लरीमा मृत भेटिएका सबै भियतनामी

(एजेन्सी)

लन्डन — बेलायतको एसेक्समा गतसाता एक लरीभित्र मृत भेटिएका सबै ३९ जना व्यक्ति भियतनामी भएको प्रहरीले बताएको छ । 

वाटरग्लेड औद्योगिक क्षेत्रको पूर्वी सडकमा रहेको लरीमा गतसाता ३९ जनाका शव भेटिएका थिए । मृतकमध्ये ३१ पुरुष र आठ महिला छन् । औद्योगिक क्षेत्रमा चिसो तापक्रम हुने व्यवस्था गरिएको लरीभित्र फेला परेका शव चिनियाँ नागरिकका भएको बताइएको थियो ।

एसेक्स प्रहरीले आफूहरू केही मृतकका भियतनाम र बेलायतस्थित परिवारका सदस्य तथा भियतनाम सरकारसँग निरन्तर सम्पर्कमा रहेको बताएको छ । केही भियतनामीले आफ्ना नजिकका व्यक्तिहरूको मृत्यु भएको हुन सक्ने बताएका प्रहरीको भनाइ छ ।

शव भेटिनुभन्दा केही समयअघि २६ वर्षीया एक महिलाले आफ्नो ‘विदेश यात्रा असफल’ भएको भन्दै परिवारका सदस्यलाई सन्देश पठाएकी थिइन् । मृत्युको कारण पत्ता लगाउन परीक्षण भइरहेको प्रहरी अधिकारीको भनाइ छ । टिम स्मिथले सबै मृतकहरू भियतनामी भएको लगभग यकिन भए पनि प्रहरी मृतकको सनाखत गर्ने अवस्थामा नरहेको बताए ।

लन्डनस्थित भियतनामी दूतावासले घटनाप्रति दु:ख व्यक्त गरेको छ । दूतावावासका अनुसार पीडितको परिचय खुल्न तथा दुई देशका सम्बन्धित निकायले पुष्टि गर्न अझै बाँकी छ । मृतकको शव भियतनाम पुर्‍याउन सम्बन्धित निकायहरूसँग समन्वय गर्ने तथा परिवारका सदस्यलाई सघाउने दूतावासको भनाइ छ । यसअघि एक भियतनामी पुरुषले आफ्ना ३० वर्षीय छोराको पनि मृत्यु भएको आफूलाई लागेको बताएका थिए । बेलायतस्थित भियतनामी समुदायका मानिसको एक संगठनले सम्पर्कविहीन २० जनाको तस्बिर प्रहरीलाई उपलब्ध गराइएको जनाइएको छ ।

लरीको कन्टेनरभित्र रेफ्रिजेरेटरको जस्तो चिसो हुने भएकाले तापक्रम २५ डिग्री सेल्सीयससम्म झर्न सक्छ । प्रारम्भिक विवरणहरूमा लरी बुल्गेरियाबाट आएको बताइए पनि सरकारले सन् २०१७ मा दर्ता
भएयता नफर्किएको जनाएको छ ।

शवहरू फेला परेपछि उत्तरी आयरलन्डका लरी चालक मोरिस रोबिन्सनलाई पक्राउ गरिएको थियो । उनलाई सोमबार अदालत पेस गरिएको थियो । उनीविरुद्ध ३९ जनाको हत्या गरेको अभियोग लगाइएको छ ।
सन् २००० को जुनमा बेलायतको डोभरमा एउटा लरीको पछाडि ५८ चिनियाँ आप्रवासीका शव भेटिएका थिए । लरी चालकलाई हत्या अभियोगमा जेल सजाय भएको थियो ।

संयुक्त राष्ट्रसंघले सन् २०१४ देखि बेलायत आउने क्रममा ज्यान गुमाएका आप्रवासीबारे अभिलेख राख्न सुरु गरेको हो । त्यसपछिका वर्षमा कन्टेनर वा लरीमा ५ जना आप्रवासीका शव भेटिएको थियो । सन् २०१४ मा युरोपमा आप्रवासी संकट सुरु हुनुअघिको तथ्यांक भने बेलायत सरकारसँग उपलब्ध छैन ।

प्रकाशित : कार्तिक १७, २०७६ ०९:४४
ADVERTISEMENT
प्रतिक्रिया
पठाउनुहोस्

अस्ट्रेलियाका मानसिक रोगीले गराउँदैनन् उपचार

(एजेन्सी)

क्यानबेरा — प्रत्येक वर्ष गम्भीर प्रकृतिको मानसिक स्वास्थ्य समस्या देखिएका करिब १० लाख अस्ट्रेलियालीले उपचारै नगराउने गरेको अनुसन्धानले देखाएको छ । यी मानसिक स्वास्थ्यका बिरामी उपचार नगराई बस्ने गरेको रहस्य पनि अनुसन्धानबाट पत्ता लागेको अधिकारीहरूले जनाएका छन् । 

‘प्रोडक्टिभिटी कमिसन’ को अनुसन्धानबाट मानसिक स्वास्थ्यसम्बन्धी समस्या देखिए पनि बर्सेनि ठूलो संख्याका अस्ट्रेलियालीले उपाचार नै नगराएको खुलेको हो ।

अनुसन्धान अधिकारीका अनुसार अस्ट्रेलियामा अहिले पनि करिब ४० लाख मानिस मानसिक स्वास्थ्य समस्याबाट पीडित छन् । उनीहरूमा कतिपयमा गम्भीर प्रकृतिको मानसिक रोग छ भने केहीमा डिप्रेसन, मानसिक त्रास, चिन्तालगायतका समस्याबाट पीडित रहेका छन् । यी बिरामीमध्ये करिब ३० लाख नागरिक स्वास्थ्य उपचारका लागि पहुँचमा रहने गरेका छन् । उनीहरूलाई उपचारको पहुँच हुने गरेको बताइएको छ ।

अस्ट्रेलियामा मानसिक स्वास्थ्यको उपचार खर्चमा पनि भारी मात्रामा वृद्धि भइरहेको छ । न्यून स्वास्थ्य बजेटका कारण पनि उपचारको पहुँचसम्म मानिस पुग्न नसकेको उक्त अनुसन्धानबाट पत्ता लागेको छ ।

अनुसन्धानका अनुसार हरेक दिन कम्तीमा पनि ३४ करोड ५० लाख अमेरिकी डलर बराबरको खर्च मानसिक स्वास्थ्य समस्याको उपचारमा लाग्ने गरेको छ । यो खर्च महँगो भएकोले यहाँको स्वास्थ्य उपचारसम्बन्धी नीतिमा परिमार्जन गर्नुपर्ने सुझाव पनि उक्त अनुसन्धान प्रतिवेदनले दिएको छ ।

प्रकाशित : कार्तिक १७, २०७६ ०९:४४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT