सडक बढार्दै मेची-महाकाली

सिमसिमे पानीमा बिहीबार बिहान सेतो एप्रोन लगाएर उनीहरूले सदरमुकाम बेंसीसहर सडक बढारे । बजारबासीले हेरिरहे । ‘हामी बन्दीपुर, दमौली र पोखराका सडक सफा गरेर बेंसीसहर आएका हौं,’ महर्जनले भनिन्, ‘यो मेची–महाकाली सरसफाइ अभियान हो ।’ उनका अनुसार ६ समूहमा सय स्वयंसेवक छन् । लमजुङ आएको ३ नम्बर ग्रुप हो । पुस १३ गतेदेखि सुरु मेची–महाकाली सरसफाइ यात्राका क्रममा ६३ नगरपालिकाका सडकका धुलो बढारेको उनले बताइन् ।

‘जहाँ फोहोर बढेको छ, हामी त्यहीँका सडक सफा गर्दै छौं,’ उनले भनिन् । २०७४ देखि बाहिरी देशमा गएर सडक सरसफाइ गरेको उनले सुनाइन् । ‘हामी बंगलादेश गएर २ महिना सफा गर्‍यौं । श्रीलंकामा पनि सरसफाइ गरेर फर्कियौं,’ उनले भनिन्, ‘पछिल्लो समय २५ दिन भारतको दिल्लीमा सफा गर्‍यौं ।’

सरसफाइमा सहभागी राजमान मानवले बेंसीसहरको सेराचोकदेखि नारायणस्थान चोक र भीमसेनस्थान चोक हुँदै मनाङे चौतारासम्मका मूल सडक बढारेर फोहोर व्यवस्थापन गरे । नेवाः लहनाका म्यानेजर मोनिस महर्जनले सरसफाइप्रति सर्वसाधारणलाई जागरुक गराउन अभियान थालिएको बताए ।