बेइजिङमा एक महिनापछि सीपीसीको बैठक

कान्तिपुर संवाददाता

काठमाडौँ — एक महिनापछि चिनियाँ कम्युनिष्ट पार्टी (सीपीसी) १९औं केन्द्रीय समितिको चौथो पूर्ण बैठक बस्ने भएको छ । चिनियाँ कम्युनिष्ट पार्टी केन्द्रीय समितिको राजनीतिक ब्यूरोको बेइजिङमा बसेको बैठकले अक्टुबरमा उक्त बैठक गर्ने निर्णय गरेको हो । मुलुकको भावी नीति तथा कार्यक्रम तय गर्नु नै यस बैठकको मुख्य एजेण्डा हुनेछ ।

चौथो पूर्ण बैठकमा सीपीसीले पोलिटिकल ब्यूरोले कार्य प्रतिवेदनमाथि छलफल गर्नुका साथै चासोका महत्वपूर्ण मुद्दामाथि समीक्षा गर्ने बैठकपछि जारी विज्ञप्तिमा जनाइएको छ । त्यस्तै बैठकले चिनियाँ विशेषतायुक्त समाजवाद प्रणाली तथा शासन प्रणाली क्षमताको आधुनिकीकरण लगायत विषयमा अध्ययन तथा समीक्षा गर्ने चिनियाँ सञ्चारमाध्यमहरूले जनाएका छन् ।

चिनियाँ कम्युनिष्ट पार्टी महासचिव सी चिनफिङको अध्यक्षतामा शुक्रबार बसेको बैठकले स्थापनायता चिनियाँ कम्युनिष्ट पार्टीले एकीकृत भएर नेतृत्व गरेको निष्कर्ष निकाल्दै मार्क्सवादको सिद्धान्तलाई चिनियाँ विशेषतायुक्त विशिष्ट परिस्थितिमा सम्मिलन गर्नुपर्नेमा जोड दिएको छ। चिनियाँ क्रान्तिले विजय हासिल गरेका कारण स्वदेश तथा विदेशबाट प्राप्त भएका सकारात्मक तथा नकारात्मक अनुभवको सारांश गरिएको छ साथै समाजवादी व्यवस्थामा सुधार, पार्टी नेतृत्व तथा आर्थिक, राजनीतिक, सांस्कृतिक, सामाजिक, सैन्य र विदेश मामिला लगायत पहलको सुदृढीकरणमा पनि बैठकमा जोड दिइएको छ।

बैठकले जनगणतन्त्र चीन स्थापनाको ७० वर्षयता आर्थिक विकास तथा राजनीतिक स्थिरतामा चमत्कार पैदा गर्नु दुनियाँका लागि दुर्लभ भएको ठहर गरेको छ । चिनियाँ विशेषताको समाजवादी प्रणाली तथा राष्ट्रिय शासन प्रणाली चीनमा निहीत रहेको व्याख्या गर्दै चीनले आफ्नो खुट्टामा उभिएर गरिबी विरूद्ध छलाङ मारेको जनाएको छ। ‘चिनियाँ विशेषतायुक्त राजनीतिक प्रणालीले अब गहिरो जरा गाडेको छ र यसलाई जनसमर्थन पनि प्राप्त भएको छ’ बैठकले निचोड निकालेको छ ।

यस वर्ष नयाँ चीन स्थापनाको ७० वर्ष हुनुका साथै चीनले अघि सारेको दुई वटा शताब्दी लक्ष्य प्राप्तिको गन्तव्य वर्ष पनि हो । विगत एक शताब्दीमा विश्वमा विशाल परिवर्तन भएसँगै चीन पनि कायापलट गर्ने महत्वपूर्ण अवधिमा पदार्पण गरेको छ । सी चिनफिङ विचारधारालाई नयाँ युगको चिनियाँ विशेषतायुक्त समाजवादको कार्यान्वयनको मार्गदर्शनका रूपमा लिनुपर्नेमा पनि बैठकले मतैक्यता जनाएको छ। पार्टीको १८औं कांग्रेसपछि शासन प्रणालीमा व्यवहारिक उपलब्धि हासिल गरेको पनि बैठकको सार भएको चिनियाँ संस्करणको सिन्ह्वानेटले लेखेको छ।

