपाल प्रज्ञा प्रतिष्ठानमा शुक्रबार सेमिनारको आयोजना गर्दै कलेजले एसईई दिएर बसेका विद्यार्थीलाई अब के पढ्ने र कसरी विषय छान्ने भन्नेलगायतका शीर्षकमा सुझाव र सल्लाह दिएको थियो । सेमिनारमा एसईईको रिजल्ट पर्खेर बसेका करिब १५ सय विद्यार्थीहरु सहभागी थिए ।

कलेजका प्रधानाध्यापक दिपेन दाहालले एसईई दिएर बसेका विद्यार्थीहरुलाई बधाई दिँदै एसईईपछि विद्यार्थीहरु के पढ्ने ? भन्ने विषयमा अनभिज्ञ हुने भएकाले विद्यार्थीहरुले आफ्नो करिअरका लागि राम्रो कलेज र विषय छान्न सुझाए । उनले भने, 'सबैलाई एसईई पछि के पढ्ने, कस्तो विषय रोज्ने र कुन विद्यालयमा पढ्ने भन्ने चिन्ता हुन्छ । यसको लागि आफ्नो रोजाई के हो र रुची कुन विषयमा हो त्यसमा स्पष्ट हुनुपर्छ । अनि बल्ल कलेज छान्नु पर्छ ।'

सेमिनारमा मध्यपश्चिम विश्वविद्यालयका उपकुलपति प्राध्यापक डा. नन्दबहादुर सिंहले उपस्थित विद्यार्थीहरुलाई भविष्य निर्माणका लागि स्तरीय शिक्षा दिने विद्यालय रोज्न पर्ने बताए । जीवनको बाटो कता लैजाने भन्ने तय गर्ने खुड्किलो एसईईपछिको अध्ययन भएकोले सोचेर र विचार गरेर मात्रै विषय एवं कलेज छान्न उनले विद्यार्थीलाई आग्रह गरे ।