जरिवाना तिरे स्वदेश फिर्ता

कान्तिपुर संवाददाता

मलेसिया — मलेसियाले गैरकानुनी आप्रवासी कामदारलाई माफीसहित स्वदेश फर्कन दिने भएको छ । गृहमन्त्री मुहिद्दिन यासिनले बिहीबार पुत्राजयास्थित अध्यागमन विभागमा पत्रकार सम्मेलन गर्दै आगामी अगस्ट १ देखि डिसेम्बर अन्त्यसम्मको ५ महिने आममाफी कार्यक्रम घोषाणा गरे । 

‘ब्याक फर गुड (बीफोरजी)’ नाम दिइएको आममाफी कार्यक्रम अन्तर्गत गैरकानुनी कामदारले स्वदेश फर्कन ७ सय रिंगिट जरिवाना शुल्क तिर्नुपर्नेछ । यासिनले उक्त कार्यक्रमको उपयोग गर्दै गैरकानुनी आप्रवासी अध्यागमन विभागका कार्यालयमा जरिवाना शुल्क तिरेर स्वदेश फर्कन सक्ने बताए ।

घर फर्कन चाहने गैरकानुनी कामदार सम्बन्धित देशका दूतावासबाट यात्रा अनुमतिपत्र लिएर अध्यागमन विभाग कार्यालयमा उपस्थित हुनुपर्ने छ । त्यसरी विभाग पुग्ने कामदारलाई अधिकारीले बायोमेट्रिकलगायत विवरण संकलन गर्ने तथा अध्यागमन सिस्टममा सूचीकृत गरी मलेसियाबाट बाहिरिने पास दिने छन् । पास पाउने कामदारले एक साताभित्र हवाई टिकट काटी स्वदेश उड्न सक्ने यासिनले बताए ।

कार्यक्रमलाई प्रभावकारी बनाउन पश्चिमी मलेसियाका ८० अध्यागमन काउन्टर र २ सय कर्मचारी खटाइएको छ । कार्यक्रममार्फत स्वदेश फर्कने कामदारलाई अध्यागमन विभागले कालोसूचीमा राख्ने कारण उनीहरू पुनः मलेसिया प्रवेश गर्न भने पाउने छैनन् । तत्कालका लागि यो कार्यक्रम पश्चिमी मलेसियामा कार्यान्वयनमा ल्याइएको हो ।

मलेसियामा रहेका करिब ४ लाख नेपालीमध्ये हजारौं गैरकानुनी अवस्थामा बसिरहेका अनुमान छ । त्यस्ता नेपाली यस्ता कार्यक्रमबाट देश फर्केको खण्डमा सजायबाट जोगिने छन् । करिब २० लाख विदेशी कामदार रहेको मलेसियामा ठूलो संख्यामा गैरकानुनी छन् । गृहमन्त्री यासिनले ब्याक फर गुड कार्यक्रमको म्याद सकिएपछि गैरकानुनी कामदारविरुद्ध देशव्यापी कारबाही चलाईने जनाए ।

यसअघि सरकारले सञ्चालन गरेको ‘थ्री प्लस वान भोलेन्टर्ली’ आममाफी कार्यक्रममा भने न्यूनतम ४ सय रिंगिट जरिवाना तोकिएको थियो । तर गैरकानुनी रूपमा मलेसियामा रहेको अवधिका आधारमा जरिवाना रकम तोकिएका कारण कतिपयले ३ हजार १ सय रिंगिटसम्म तिरेका थिए ।

मलेसियाको सरकारी तथ्यांकअनुसार सन् २०१४ देखि गतवर्षको अगस्टसम्म सञ्चालन गरिएको उक्त आममाफी कार्यक्रममार्फत ८ लाख ४० हजार गैरकानुनी आप्रवासी कामदार स्वदेश फर्केका थिए ।

प्रकाशित : श्रावण ३, २०७६ ०८:०५
प्रतिक्रिया
पठाउनुहोस्

पाकिस्तानी पूर्वप्रधानमन्त्री पक्राउ

एजेन्सी

लाहोर — पाकिस्तानका पूर्वप्रधानमन्त्री शाहिद खकान अब्बासी भ्रष्टाचार आरोपमा पक्राउ परेका छन् । उनलाई नेसनल एकाउन्टेबिलिटी ब्युरो (एनएबी) का अधिकारीले बिहीबार गिरफ्तार गरेका हुन् । 

पाकिस्तानी सञ्चारमाध्यमका अनुसार अब्बासीलाई एक पत्रकार सम्मेलनमा जाने क्रममा पक्राउ गरिएको हो । अधिकारीले पक्राउलगत्तै अब्बासीलाई स्वास्थ परीक्षणका लागि लगिएको जनाए । उनलाई हाल लाहोरस्थित एनएबी कार्यालयमा राखिएको छ । अब्बासीलाई शुक्रबार अदालतमा उपस्थित गराइने अधिकारीहरूले जनाएका छन् ।

‘अब्बासीलाई गिरफ्तार गरिएको छ, उहाँलाई आज वा भोलि अदालतमा पेस गरिनेछ,’ पक्राउलगत्तै एक अधिकारीले भने । नाम नखुलाउने सर्तमा अर्का एक अधिकारीले उनको पक्राउ पुष्टि गरेका एएफपीले जनाएको छ ।

अब्बासी सन् १९१७ को अगस्टदेखि २०१८ मेसम्म प्रधानमन्त्री भएका थिए । उनी प्रतिपक्षी दल मुस्लिम लिग नवाज (पीएमएल–एन) का प्रभावशाली नेता हुन् ।

पाकिस्तानका पूर्वराष्ट्रपति असिफ अली जर्दारी पनि गत साता भ्रष्टाचार अभियोगमा पक्राउपरेका थिए । पूर्वप्रधानमन्त्री नवाज सरिफ भने भ्रष्टाचारकै मुद्दामासात वर्षे जेल सजाय भुक्तान गरिरहेका छन् ।

भ्रष्टाचारविरुद्धको निकायका अधिकारीका अनुसार नवाजका भाइ शभाज सरिफलाई समेत पक्राउको तयारी भइरहेको छ । गतवर्ष प्रधानमन्त्रीमा निर्वाचित भएसँगै इमरान खानले भ्रष्टाचारविरोधी कारबाहीलाई तीव्रता दिएका छन् ।

प्रकाशित : श्रावण ३, २०७६ ०८:०३
पूरा पढ्नुहोस्
प्रतिक्रिया
पठाउनुहोस्