प्रकाशित : भाद्र १४, २०७६ १३:४६
प्रतिक्रिया
पठाउनुहोस्

भारतबाट गाडीसहित नेपाल आइ डकैती गर्नेहरु पक्राउ

कान्तिपुर संवाददाता

(विराटनगर) — मध्यराति गाडीसहित नेपाली सीमा क्षेत्रमा श्रृंखलाबद्ध डकैती गर्दै आएका ३ भारतीयसहित ७ जनालाई प्रहरीले पक्राउ गरेको छ । पक्राउ पर्नेमा भारत बिहारको मधुवनी थाना बेनिपट्टिका ३५ वर्षीय धर्मेन्द्र कामत, ३२ वर्षीय लक्ष्मण गुप्ता, ४४ वर्षीय मो.मोतिउर रहमान छन् ।

यसैगरी रौतहट गौर–३ पोखरियाटोलका ४१ वर्षीय मो.मोहिज धुनियाँ, ५० वर्षीय बलराम क्षेत्री, सर्लाही ब्रम्हपुरी–४ का ५२ वर्षीय सेख मो.सलिफ र ४६ वर्षीय शेख अली असगरलाई पक्राउ गरिएको जिल्ला प्रहरी कार्यालय मोरङले जनाएको छ ।

प्रहरीले डकैतीमा प्रयोग भएको बीआर ३२ पीए २८३६ नम्बरको गाडी नियन्त्रणमा लिएको छ । भारतको सितामढीमा योजना बनाएर नेपालमा डकैती गर्न आएको प्रारम्भिक अनुसन्धानबाट खुलेको जिल्ला प्रहरी कार्यालय मोरङले जनाएको छ । प्रहरीका अनुसार उनीहरुले विराटनगरमा डकैती गरिसकेपछि गाडी चढेर काँकडभिट्टा हुँदै भारत प्रवेशको योजना बनाएका थिए । त्यही योजनाअनुरुप भारत जाने क्रममा पूर्व–पश्चिम राजमार्गको पथरीशनिश्चरे नगरपालिकामा पुगेपछि इलाका प्रहरी कार्यालय पथरीले उनीहरुलाई नियन्त्रणमा लिएको थियो ।

प्रहरीका अनुसार उनीहरु ९ भदौको बिहान ८ बजे विराटनगर–जोगवनी नाका भएर नेपाल भूमिमा प्रवेश गरेका थिए । उनीहरुले ४ दिनको भन्सारसमेत तिरेका थिए । यो समूहले विराटनगरमा अहिलेसम्म ४ पटक डकैती गरिसकेका छन् । १० भदौ गते विराटनगर–७ स्थित माँ भवानी ईन्टरप्राईजेजबाट ६ लाख रुपैयाँ र कदमाह कृषि सहकारी संस्था लिमिटेडबाट ४ लाख ९५ हजार रुपैयाँ डकैती गरेको प्रहरीले बताएको छ। त्यसअघि २३ साउनमा विराटनगर–२ शनिहाटमा रहेको गणनायक मार्केटिङ हाउस नामक किराना पसलबाट ४ लाख तथा पञ्चकन्या ट्रेड लिंकबाट ५ लाख ९५ हजार रुपैयाँ डकैती गरेका थिए । प्रहरीका अनुसार यो समूहले २० लाख ९० हजार रुपैयाँ नगद डकैती गरेको छ ।

डकैतीको पछिल्लो घटनामा प्राप्त सीसीटीभी फुजेटबाट उनीलाई पक्राउ गरिएको हो । समूहका मुख्य नाइके भनिएका भारत मधुवनीकै मोहम्मद कलाम फरार रहेकाले खोजी भइरहेको प्रहरीले जनाएको छ । उनीहरुबाट ७ मोबाइल सेट, १२ हजार ८ सय ५० नेपाली रुपैयाँ र ११ हजार ४ सय १० भारु, स्करपिओ गाडी, १ नेपाली र ९ भारतीय सिमकार्ड, कटर मेसिन, कम्ब्याट पेन्टसहित लत्ताकपडा बरामद भएको छ ।

पक्राउ परेकालाई मुलुकी अपराध संहिता २०७४ को चोरी तथा डाँकासम्बन्धी कसुरअन्तर्गत मुद्दा चलाइने प्रहरीले जनाएको छ ।

प्रकाशित : भाद्र १४, २०७६ १३:१०
पूरा पढ्नुहोस्
प्रतिक्रिया
पठाउनुहोस्