क्याटालोनियाका ९ नेतालाई जेल सजाय

स्वतन्त्रतासम्बन्धी विवादास्पद जनमतसंग्रहमा राजद्रोह तथा सार्वजनिक सम्पत्ति हिनामिना गरेको स्पेनको सर्वोच्च अदालतको ठहर
(एजेन्सी)

बार्सिलोना — स्पेनको सर्वोच्च अदालतले क्टालोनियाका ९ जना नेतालाई ९ देखि १३ वर्षसम्मको जेल सजाय तोकेको छ । 

क्याटालोनियमा सन् २०१७ मा गरिएको स्वतन्त्रतासम्बन्धी जनमतसंग्रहमा उनीहरूले राजद्रोहको कार्य गरेको अदालतको ठहर छ । अन्य ३ जना स्वतन्त्रता पक्षधर कार्यकर्तालाई पनि अदालतले अवज्ञा गरेकोमा दोषी ठहर गरे पनि जरिवाना मात्र तिराउने फैसला गरेको छ ।

सबै १२ जनाले आफूमाथिका आरोप अस्वीकार गर्दै आएका छन् । नेताहरूलाई जेल सजाय तोकेसँगै अदालतले पूर्व क्याटालान नेता कार्लेस पुइग्डेमोन्टलाई नयाँ पक्राउ आदेश जारी गरेको छ । उनी हाल स्वेच्छिक निर्वासनका क्रममा बेल्जियममा छन् ।

पुइग्डेमोन्टलाई ‘राजद्रोह र सार्वजनिक सम्पत्ति हिनामिना गरेको’ ठहर भएपछि उनीमाथि नयाँ युरोपेली तथा अन्तर्राष्ट्रिय पक्राउ पुर्जी जारी गरिएको हो । उनी सन् २०१७ मा मुद्दा दायर गरिएपछि भागेर बेल्जियम पुगेका हुन् ।

सजाय सुनाइएकामध्ये केही क्याटालोनिया सरकार तथा संसद्का मुख्य पदमा छन् भने केही कार्यकर्ता तथा सांस्कृतिक अभियन्ता छन् । म्याड्रिडस्थित अदालतमा चार महिनासम्म चलेको सुनुवाइका क्रममा अदालतसमक्ष उनीहरूले ‘आफूहरू गलत आरोपसहित लगाइएका मुद्दाले अन्यायमा परेको’ दाबी गरेका थिए ।

क्याटालोनियाका पूर्वउपाध्यक्ष ओरिओल जन्क्वेरासलाई १३ वर्ष लामो कारावास सजाय सुनाइएको हो । अदालतले उनलाई ‘राजद्रोह तथा सार्वजनिक कोषको दुरुपयोग’ मा दोषी ठहर गरेको हो । अभियोजनकर्ताले उनीमाथि २५ वर्षको जेलसजाय माग गरेका थिए । क्याटालान क्षेत्रका पूर्वश्रममन्त्री डोलर्स बास्सा, सरकारका पूर्वप्रवक्ता जोर्डी टुरुल, बाहृय मामलासम्बन्धी पूर्वमन्त्री राउल रोमेभालाई १२ वर्षको कारावास सजाय सुनाइएको छ । त्यसैगरी, संसदका पूर्वप्रवक्ता, आन्तरिक मामलासम्बन्धी पूर्वमन्त्री, क्याटालान क्षेत्रका पूर्वमन्त्री, क्याटालान राष्ट्रियसभाका पूर्वअध्यक्ष तथा दुई अभियन्तासमेतलाई कारावास सजाय सुनाइएको हो । जन्क्वेरासले ‘राजनीतिक विचारधारका आधारमा आफूहरूलाई जेल हालिएको दाबी गर्दै पृथकतावादीहरू झन् कडा हुने’ प्रतिक्रिया दिएका छन् । क्याटालोनियाका पूर्वअध्यक्ष पुइग्डेमोन्टले ‘पृथकतावादी नेताहरूमाथि सबै गरी सय वर्षको जेल सजाय तोकिनु अमानवीय भएको’ बताएका छन् ।

‘अहिलसम्मभन्दा धेरै, अब पहिलेको तुलनामा झन् चर्को प्रतिक्रिया जनाउने समय आएको छ,’ पुइग्डोमेन्टले थपे, ‘हाम्रो भविष्यका लागि, हाम्रा छोराछोरीका लागि । अनि लोकतन्त्र, क्याटालोनिया र युरोपका लागि ।’

