किन घोषणा गर्‍यो टर्कीले सिरियामा युद्धविराम ?

एजेन्सी

टेक्सास/बेरुत — सिरियाको उत्तरी क्षेत्रमा हवाई तथा स्थलगत कारवाही गर्दै आएको छिमेकी देश टर्कीले यद्धविराम घोषणा गरेको छ । टर्कीले गत अक्टोबर ९ देखि उत्तरी सिरियाका विभिन्न स्थानमा कुर्दिस लडाकु लक्षित आक्रमण गर्दै आएको थियो । आक्रमणका कारण करिब ५ सय जनाको ज्यान गएको अन्तर्राष्ट्रिय सञ्चारमाध्यमले जनाएका छन् । मारिनेमा प्राय:कुर्द समुदायका छन् । 

समाचार संस्था एएफपीले एक मानवअधिकारवादी संस्थालाई उद्धृत गर्दै कारबाहीका कारण ३ लाखभन्दा बढी मानिस विस्थापित भएको जनाएको छ । इस्लामिक स्टेट्सविरुद्धको लडाइँमा कुर्दहरूसँगै रहेका अमेरिकी सेना फर्काउने राष्ट्रपति ट्रम्पको घोषणालगत्तै टर्कीले त्यस क्षेत्रमा हवाई र स्थलगत आक्रमण सुरु गरेको थियो ।

सैन्य आक्रमणको विरोध गर्दै अमेरिकाले टर्कीका दुइटा मन्त्रालय तथा तीन वरिष्ठ अधिकारीलाई अमेरिका प्रवेशमा प्रतिबन्ध लगाएको छ । त्यसका साथै अमेरिकाले स्टिलमा लगाउँदै आएको कर बढाउने र व्यापार सम्झौतासम्बन्धी वार्तासमेत स्थगित गरेको जनाएको छ । अमेरिकी उपराष्ट्रपति माइक पेन्सका अनुसार राष्ट्रपति डोनाल्ड ट्रम्पले टर्कीका राष्ट्रपति रेसेप तैयप इर्दोगानलाई टेलिफोन गरी तत्काल युद्धविराम नगरे अझै कडा चेतावनीसमेत दिएका छन् ।
यसैबीच, अमेरिकी राष्ट्रपति डोनाल्ड ट्रम्पले बिहीबार उत्तरी सिरियामा भएको अस्थायी युद्धविरामको स्वागत गरेका छन् । आक्रमणमा अमेरिकी नागरिकको एक थोपा पनि रगत नबगेको भन्दै राष्ट्रपति ट्रम्पले ‘सिरियाबारे आफ्नो रणनीति सफल भएको’ दाबी गरेका छन् ।

ट्रम्पले तत्कालका लागि पाँचदिने युद्धविराम भएको जनाए । ‘अमेरिकाका लागि यो महान् दिन हो,’ टेक्सास राज्यमा आयोजित निर्वाचन र्‍यालीलाई सम्बोधन गर्दै ट्रम्पले संवाददाताहरूसँग भने, ‘यो टर्की र कुर्दहरूका लागि अनि मानव सभ्यताका लागि पनि महान् दिन हो ।’

अमेरिकासँगको सहमतिपछि टर्की ५ दिने युद्धविरामका लागि सहमत भएको हो । स्वतन्त्र मुलुकको माग गर्दै वर्षौंदेखि सशस्त्र आन्दोलन गरिरहेका कुर्द लडाकुले सिरिया-टर्की सीमा क्षेत्र छाड्नुपर्ने टर्कीको सर्तमा अमेरिकाले सहमति जनाएको एएफपीले जनाएको छ ।

टर्कीले सीमावर्ती सिरियाली भूभागमा भीषणसैन्य कारबाही थालेपछि वार्ता गर्न अमेरिकी उपराष्ट्रपति माइक पेन्स बिहीबार टर्की पुगेका थिए । उनले ‘सिरियामाथिको आक्रमण तत्काल रोक्न’ टर्कीका राष्ट्रपति रेसेप तैयप इर्दोगानलाई सहमत गराएका हुन् ।

सिरियाली कुर्द लडाकुहरूका विरुद्धमा जारी घातक आक्रमणलाई लिएर संयुक्त राष्ट्रसंघले पनि गम्भीर चासो व्यक्त गरेको छ । राष्ट्रसंघीय सुरक्षा परिषद् बैठकमा सिरियाको उत्तरी क्षेत्रमा जारी आक्रमणबाट भएको क्षतिबारे छलफल भएको थियो ।
बैठकमा सुरक्षा परिषद्का सदस्य राष्ट्रहरूबीच आक्रमण रोक्नुपर्ने विषयमा आवश्यक परामर्श र छलफल भएको र त्यस विषयमा सहमति पनि भएको बताइएको थियो ।

