मजदुर आन्दोलनले फ्रान्सको जनजीवन अस्तव्यस्त

ददि सापकोटा

फ्रान्स — फ्रान्स सरकारले घोषणा गरेको वृद्ध भत्ता कटौती र निवृत्तिभरणमा असन्तुलित वितरणका विरुद्ध युनियनहरुले आव्हान गरेको आमहडतालका कारण आज फ्रान्सको जनजीवन अस्तव्यस्त बनेको छ । आमहडतालका कारण रेल, मेट्रो, फेरी, फ्रान्सबाट अन्य मुलुक जोड्ने लामा दूरीका रेल सेवासमेत प्रभावित बनेका छन् ।

ZenTravel

फ्रान्स ओर्लिने र अन्य देश जाने सयौं उडानहरु रद्द गरिँदा पर्यटकहरु सबैभन्दा बढी मारमा परेका छन्। यो आन्दोलनमा शिक्षक, हुलाक सेवाका कर्मचारी, रेलवे, प्रहरी, स्वास्थ्य, विद्युत प्राधीकरणलगायत अधिकांश मजदुर युनियनहरुको सहभागिता छ।

प्रदर्शनकारीहरुले बिहीबार बिहानै रुवाँ सहरमा ग्रिनेड हानेर सडक अवरुद्ध पारेका छन्। उत्तरी फ्रान्सको बुलोन्य भन्ने ठाउँमा प्रदर्शनकारीहरुले सडक अवरुद्ध पारेर सवारी साधनहरु गुड्न दिएका छैनन्। ओर्लेअँ सहरनजिक इन्धन बोकिरहेका ट्यांकीहरुलाई रोकेर जिलेजोनहरुले इन्धन ओसारपसारा अवरुद्ध पारेका छन्। बिहीबार बिहानै करिब दुईसय पेट्रोल पम्पहरुमा तेल रित्तिएको र चार सय पेट्रोल पम्पमा स्टक बाँकी नरहेको इन्धन आपूर्तीकर्ताहरुको भनाइ छ। सुरक्षाकै कारण देखाउँदै फ्रान्सकै मूख्य पर्यटकीय आकर्षण आइफल टावरसमेत बन्द गरिएको छ।

यही मौका पारेर जिलेजोन र ब्ल्याक ब्लक भनिने समूहको समेत सहभागिता देखिएपछि सरकारले सुरक्षा व्यवस्थालाई अझ कडा पारेको छ। सम्भावित आक्रमणलाई ध्यानमा राखेर विभिन्न ठाउँमा सेना परिचालनसमेत गरिएको छ। पेरिस शहरमा मात्रै छ हजार सुरक्षाकर्मी थप गरिएको छ। सुरक्षामा खटिएका प्रहरीहरुलाई आवश्यक परे अस्रु ग्याँस हान्न सक्ने अधिकार दिइएको छ।

पहेंला कोटधारी (जिले जोन) हरुको समूहको राजनितिक पार्टी नभएपनि फ्रान्समा गत एक वर्षदेखि सरकारविरुद्ध आन्दोलन गर्दै आएका छन्। यहि समूहसँगै ब्ल्याक ब्लक भनिने युरोपभरी नै सक्रिय साम्राज्यवाद विरोधी उग्र समूहको समेत संलग्नता देखिएपछि सरकार बढी सशंकित बनेको छ। यिनीहरुको उद्देश्य शान्तिपूर्ण आन्दोलनमा घुसेर विस्फोट गर्ने, सुरक्षाकरीमाथि आक्रमण गर्ने र तिनलाई आक्रोशित पारेर आन्दोलन चर्काउने हो। कालो ड्रेस र कालै मुकुन्डोमा उपस्थित यो ब्ल्याक बक समूहले प्रदर्शनीकारीको पहिलो लहरमा बसेर सुरक्षा निकायको प्रतिवाद गर्ने बताइसकेका छन्।

