हङकङमा सुपुर्दगी विधेयकको विरोध –'विदेशी शक्तिको हात’

एजेन्सी

हङकङ — चीनले हङकङमा प्रस्तावित सुपुर्दगीसम्बन्धी कानुनको विरोधमा आइतबार गरिएको प्रदर्शनमा विदेशी शक्तिको हात रहेको दाबी गरेको छ । चिनियाँ सरकारी सञ्चारमाध्यमले विदेशी शक्तिले चीनमाथि प्रहार गर्न हङकङमा विध्वंश निम्त्याउने प्रयास गरेको दाबी गरेको छ । 

सुपुर्दगी विधेयकको विरोधमा सोमबार बिहान हङकङमा गरिएको प्रदर्शनमाथि हस्तक्षेप गर्दै प्रहरी । तस्बिर : एपी

चिनियाँ भाषाको सरकारी अखबार ‘ग्लोबल टाइम्स’ ले लेखेको छ, ‘यो निश्चित छ कि केही अन्तर्राष्ट्रिय शक्तिले पछिल्ला महिनामा हङकङसँगको अन्तरक्रिया बढाउँदै लगेका छन् ।’ अखबारको सम्पादकीयमा हङकङका विपक्षी नेता र अमेरिकी विदेशमन्त्री माइक पोम्पियो तथा सभामुख नान्सी पेलोसीबीचको भेटवार्तालाई समेत उल्लेख गरिएको छ । त्यसैगरी अंग्रेजी भाषाको अखबार ‘चाइना डेली’ ले पनि कानुनको समर्थन गरेको छ ।

प्रस्तावित कानुनअनुसार चीनले हङकङस्थित राजनीतिक विपक्षीलाई निसाना बनाउने भन्दै सर्वसाधारणहरू विरोधमा उत्रेका हुन् । प्रदर्शनमा व्यवसायी, कानुनका विद्यार्थी, धार्मिक समूह र प्रजातन्त्र पक्षधरहरूको सहभागिता थियो । सहरका कतिपय स्थानमा सोमबार बिहानैदेखि नै विरोध प्रदर्शन जारी छ । प्रदर्शनकारीलाई भगाउन प्रहरीले पानीको फोहोरा प्रयोग गरेको समाचार संस्था एएफपीले जनाएको छ । कतिपय प्रदर्शनकारीलाई प्रहरीले लछारपछार पारेको सामाजिक सञ्जालमा सार्वजनिक तस्बिर तथा दृश्यहरूमा देखिएको छ ।

हङकङकी प्रमुख कार्यकारी क्यारी लामले विरोधका बाबजुद सुपुर्दगी विधेयक फिर्ता नहुने बताएकी छन् । संवाददाताहरूसँग सोमबार कुराकानी गर्दै लामले ‘देशको आवश्यकताअनुसार नै कानुन ल्याइएको’ दाबी गरिन् । उनले हङकङमा मानवाधिकार रक्षा हुनेमा कसैले शंका गर्नु नपर्ने बताइन् ।

आइतबार सेतो पोसाकमा सडकमा उत्रेका लाखौं मानिस घण्टौं लामो प्रदर्शनमा उत्रेका थिए । विरोधका क्रममा प्रहरी र प्रदशर्नकारीबीच हिंसात्मक झडप हुँदा दर्जनौं घाइते भए ।

मुकुन्डो लगाएका कतिपय प्रदर्शनकारी प्रहरीले खडा गरेको अवरोध पन्छाएर विधान परिषदको भवनमा प्रवेश गर्न खोजेपछि झडप भएको हो । बीबीसीका अनुसार झडपका क्रममा एक पत्रकारसहित ३ अधिकारी घाइते छन् । हङकङका प्रहरी प्रमुखले ‘शान्तिपूर्ण प्रदर्शन हुने देशको परम्परा तोडिएको’ दाबी गरे ।