सिरियाली आईएसलाई परास्त गर्ने अमेरिकी अभियानमा कुर्द नेतृत्वको सिरियन डेमोक्रेटिक फोर्सेस (एसडीएफ) ले सघाउँदै आएको थियो । तर एसडीएफलाई टर्कीले आतंककारी समूह बताउँदै गतसातादेखि उनीहरू लक्षित आक्रमण गरेको हो । टर्कीले आफ्नो देशमा रहेका ३० लाखभन्दा बढी सिरियाली शरणार्थी सिरियामा पुनःस्थापित गराउने कारबाही चलाएको बताएको थियो ।

प्रकाशित : कार्तिक २, २०७६ १०:०९
ADVERTISEMENT
प्रतिक्रिया
पठाउनुहोस्
ADVERTISEMENT

अमेरिकाले युरोपेली सामानमा कर बढायो

एएफपी

वासिङ्टन — अमेरिकाले युरोपेली संघबाट आयात हुने ७ अर्ब ५० करोड अमेरिकी डलर बराबरका सामानमा करवृद्धि गरेको छ । 

अमेरिकी करवृद्धिको प्रत्यक्ष असर एयरबस, फ्रान्सेली मदिरा (वाइन) र स्कटल्यान्डको हिृवस्कीमा परेको छ । यी सामान अमेरिकामा सर्वाधिक निर्यात हुने वस्तुको सूचीमा छन् । युरोपेली संघका पदाधिकारी र अमेरिकी व्यापार प्रतिनिधिहरूबीच करवृद्धिका विषयमा घनीभूत छलफल भए पनि अन्त्यमा वार्ता विफल भएको थियो ।

चीनसँगको व्यापार वार्तामा खासै प्रगति नभएको अवस्थामा युरोपेली संघसँग पनि व्यापार गतिरोध बढेका कारण यसले विश्व अर्थव्यवस्थामा थप संकट निम्त्याउने विश्लेषकहरूको अनुमान छ ।

अमेरिकाको नयाँ घोषणाअनुसार विमान निर्माता कम्पनी एयरबसका नागरिक उड्डयनका विमान अमेरिका आयात गर्दा १० प्रतिशत करवृद्धि हुनेछ । एयरबसमा बेलायत, फ्रान्स, जर्मनी र स्पेनको लगानी छ ।

करवृद्धिको मारमा फ्रान्सेली वाइनजस्ता उच्च मूल्यका सामान पनि परेका छन् । अमेरिकी राष्ट्रपति डोनाल्ड ट्रम्पले युरोपेली संघबाट अमेरिका आयात हुने वस्तुमा करवृद्धि गर्ने धम्की दिँदै आएका थिए । फ्रान्स, स्पेन र जर्मनीबाट आयात हुने वाइनमा अब २५ प्रतिशत कर लाग्नेछ ।

अमेरिकी करवृद्धिको घोषणा हुनुअघि वार्ताका लागि अमेरिका पुगेका फ्रान्सेली अर्थमन्त्री ब्रुनो ली मायरले अमेरिकी कदमको प्रतिशोधमा युरोपले पनि अमेरिकी सामानमा करवृद्धि गर्ने सम्भावना रहेको बताए ।

उनले युरोप प्रतिशोध लिने अन्तिम तयारीमा छ भन्दै अमेरिकी निर्णय आर्थिक तथा राजनीतिक दुवै दृष्टिकोणबाट निकै प्रत्युत्पादक हुने चेतावनी दिएका छन् । ली मायरले शुक्रबार नै अमेरिकी व्यापार प्रतिनिधि रोबर्ट लाइट्जरसँग भेटेका जनाइएको छ । मन्त्री मायरले विश्व अर्थतन्त्र नै मन्दीतर्फ अग्रसर भइरहेको सन्दर्भमा सबैले मिलेर अर्थतन्त्रका समस्या सुल्झाउन पहल गर्नुपर्ने बताए । युरोप र अमेरिकाबीच विमान निर्माता कम्पनीहरू एयरबस र बोइङलाई उपलब्ध हुने अनुदानका विषयलाई लिएर मतान्तर जारी छ ।
युरोपेली संघका पदाधिकारीहरू गत जुलाईमा विमान निर्माता कम्पनीलाई दिइने अनुदानका विषयमा छलफल गरी निष्कर्ष निकाल्न सहमत भएका थिए । उनीहरूबीच विमान कम्पनीहरूलाई सरकारी अनुदान नदिने विषयमा सहमति भए पनि कार्यान्वयनमा आउन सकेन । अमेरिकी राष्ट्रपति डोनाल्ड ट्रम्पले गत बुधबार युरोपेली संघसँग देखिएका द्विपक्षीय व्यापार समस्या सुल्झाउन आफू सदैव तयार रहेको बताएका थिए ।

प्रकाशित : कार्तिक २, २०७६ १०:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×