आमहडताल आव्हान गरेका मजदुरहरुले आज बिहानै तीन बजेदेखि राजधानी पेरिस, बोर्दो, मासेइ, लिल, निस, तुलुज लगायतका मुख्य सहरहरुमा सरकारविरुद्ध प्रदर्शनी गरेका छन्। मेट्रो, रेल, बस र अन्य यातायात सुविधामा आज ९० प्रतिशतसम्म कटौती गर्दा सबैभन्दा ठूलो सास्ति पर्यटकहरुले व्यहोर्नु परेको छ।

फाट्टफुट्ट रुपमा यातायात चलेपनि तिनले सर्वसाधारण र पर्यटकको खाँचो धान्न सकेको छैनन्। जिलेजोन र ब्ल्याक बक समूहसमेत सहभागी हुने भन्ने खबरले गर्दा सर्वसाधारणहरुको आवतजावत कम भएको छ।

प्रदर्शनकारीहरुले सरकारले अगाडि सारेको वृद्धभत्ता र निवृतभरण कटौतीको प्रस्ताव फिर्ता नलिएसम्म आन्दोलन जारी राखिने बताएका छन्। उता सरकारपनि यो प्रस्तावबाट पछि नहट्ने देखिन्छ। फ्रान्सको यातायात मन्त्री एलिजाबेथ बर्नले आज बिहानै सरकार यो प्रस्तावबाट पछि नहट्ने बताएकी छन्। सरकारको यो भनाइले अन्दोलनकारीहरु झन क्रुद्द बनेका छन्। मन्त्रीको यो भनाइपछि प्रदर्शनकारीहरुले आन्दोलन नयाँ वर्षसम्म लम्ब्याउने चेतावनी दिएका छन्। प्रतिपक्षी दलका नेताहरुले पनि आन्दोलनकारीहरुलाई समर्थन गर्दै सरकारले सरकारले आफ्नो प्रस्ताव फिर्ता लिनुपर्ने माग गरेका छन्। पाख्यी द गोस पार्टीका नेता तथा सांसद जँ लुक मेलसोँले सरकारको विरोध र प्रदर्शनकारीको समर्थन गर्दै आन्दोलन जारी राख्नुपर्ने बताएका छन्।


प्रकाशित : मंसिर १९, २०७६ १९:५७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

योगेशको गुनासो- नगरकोटको सडक देखाएर भ्रमण वर्षलाई गाली गरे

'विमानस्थलकी कर्मचारीबारे हजारौं मेन्सन आए, सरुवा गरिदिएँ'
सुरज कुँवर

काठमाडौँ — नेपाल भम्रण वर्ष २०२० को औपचारिक थालनीको दिनगन्ती सुरु भइरहेका बेला यस अभियान मूल आयोजक समितिका संयोजक संस्कृति, पर्यटन तथा नागरिक उड्डयनमन्त्री योगेश भट्टराईले बिहीबार दिउँसो एउटा सम्मेलन गरे ।

सबै राजनीतिक दल, तीनका भातृ तथा जनवर्गीय संगठनका नेतालाई सिंहदरबारमा बोलाएर उनले रचनात्मक सुझाव मागेका थिए । तर, अधिकांशले अझै केही नभएको, भत्के बिग्रेकै अवस्था रहेका पूर्वाधार अभावबारे बताए ।

काठमाडौं धुलोमुक्त नभएको, फोहोर थुप्रिएको, सडकको अवस्था दयनीय नै रहेको, पर्यटकहरुका लागि सुरक्षा व्यवस्था कमजोर भएको, विमानस्थलमा जहाज अवतरणमा कठिनाइ भइरहेको, पर्यटकले एक बोतल पानीकै ४/५ सय रुपैयाँ तिर्नुपरेको जस्ता गुनासा उनीहरूले सुनाए । सबै गुनासा सुनेपछि अन्तरक्रियाको संयोजन पनि गरिरहेका मन्त्री भट्टराई बोल्न थाले ।

