चाम्लिङ भाषाको पहिलो बालगीत- कला - कान्तिपुर समाचार

चाम्लिङ भाषाको पहिलो बालगीत

कान्तिपुर संवाददाता

काठमाडौँ — चाम्लिङ राई भाषाको पहिलो बालगीत ‘फोप्ती’ (कोपिला) सार्वजनिक भएको छ । तिलक चाम्लिङको रचना, दीपेश राईको संगीत रहेको गीतलाई बालगायिका निहारिका राईले गाएकी छन् । 

‘हैकामा तेप्तुइपा इरुङ छेम्माछेम्पा मिनुई

आटुङ्मामो ङालुङ ढायेपा सायेरेम्सा ख्रुप्सुई ..’

(माटो टेक्दा पिता पुर्खालाई सम्झिन्छु

मेरो आफ्नो थलोको शिर ढल्दा शिर उभ्याउानी गर्दै उठ्छु)

किरात मुन्दुमको सारलाई खिचेर रचना गरिएको गीतले बालबालिकालाई मातृभाषाप्रति आकर्षण र पुस्तान्तरमा टेवा पुर्‍याउने अपेक्षा राखिएको छ । ‘माटो टेक्दा पुर्खाहरूलाई सम्झन्छु । जन्मथलोको शिर ढल्दा शिरउभ्याउनी गर्छु । भाषा सिक्छु । संस्कृति सिक्छु । पहिचान जोगाउँछु । ठूलो मान्छे भएर कुलको इज्जत राख्छु’ गीतको भाव रहेको छ ।

कथामा बालसखाको फोटो भेटिन्छ । उनीहरुको लामो समयसम्म भेट भएको हुँदैन । उनीहरुलाई आआफ्नो दु:खले कहाँ-कहाँ पुर्‍याएको हुन्छ । धेरै समयपछि उनीहरू पहिचानको अभियानमा भेटिन्छन् । दुवैजना जागिर, व्यवसाय छोडेर भाषा, संस्कृतिको अभियानमा लागेका हुन्छन् । यो भेटमा उनीहरू खुसी मनाउँदा मनाउँदै कथा मैझारो हुन्छ ।

उक्त ‘फोप्ती’ गीतको म्युजिक भिडियोसमेत निर्माण गरिएको छ । काजोल राईको निर्देशन रहेको भिडियोमा कलाकारहरू नियामा राई, साङ्केन राई, अनुका राई, किवाहाङ राई, इशक राई, नायुमा राई, डी.पी. राईलगायतको अभियन छ ।

किरात राई यायोक्खा काठमाडौंकी अध्यक्ष प्रमिला राईका अनुसार भिडियोभित्र गीतमात्र नभई सामाजिक यथार्थ कथा छ । ‘यो बालगीतको म्युजिक भिडियोले नयाँ पुस्तालाई आफ्नो भाषा संस्कृतिप्रति प्रेम जगाउने छ,’ उनले भनिन् ।

प्रकाशित : आश्विन १, २०७८ १८:१३
प्रतिक्रिया
पठाउनुहोस्

विकास र समृद्धिका लागि एमसीसी आवश्यक : कानुनमन्त्री

कान्तिपुर संवाददाता

काठमाडौँ — कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले मुलुकको विकास र समृद्धिका लागि एमसीसी आवश्यक रहेको बताएका छन्

शुक्रबार कोसी टप्पुमा प्रकृति संरक्षण कोष मातहतको कोसी टप्पु संरक्षण केन्द्रको कार्यालय उद्घाटन गर्न सुनसरी पुगेका मन्त्री कार्कीले एमसीसी मुलुकको विकास र समृद्धिका लागि आवश्यक रहेको बताएका हुन् । उनले दलीय खिचातानीले एमसीसी ओझेल पर्ने सम्भावना बढाएको भन्दै जसरी भए पनि संसद्‌बाट पास गराउनुपर्ने बताए । उनले एमसीसी विकास परियोजना भएकाले यसको विषयमा राजनीति गर्नु नहुने उल्लेख गरे । एमसीसी संसद्‌बाट पास गराउनको लागि सबैबीच सहमतिको खाँचो रहेको उनले औंल्याए ।

मन्त्री कार्कीले असोज ४ गते बस्ने संसद् बैठकले बजेटको विषय अघि बढाउने बताए । संसद् भित्रको गतिरोध हटाउने विषयमा प्रमुख प्रतिपक्षी दलका नेता केपी शर्मा ओलीसँग छलफल जारी रहेको भन्दै उनले केही दिनभित्रै राजनीतिक निकास निस्कने विश्वास व्यक्त गरे ।

कोसी टप्पु वन्यजन्तु आरक्षमा शुक्रबारबाट स्थापना भएको कार्यालयले मानव–वन्यजन्तु द्वन्द्व व्यवस्थापनका साथै संरक्षण तथा सम्भाव्यता अध्ययनका विषयमा काम गर्ने बताइएको छ ।

प्रकाशित : आश्विन १, २०७८ १८:०७
पूरा पढ्नुहोस्
प्रतिक्रिया
पठाउनुहोस्
×