सम्झनामा नेपाली थातथलो

विप्लव भट्टराई

झारखण्ड — ‘चौंरीगाई कहाँ चर्‍यो धौलागिरि वनैमा...’ मध्यपश्चिमको यो लोकभाका झारखण्डको विकट मानिने चिरकुण्डीमा भेटिएका रामबहादुर पुनको मुखमा ताजै छ । १८ वर्षको उमेरमा माइका भनिने विद्युत् र कस्मेटिक पदार्थमा प्रयोग हुने धातुको खानीमा काम गर्न झारखण्ड आइपुगेका उनलाई गाउँघरको यादले अझै छाडेको छैन । 

गीत सुनाउँदै भावुक बनेका उनले रोजगारीका लागि परदेश आएयता पुर्ख्यौली थातथलो कहिल्यै नफर्केको सुनाए । पाल्पा घर बताउने उनलाई यहाँ आएपछि गाउँघरको रहनसहन र अवस्थाबारे केही पत्तोअत्तो छैन । बाल्यकालमा बितेका दिनले सपनामा पनि झस्काउँछ । ‘बालबच्चा र नातिनातिना यतै हुर्किए,’ उनले भने, ‘मुटुभरि माया भए पनि पुरानो थलो सम्झनामा राख्नबाहेक केही गर्न सकिएन ।’

उनका छिमेकी मंगलबहादुर थापाको अवस्था पनि उस्तै । जसोतसो नेपाली बोल्ने उनीहरू घरगाउँ सम्झँदा भक्कानिन्छन् । गोरखाको बारपाकलाई पुर्ख्यौली थलो मान्ने उनी आउजाउ र भेटघाट नहुँदा दोस्रो पुस्ता भने थातथलोबाट विमुख भएको बताउँछन् । ‘छोराछोरी कनिकुथी पहाडे भाषा बुझ्छन,’ ५६वर्षीय थापाले भने, ‘नातिनातिनाको दिमागमा त नेपालप्रतिको कुनै सम्झना र भाषाका विषयमा ज्ञान हुने कुरै भएन ।’

सँगै भेटिएका उमेशबहादुर क्षत्रीलाई न भाषाको ज्ञान छ न पिता पुर्खाको थलोबारे जानकारी । भन्छन्, ‘बाजे यहाँ आएर बसेको भन्ने थाहा छ तर कहिले नेपाल गइएन पनि र पुर्ख्यौली ठाउँको याद पनि भएन ।’

झारखण्डको भित्री गाउँमा नेपाली भाषा बोल्ने र सिकाउने कुरामा समस्या छ तर राजधानी राँचीमा भने नेपालको छुट्टै गौरव छ । संस्कृति र भाषालाई जोगाइराखेका उनीहरूमा भने थातथलोको अत्तोपत्तो नहुने समस्या अरूजस्तै छ ।

राँचीको डोरन्डास्थित नेपाल हाउस परिसरमा रहेको गोर्खा सहिद स्मारक चोकमा भेटिएका शिवकुमार लिम्बूको पुर्ख्यौली थलोका कहानी अचम्मलाग्दा थिए । उनको परिवार ताप्लेजुङको हाङदेवाबाट तीन पुस्ताअघि आएपछि यतै स्थापित भएका हुन् । ‘पोहोर गाउँ खोज्दै जाँदा अकमक्क परेर फर्कनुपर्‍यो,’ उनले भने, ‘ताप्लेजुङको फुङलिङ पुगेर पुर्ख्यौली थलो खोजेको, कसैले पनि बताउन सकेनन् । आफूले पहिलेको वडा र ठेगाना बताइयो, अहिले त्यो फरक भएछ । अकमक्क परेर फर्किएँ ।’

प्रस्ट नेपाली बोल्ने र नेपालप्रति गौरव गर्ने नेपाल हाउस क्षेत्रका धेरैलाई आफ्ना पितापुर्खाको मूल थलोबारे हेक्का नभएको पाइयो । झारखण्डका विभिन्न स्थानमा छरिएर बसेका अधिकांश नेपाली माइका र कोइलाखानीमा काम गर्न आएकाहरू छन् । १९८० मा सामूहिक रूपमा प्रहरीमा नेपाली युवा लगिएपछि राँचीमा नेपाली बस्ती विस्तार भएको थियो ।

त्यसपछि यही क्रम चलिरहँदा अहिले यो क्षेत्रमा ५० हजार नेपाली मूलका बासिन्दाको इज्जतिलो बसाइ रहेको हो । यहीँ भेटिएका विनोद खातीले पनि पितापुर्खाको ठाउँबारे अनभिज्ञता जनाए । ‘तीन पुस्तादेखि नै यतै रहेकाले धेरैपटक खोज्दै जाँदा पनि नभेटदा नेपाली मूलको हुँ भन्नुबाहेक केही अस्तित्व रहेन,’ उनले भने, ‘नागरिकता त खोजेको होइन तर पुर्ख्यौली थलो मात्र भेट्न कसैले सहयोग गरे अभारी हुने थिएँ ।’

