शिक्षासेवी कृष्णलाल झाको स्मृतिमा शिक्षा पुरस्कार स्थापना
काठमाडौँ — सिरहाको बस्तीपुर माध्यमिक विद्यालयका संस्थापकमध्येका एक शिक्षक कृष्णलाल झाको स्मृतिमा शिक्षा पुरस्कार स्थापना भएको छ । साहित्यकार तथा संस्कृतिविद् प्राज्ञ धीरेन्द्र प्रेमर्षि र साहित्यकार-सञ्चारकर्मी रूपा झाले पिता कृष्णलाल झाको स्मृतिमा पुरस्कार स्थापना गरेका हुन् ।
सामुदायिक विद्यालयको शैक्षिक उन्नयनमा योगदान गर्नेहरुलाई यो पुरस्कार वर्षेनी प्रदान गरिने छ ।
जेठा छोरा अक्षेन्द्र झाको जन्मदिनको अवसरमा अक्षयकोष राखिएको हो । अक्षय कोषबाट वर्षेनी ५१ हजार रुपैयाँ रासीको 'पं. कृष्णलाल झा स्मृति शिक्षा पुरस्कार' प्रदान गरिने छ ।
२००४ सालमा स्थापना भएको सिरहाको बस्तीपुर माध्यमिक विद्यालयका संस्थापक शिक्षकमध्येका एक कृष्णलाल झाले उक्त विद्यालयमा अविच्छिन्न रूपले सबैभन्दा लामो समयसम्म शिक्षण गरेका थिए । त्यसैले पुरस्कार झाको स्मृति दिवसका दिन उक्त विद्यालय परिसरमै पुरस्कार प्रदान गरिने छ । बस्तीपुर माविबाट एसईई परीक्षामा सर्वोत्कृष्ट नतिजा प्राप्त गर्ने एकजना छात्र / छात्रालाई ११ हजार रुपैयाँको 'कृष्णानन्दी प्रोत्साहन पुरस्कार' वा सोही विद्यालयमा कक्षा ११-१२ अध्ययन गर्न चाहने विद्यार्थीलाई छात्रवृत्ति प्रदान गरिने पनि प्राज्ञ प्रेमर्षिले जनाएका छन् ।
।
प्रकाशित : वैशाख १२, २०८० १४:१८
