राजस्थानमा मरे हजारौं चरा

एजेन्सी

राजस्थान — भारतको राजस्थानस्थित सम्भर तालमा मंगलबार हजारौं चरा मृत भेटिएका छन् । मृत भेटिएका चरा दस प्रजातिका रहेका अधिकारीहरुले जनाएका छन् ।

मृत भेटिएका चराको संख्या कम्तीमा ५ हजार रहेको स्थानीयले दाबी गरेका छन् । तर भारतीय अधिकारीले मृत चराको संख्या १ हजार ५ सय मात्र रहेको बताएका छन् ।


ठूलो संख्यामा मृत चरा भेटिएपछि स्थानीय तथा अधिकारीहरू आश्चर्यमा परेका भारतीय सञ्चारमाध्यमले जनाएका छन् । ‘हामीले कहिल्यै यस्तो देखेका थिएनौं । ५ हजारभन्दा चराहरू एकै ठाउँमा रहस्यमय रूपमा मरेका छन्,’ चरा जानकार स्थानीय अभिनभ वैष्णभले भने ।


पानीमा भएको खराबीका कारण चरा मरेका हुन सक्ने अनुमान अधिकारीहरुको छ । यद्यपि त्यसबारे परीक्षण तथा अध्ययन भइरहेको जनाइएको छ । विज्ञहरुका अनुसार ती चराहरु विभिन्न स्थानबाट बसाइँसराइका क्रममा राजस्थान पुगेका थिए ।


फरेस्ट रेन्जर राजेन्द्र जखरले केही समयअघि परेको बाक्लो असिनाका कारण चरा मरेका हुन सक्ने बताए । ‘हाम्रो अनुमानमा १ हजार ५ सय चरा मरेका छन् । पानीमा विषादी, जीवाणु तथा अन्य खराबी मिसिएको हुन सक्ने भएकाले यकिन गर्न हामीले परीक्षणका लागि नमुना पठाएका छौं,’ जखरले भने । तर अर्का एक अधिकारीले भने, बर्डफ्लुका कारण पनि चराको मरेका हुन सक्ने अनुमान गरेका छन् ।


सम्भर नुनिलो पानी पाइने भारतको सबैभन्दा ठूलो ताल हो । बसाइँसराइका क्रममा क्षेत्रमा बर्सेनि २ देखि ३ लाख चरा उक्त क्षेत्रबाट आवतजावत गर्छन् ।

प्रकाशित : कार्तिक २६, २०७६ २१:३०
प्रतिक्रिया
पठाउनुहोस्

विराट कुस्ती प्रतियोगिताको उपाधि भारतका बब्बीलाई

नारायण शर्मा

(नवलपरासी) — नवलपरासीमा भारतीय कुस्तीबाजहरुको भिडन्त भएको छ । त्रिवेणी सुस्ताको ठाडिघाटमा कात्तिक पूर्णिमाको अवसरमा मंगलबार भएको विराट कुस्ती प्रतियोगिताको उपाधि भारत हरियाणका बब्बी यादवले जितेका छन् ।

ठाडिघाटस्थित नारायणी नदीको किनारमा भएको भव्य (विराट दंगल )कुस्ति प्रतियोगितामा बब्बीले भारत बनारसका शम्सेर सिंहलाई पछारेर विजयी भएका हुन् । शम्सेरलाई बब्बीले ७ मिनेटको समयमा २ पटक पछारेर विजयी भएका हुन् ।

तृतीय पुरस्कार २ जनाले पाएका छन् । भारत गोरखपुरका पवनहाटा पहलमान र महाराजगन्ज जिल्लाका गोल्डेन पहलमान तृतिय भए । प्रथम र द्धितियलाई क्रमशः २५ हजार नगद , टेलिभिजन र १५ हजार नगद र टेलिभिजन सेट प्रदान गरिएको छ । तृतीय स्थान हुने दुवैले नगद १० हजार र साइकल पाएका छन् ।

हरेक वर्षको कात्तिक पूर्णिमामा दिन त्रिवेणी सुस्ता गाउँपालिका-५ नारायणी नदीको किनारमा आयोजना गरिने कुस्ती प्रतियोगितामा भारतीय कुस्तिबाजहरुको भिडन्त हेर्न नेपाल भारतका हजारौ दर्शक भेला हुने गर्छन् । यस पटकको कुस्तीमा भारतका २८ पहलमानहरुले भाग लिएका थिए ।
ठाडिघाट मेला व्यवस्थापन समितिले कुस्ति आयोजना गरेको हो । भिडन्तमा उत्रेका कुस्तिवाजलाई दर्शकहरुले आफूखुशी थप नगद दिने चलन रहेको स्थानीय अंगद यादव बताउँछन् । आयोजकले अर्को वर्ष कात्तिक पूर्णिमा आयोजना गरिने कुस्ती प्रतियोगितामा प्रथम हुनेलाई १ लाख नगद दिने घोषणा गरेको छ ।

यहाँ आयोजना हुने हरेका वर्षको कुस्ती महिलाहरुले हेर्दैनन् । १० हजार दर्शक भेला हुने गरेपनि महिलाको उपस्थिती शून्य रहन्छ । कुस्ति बजरंग बली हनुमानको खेल भएको र त्यस्तो लडाइ महिलाहरुले हेर्न नहुने स्थानीयको भनाइ छ । निःशुल्क हेर्न पाइने भएपनि कोहि महिला कुस्ती हेर्न नआउने सुस्ताका रोज मियाँको भनाइ छ ।

प्रकाशित : कार्तिक २६, २०७६ २१:१०
पूरा पढ्नुहोस्
प्रतिक्रिया
पठाउनुहोस्
×