काठमाडौँ — काठमाडौं कालोपुलस्थित जेभियर इन्टरनेसनल कलेजले बिहीबारदेखि  विज्ञान, सूचना प्रविधि र व्यापार प्रदर्शनी  आयोजना गरेको हो । प्रदर्शनीमा २० वटा स्टल छन् । ती स्टलहरुमा अचारसँग सम्बन्धित, सिँचाइ, खाना र पर्यटनसँग सम्बन्धित विभिन्न स्टल रहेको कलेजले जनाएको छ । 

प्रदर्शनीको बिहीबार मध्यपश्चिम विश्वविद्यालयका उपकुलपति प्राध्यापक डा. नन्दबहादुर सिंहले उद्घाटन गरे ।

दिगो विकास लक्ष्य प्राप्तिका लागि जरुरत आविष्कारका विषय देखाउनका लागि प्रदर्शनीको आयोजना गरिएको विद्यार्थी समर रञ्जितले बताए । त्यस्तै दिगो विकास लक्ष्यका उद्देश्यहरु पूरा गर्न विज्ञान, सूचना प्रविधि र व्यापारले कसरी सहयोग गर्छ भन्ने विषय पनि प्रदर्शनीमा देखाइने उनले जानकारी दिए ।

उनले भने ‘दिगो विकासलाई कसरी कार्यान्वयन गर्न सकिन्छ, दिगो विकास लक्ष्यको उद्देश्यहरु कसरी प्राप्त गर्न सक्छौँ र त्यो प्राप्त गर्न हामीले के–के आविष्कार गर्नुपर्ला ? त्यसका लागि व्यापारले कसरी सहयोग गर्छ ? विज्ञानले कसरी सहयोग गर्छ ? र सूचना प्रविधिले कसरी सहयोग गर्छ ? ती विषय देखाउनको लागि यो कार्यक्रम आयोजना गरिएको हो ।’ प्रदर्शनी शुक्रबारसम्म चल्नेछ ।