अदालतको फैसला सार्वजनिक भएसँगै स्वतन्त्रता पक्षधरहरूले क्याटालोनियाको राजधानी बार्सिलोनामा विरोध र्‍याली आयोजना गरेका छन् । उनीहरूले मुख्य सहरका सडकहरू अवरुद्ध पारेका छन् ।

फैसलाको विरोधमा विद्यार्थीहरू क्याटालोनियको झन्डा तथा ब्यानरसहित विरोधमा उत्रेका बीबीसीले जनाएको छ । विरोध प्रदर्शनमा सहभागीले ‘यो न्याय होइन, बदला हो’ भन्दै नाराबाजी गरेका थिए ।

फुटबल क्लब बार्सिलोना र क्याटालन फुटबल संघले कारावास सजायको भर्त्सना गर्दै ‘वार्ता र समझादी’ का आधारमा समस्या सुल्झाउन आग्रह गरेको छ । संघले नेताहरू र उनीहरूका परिवारप्रति ऐक्बद्धता जनाउन क्याटालोनिया क्षेत्रका सबै फुटबल खेल स्थगित गर्ने घोषणासमेत गरेको छ ।

सन् २०१७ मा क्याटालोनियको स्वतन्त्रताका लागि गरिएको जनमतसंग्रहमा पृथकतावादी पक्षधरले बहुमत हासिल गरेका थिए । त्यसलगत्तै क्षेत्रीय संसद्मा क्याटालोनिया स्पेनबाट स्वतन्त्र हुने प्रस्ताव लगिएपछि केन्द्र सरकारले हस्तक्षेप गरेको थियो । त्यसलगत्तै स्पेनको संवैधानिक अदालतले जनमतसंग्रहलाई अवैध घोषित गरेपछि क्याटालोनियामा संघर्ष चर्केको हो ।

प्रकाशित : आश्विन २८, २०७६ १०:१४
प्रतिक्रिया
पठाउनुहोस्

एसियाली स्रष्टा राजधानीमा

कान्तिपुर संवाददाता

काठमाडौँ — चिनियाँ राष्ट्रपति सी चिनफिङ फर्केलगत्तै एक हुल चिनियाँ साहित्यकार भने राजधानी काठमाडौं आइपुगेको छ । उनीहरूसँगै भारत, पाकिस्तान, बंलादेश, श्रीलंका र माल्दिभ्सबाट आएका स्रष्टाले मंगलबारदेखि चिनियाँ र दक्षिण एसियाली साहित्यका अनेक पाटो र सांस्कृतिक सम्बन्धमाथि बहस गर्नेछन्, नेपाली पर्यटकीय थलो घुम्नेछन् र विभिन्न नेपाली समुदायका सांस्कृतिक प्रस्तुति अवलोकन गर्नेछन् ।

दुई वर्षअघि चीनको छेन्दुमा सम्पन्न ‘चीन र दक्षिण एसिया साहित्य सम्मेलन’ को दोस्रो संस्करण यसपटक काठमाडौंमा हुन लागेको छ । आयोजक बनेको छ– नेपाल प्रज्ञा प्रतिष्ठान ।

प्रतिष्ठानले सोमबार राजधानीमा पत्रकार सम्मेलन गर्दै पाहुना स्रष्टाहरू आइसकेको जनायो । ‘सम्मेलनमा विभिन्न १६ जना विद्वान्ले विभिन्न विषयमा गोष्ठीपत्र प्रस्तुत गरिनेछ,’ प्रतिष्ठानका सदस्यसचिव जगत्प्रसाद उपाध्यायले भने, ‘चिनियाँसँगै दक्षिण एसिया साहित्यका अवस्थितिदेखि भावी सहकार्यसम्मको बहसले हाम्रो लागि उपलब्धिमूलक बन्न सक्छ ।’ मंगलबार बिहान प्रधानमन्त्री केपी शर्मा ओलीले उद्घाटन गर्ने सम्मेलनमा साँझ भने सांस्कृतिक झाँकीहरू प्रस्तुत गरिने उनले जनाए । बुधबार भने चन्द्रागिरिमा नेपाल पर्यटन बोर्डका तर्फबाट ‘नेपालमा सांस्कृतिक पर्यटनको सम्भावना’ विषयमा प्रस्तुति रहनेछ ।

स्रष्टालाई पोखराको प्राकृतिक दृश्यावलोकन भ्रमणका साथै काठमाडौंका विभिन्न ऐतिहासिक, सांस्कृतिक र पुरातात्त्विक स्थलहरूको अवलोकन र अध्ययन भ्रमण गराइनेसमेत उनले जनाए ।

प्रकाशित : आश्विन २८, २०७६ १०:११
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×