‘हामी सधैँ समस्याका गीत गाइरहेका छौँ तर यो समाधान होइन,' उनले भने। समाजमा टुप्पलुक्क कुनै नयाँ अवतार आएर समस्याको समाधान नहुने बताउँदै आफूलाई सामाजिक सञ्जालमा खेद्नेहरुका कथा भन्न थाले। जब उनले सामाजिक सञ्जालमा आफूलाई सम्बोधनमै‘तँ’ आउने मेन्सनबारे सुनाउन थाले, मन्त्रालयको चौथो तलामा रहेको सभाहलमा सबैको ध्यानार्कषण भयो। हाँसो गुन्जियो। उनी पनि रौसिदै कथा सुनाउन थाले। ‘मेरो ट्विटरमा नगरकोटको बाटोका सडकको फोटो खिचेर मेन्सन आउँछ, नगरकोटको बाटो यस्तो छ ! तेरो भम्रण वर्ष !’ सबै गलल हाँसे।

त्यसपछि उनले अमेरिकाबाट लामो हवाइ यात्रा गरेर नेपाल आइपुगेको तर आफ्नो लगेज नपाएको यात्रुको मेन्सन सुनाए। ‘लामो यात्रा गरेर काठमाडौं आएपछि लगेज नपाउने यात्रुले एयरपोर्टको फोटो खिचेर मलाई यी तेरो एयरपोर्ट ! भनेर पठाउँछ।’

उनले यस्तै यस्तै खाले सयौं म्यासेज र मेन्सन आउने गरेको बताउँदै विमानस्थलमा ड्युटीमा रहेकी एक महिला कर्मचारीले फोनमा कुरा गरिरहेको भिडियो करिब एक हजारले आफूलाई ट्याग गरेको पनि बताउन भ्याए।

‘एयरपोर्ट ड्युटीमा फेसबुक चलाउन पाइदैन। फोन उठाउन पाइदैन। तर एक महिला कर्मचारीले फोन चलाइ रहेको भिडियो करिब एक हजारले मलाई ट्याग गरे।’ उनले यस घटनाको सामाजिक सञ्जालबाट थुप्रै विरोध भएपछि ती महिला कर्मचारीलाई अन्यत्रै सरुवा गरिसकेको पनि जानकारी गराए।

उनले सारमा यस्ता प्रतिनिधि घटनाको बढी प्रचार गरेर मुलुकबारे नकारात्मक प्रचार भइरहेको बताउँदै चिन्ता व्यक्त गरे। बुधबार मात्रै यसै सभाकक्षमा तीन दर्जन बढी मुलुकका राजदूत तथा प्रतिनिधिसँग भम्रण वर्षकै बारेमा अन्तरक्रिया भएको सुनाउँदै उनले भने, ‘टाढाका विदेशी राजदूतले मुक्तकण्ठले प्रशंसा गर्ने ? नजिक बसेकाले विरोध गर्ने यो राम्रो हुँदैन । ’

उनले पर्यटकको पूर्ण सुरक्षा भएको बताउँदै काठमाडौंको भृकुटीमण्डपमा चौबिसै घन्टा पर्यटक प्रहरी अलर्ट रहेको बताए । ‘कतै पर्यटकको पर्स चोरी हुन्छ । तर कतिपयले पर्यटकको पर्स भेटेर सम्बन्धितलाई बुझाएका पनि छन्। तर त्यतातिर मान्छेको ध्यान जाँदैन । एउटा पर्स चोरी भएको घटनाले बढीप्रचार गरिन्छ।’

उनले केही समय पहिले बीबीसीले प्रधानमन्त्री केपी शर्मा ओलीलाई सगरमाथा जाम बारे सोधेको प्रश्नको पनि खण्डन गरे। ‘सगरमाथा एकदम जाम भयो भनेर बीबीसीले हाम्रा प्रधानमन्त्रीलाई सोधेको त्यो प्रश्न बेकारको थियो।’ उनले यसपटक दुईदिन मात्रै आरोहण खुलेकाले चुचुरोमा आरोहीको लाइन लागेको बताए । उनले यसलाई कन्ट्रोर्भसीको उदाहरण बताउँदै राजनीतिक दल र भातृ संगठनलाई ट्विटर,फेसबुक मार्फत् भ्रमण वर्ष बारे केही न केही प्रचार पोष्ट गरिरहन भने ।

प्रकाशित : मंसिर १९, २०७६ १९:५३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×