यो क्षेत्रमा दसैंमा टीका लागाइन्छ । भैलेनी खेल्ने चलन नेपालमा जस्तै छ । लोसार मनाइन्छ । नेपाली भाषालाई मज्जाले बोल्ने प्रशस्तै भेटिन्छन् तर पुर्ख्यौली थातथलोबारे भने धेरै बेखबर देखिए ।

प्रकाशित : श्रावण २८, २०७६ ०८:१४
प्रतिक्रिया
पठाउनुहोस्

सिक्किम–दार्जिलिङ एकीकरण होला ?

कान्तिपुर संवाददाता

सिक्किम — नेपालीभाषी बाहुल्य भारतीय राज्य सिक्किम र पश्चिम बंगालको एक जिल्ला दार्जिलिङबीच एकीकरण मुद्दा बेला–बेला पेचिलो रूपमा उठ्ने गर्छ । खासगरी दार्जिलिङमा जब अलग प्रान्त गोर्खाल्यान्डको माग सतहमा आउँछ । सँगसँगै सिक्किम–दार्जिलिङ एकीकरणको मुद्दा पनि उछालिएर आउँछ । 

यसपटक पुनः सिक्किम–दार्जिलिङ एकीकरणको प्रसँग चर्चामा आएको छ । भारतको केन्द्र सरकारले जम्मु–कश्मीरको विशेषाधिकार खारेज गर्दै केन्द्रशासित प्रदेश बनाएसँगै दार्जिलिड र सिक्किम एकीकरणको मुद्दाको चर्चा सुरू भएको हो । तर यो सम्भव हुने/नहुनेमा भने मतभेद कायमै छन् ।

सिक्किमको सत्ताधारी पार्टी सिक्किम क्रान्तिकारी मोर्चा (एसकेएम) ले ‘सिक्किम–दार्जिलिङ एकीकरण असम्भव’ रहेको बताउने गर्छ । तर, दार्जिलिङको एक राजनीतिक शक्ति करिब डेढदशक भन्दा लामो समयदेखि सिक्किम–दार्जिलिङ एकीकरणको पक्षमा वकालत गर्दै आएको छ । गोर्खा राष्ट्रिय कंग्रेसले दार्जिलिङलाई सिक्किममा विलय गराएर भारतीय नेपालीभाषीको वृहत राज्य निर्माण गरिनुपर्ने माग गर्दै आएको छ ।

ऐतिहासिक, भौगोलिक, जातीय र भाषिक रूपमा दार्जिलिङ र सिक्किमबीच समानता छ । तर, दुवैतर्फका राजनीतिक शक्ति र जनता ‘ग्रेटर सिक्किम’ कोपक्षमा देखिँदैनन् । दार्जिलिङका नेपालीभाषीको मुख्य एजेन्डा अलग राज्य मात्रै छ । सिक्किमे दल र जनता पनि दार्जिलिङसँग कुनै हालतमा ‘मर्ज’ नहुने पक्षमा एकमत छन् ।

दार्जिलिङका राजनीतिक दलहरूले भने विगत लामो समयदेखि सिक्किम–दार्जिलिङ एकीकरणको विरोध गर्दै आएका छन् । दलहरूले गोर्खाल्यान्ड प्राप्तिको मुद्दालाई ‘डाइभर्ट’ गर्ने उद्देश्यका साथ बेलाबेला यो मुद्दा उठ्ने गरेको आरोप लाग्ने गरेको छ । गोर्खा जनमुक्ति मोर्चाका प्रवक्ता बीपी बजगार्इं भन्छन्, ‘अहिले सिक्किम–दार्जिलिङ विलयको मुद्दा उठाइनु मूर्खतापूर्ण हो ।’

दुवै क्षेत्रका जनता र राजनीतिक शक्तिहरू विपक्षमा रहेको सिक्किम–दार्जिलिङ एकीकरण प्रयत्न सम्भव छ त ? गोर्खा राष्ट्रिय कंग्रेसका मुख्य संयोजक सुबोध पाख्रिन भन्छन्, ‘ऐतिहासिक दस्तावेजलाई आधार मान्ने हो भने सिक्किम र दार्जिलिड विलयको विकल्प छैन ।’ ऐतिहासिक दस्तावेजका आधारमा दार्जिलिङ सिक्किमको अभिन्न भूभाग रहेको दाबी गरे ।

प्रकाशित : श्रावण २८, २०७६ ०८:११
पूरा पढ्नुहोस्
प्रतिक्रिया
पठाउनुहोस्