वायु प्रदूषण रोक्नेबारे जनचेतना फैलाउन ‘साथी’ अभियान
काठमाडौँ — वायु प्रदूषण नियन्त्रणबारे जनचेतना फैलाउने उद्देश्यले सेभ द चिल्ड्रेनले ‘साथी’ अभियान सुरु गरेको छ । साथी अर्थात भालु आकारको सेतो टेडी बियर लिएर अभियन्ताहरु ६ महिनासम्म देशभर वायु प्रदूषणबारे जनचेतना फैलाउने कार्यक्रममा सक्रिय रुपमा सहभागी हुनेछन् ।
नेपालको राजधानी काठमाडौं विश्वकै प्रदूषित शहरहरूको सूचीमा रहँदा सेभ द चिल्ड्रेनले पृथ्वी दिवसको अवसर पारेर देशव्यापी अभियान संचालन गर्न लागेको हो ।
सेभ द चिल्ड्रेनलाई अन्य संघसंस्था र बालबलिका तथा युवा अभियन्ताको साथ रहनेछ । साथी अवधारणाले नेपालभरका मानिसलाई वायु प्रदूषणबारे जानकारी दिन सहयोग पुग्नेछ ।
सेभ द चिल्ड्रेनकी राष्ट्रिय निर्देशक हेदर क्याम्पबेलका अनुसार साथी एयर बियर वायु प्रदूषणका कारण बालबालिकाको स्वास्थ्य र भविष्यमा पर्ने प्रभावको प्रतिक हो । यसले बढ्दै गरेको प्रदूषण र जलवायु परिवर्तनले कसरी बालबालिकाको भविष्यमाथि खेलवाड गरिरहेको छ र किन यसबारे सचेत हुनुपर्छ भन्नेबारे सचेत गराउने गर्छ ।
यस अभियान मार्फत् विभिन्न सरोकारवालाहरुसँग वातावरण संरक्षण सम्बन्धी कुराकानी गर्नुका साथै वातावरण संरक्षणको क्षेत्रमा कार्य गर्ने र उनीहरूलाई वायु प्रदूषणका साथै जलवायु परिवर्तन सम्बन्धी काम गर्न आह्वान गरिने पनि बताइएको छ ।
६ महिने अभियानका क्रममा वायु प्रदूषणको प्रभावबारे बालबालिका र युवालाई धेरैभन्दा धेरै जानकारी दिने प्रयास गरिने पनि बताइएको छ । जहाँ नीति निर्माता र सरोकारवालाहरुसँग वायु प्रदूषणसँगै जलवायु परिवर्तनबारे पनि छलफल गरी निष्कर्ष निकाल्ने प्रयत्न गरिने आयोजक संस्थाले जनाएको छ ।
प्रकाशित : वैशाख १०, २०८० २१:०९