हङकङको स्वतन्त्रतापछिकै ठूलो मानिएको प्रदर्शनमा १० लाख सहभागी भएको आयोजकको दाबी छ । तर प्रहरीले २ लाख ४० हजार सहभागी भएको दाबी गरेका छ । आयोजकहरूले बुधबार फेरि अर्को विरोध प्रदर्शन गरिने जनाएका छन् । सुपुर्दगीसम्बन्धी प्रस्तावित कानुनको प्रावधानअनुसार हङकङमा अपराध तथा बलात्कारमा आरोपीलाई चीन, ताइवान र मकाउका अधिकारीले सुपुर्दगीका लागि आग्रह गर्न सक्छन् । तर सुपुर्दगी गर्ने/नगर्ने घटनाको प्रकृतिका आधारमा निर्णय लिइने जनाइएको छ ।

हङकङका १९ वर्षीय युवाले गर्भवती प्रेमिकाको ताइवानमा हत्या गरी देश फर्केपछि सुपुर्दगी कानुनबारे बहस सुरु भएको हो । ताइवानी अधिकारीले ती युवकलाई सुम्पन हङकङसँग आग्रह गरे पनि कानुनी जटिलता देखिएको थियो । सन् १९९७ मा बेलायतबाट स्वतन्त्र भएयाता हङकङ ‘एक देश दुई व्यवस्था’ अन्तर्गत अर्ध–शासित छ ।

प्रकाशित : जेष्ठ २८, २०७६ ०९:०७
प्रतिक्रिया
पठाउनुहोस्

भेनेजुएला–कोलम्बिया सीमा खुल्यो

एजेन्सी

काराकस — भेनेजुएलामा पछिल्लो समय जारी संकटका कारण बन्द गरिएको कोलम्बियासँगको सीमा ४ महिनापछि आइतबार खुला गरिएको छ । सीमा खुला गरिएसँगै दसौं हजार भेनेजुएलीले आवतजावत गरेका छन् । 

कोलम्बियासँगको सीमा सुचारु भएसँगै देश छाड्न लामबद्ध भेनेजुएलाका सर्वसाधारण । तस्बिर : रोयटर्स

भेनेजुएलाका विपक्षी दलका नेता खुवान गुआइडोले गत फब्रुअरीमा अमेरिकी समर्थनको मानवीय सहायता देशमा भित्र्याउने तयारीपछि राष्ट्रपति निकोलस मडुरोले सीमा बन्द गरेका थिए ।

भेनेजुयलामा जारी शक्ति संघर्षका कारण देशमा दैनिक उपभोग्य सामग्री अभाव हुँदै गएको छ । अन्तर्राष्ट्रिय सञ्चार माध्यमका अनुसार मुद्रास्फीति निकै बढेको छ भने औषधिको समेत अभाव छ ।

राष्ट्रसंघीय निकायका अनुसार सन् २०१५ यता करिब ४० लाख मानिसले भेनेजुएला छोडिसकेका छन् । कोलम्बियाको विदेश मन्त्रालयका अनुसार आइतबार ३० हजार भेनेजुएली सीमावर्ती सहरमा आइपुगेका छन् । सीमा बन्द भएसँगै आधारभूत आवश्यकताका लागि कोलम्बियामाथि भर पर्ने सीमा क्षेत्र सहरका स्थानीय निकै समस्यामा परेका थिए । सीमा बन्द गरिनुअघि सीमाक्षेत्रको सिमोन बोलिभर अन्तर्राष्ट्रिय पुल प्रत्येक दिन करिब ३० हजारले पार गर्ने गर्थे ।

विपक्षी नेता तथा राष्ट्रिय सभाका अध्यक्ष गुआइडोले मडुरो चुनावमा धाँधली गरी राष्ट्रपतिमा निर्वाचित भएको भन्दै आफूलाई अन्तरिम राष्ट्रपति घोषणा गरेपछि भेनेजुएलामा राजनीतिक संकट गहिरिएको हो ।

अमेरिकासहित करिब ५५ देशले गुआइडोलाई समर्थन जनाएका छन् । जसका कारण मडुरो र अमेरिकी राष्ट्रपति डोनाल्ड ट्रम्प यसअघि सार्वजनिक रुपमा आरोप प्रत्यारोपमा समेत उत्रेका थिए । सेनाको समर्थन कायम राख्न सफल मडुरोलाई चीन तथा रूसलगायत राष्ट्रले सहयोग गरिरहेका छन् ।


प्रकाशित : जेष्ठ २७, २०७६ ०९:५७
पूरा पढ्नुहोस्
प्रतिक्रिया
पठाउनुहोस्