अस्ट्रेलियामा आमनिर्वाचन, सत्तारुढ दलसहितको गठबन्धन सरकार बन्ने

हार स्वीकार्दै विपक्षी दलका नेताले दिए राजीनामा
नारायण खड्का

अस्ट्रेलिया — अस्ट्रेलियामा शनिबार आमनिर्वाचन सम्पन्न भएको छ । मतगणना जारी रहेको भए पनि सत्तारुढ दल लिबरल गठबन्धनले सरकार बनाउने पक्का भएको छ । निर्वाचनपछि विपक्षी दल लेबरका नेता बिल सर्टनले आफ्नो पार्टीको हार स्वीकार गरेका छन् । उनले निर्वाचनमा हार ब्योहोरेसँगै दलको नेताबाट समेत राजीनामा दिएका छन् ।

लिबरल नेता तथा प्रधानमन्त्री स्कट मरिसनलाई शुभकामना दिँदै अस्ट्रेलियाली जनताको हितमा काम गर्न आग्रह गरेका छन् । अहिलेसम्मका निर्वाचनमा कुनै पनि दलको प्रस्ट बहुमत आउने नदेखिएकाले मिलिजुली सरकार बन्नसक्ने यहाँका सञ्चारमाध्यमले विष्लेषण गरेका छन् ।
१ सय ५० प्रतिनिधिसभा सदस्य र ७६ माथिल्लो सदन सिनेट सदस्यका लागि भएको चुनाव करिब १ महिनाअघि देखि नै सुरु गरिएको थियो । मतदानस्थलमा चुनाव घोषणा भएको दिन मतदान गर्न नसक्नेका लागि केही साता पहिल्यै देशैभरि दर्जनौंको संख्यामा 'प्रि-पोल' मतदानको व्यवस्था गरिएको थियो भने हुलाकबाट समेत मतदानको व्यवस्था गरिएको थियो । 'प्रि-पोल' मतदानमा ४० लाख बढीले मतदान गरेका थिए भने हुलाकबाट १५ लाखले मतदान गरेका थिए ।

आज भएको निर्वाचनमा करिब १२ लाखले मतदान गरेको बताइएको छ । बहुमत ल्याउनका लागि ७६ सिटको आवश्यकता पर्नेमा अहिलेसम्मको नतिजामा लिबरल गठबन्धनले ७४ स्थानमा अग्रता बनाएको छ भने विपक्षी दल लेबरले ६६ सिटमा अग्रता लिएको छ । अस्ट्रेलियाका पूर्वप्रधानमन्त्री टोनी अबटले करिब २५ वर्षदेखि जित हासिल गर्दै आएको निर्वाचन क्षेत्रबाट स्वतन्त्र उम्मेदवार जाली स्टेगलसँग हार ब्योहोर्नुपरेको छ । प्रधानमन्त्री स्कट मरिसनलगायत अन्य अधिकांश उच्च नेताहरुले भने आफ्नो जित सुनिश्चित पारेका छन् । निर्वाचनमा विपक्षी दल लेबरले बहुमत ल्याउने सर्वेक्षणहरुले देखाएको भए पनि नतिजा त्यसको विपरीत देखिएको छ ।

यसपटकको निर्वाचनमा अन्टार्कटिकामा रहेका आफ्ना नागरिकहरुलाई मतदान अधिकार दिनका लागि अस्ट्रेलियाको निर्वाचन आयोगले उक्त स्थानमा समेत मतदान केन्द्र स्थापना गरेको थियो । यसैगरी विदेशमा रहेका नागरिकहरुलाई मतदानमा सामेल गराउनका लागि विश्वभरि रहेका अस्ट्रेलियाली दुतावास तथा कूटनीतिक नियोगहरुमा ७६ वटा मतदान केन्द्र स्थापना गरिएको थियो । अनिवार्य रुपमा मतदान गर्नुपर्ने नियम राखिएको अस्ट्रेलियाको निर्वाचनमा करिब ९५ प्रतिशत मतदाताहरुले मतदान गरेको जनाइएको छ ।
अहिलेसम्म ७० प्रतिशत मतगणना भइसकेको निर्वाचनको पूर्ण नतिजा आउन अझै केही दिन कुर्नुपर्ने सञ्चारमाध्यमहरुले जनाएका छन् । 'प्रि-पोल' र हुलाकमार्फत गरिएका मतहरु समेत गणना गरिसकेपछि मात्र पूर्ण नतिजा आउने बताइएको छ । रोजगार, वातावरण परिवर्तन, ट्याक्स, सामाजिक सुरक्षा लगायतका विषय यसपटकको निर्वाचनमा मुख्य एजेण्डा बनेका थिए ।

नेपालीमुलका उम्मेदवार पराजित
पहिलोपटक नेपाली समुदायको प्रतिनिधित्व गर्दै अस्ट्रेलियाको प्रमुख दलबाट चुनावमा होमिएका युवा प्रमेज श्रेष्ठ पराजित भएका छन् । विपक्षी दल लेबरकी लिण्डा बर्निसँग उनी करिब १३ हजार मतले पराजित भएका हुन् ।

उनलाई निर्वाचनमा सहयोग पुर्‍याउन शनिबार विहानैदेखि दर्जनौं नेपाली मतदानस्थलमा खटिएका थिए । श्रेष्ठले हार स्वीकार्दै 'चुनावले नेपालीलाई अलग पहिचान दिलाएको' बताए । उनले आफू पराजित भए पनि प्रमुख दलबाट उम्मेदवार बन्नु नै नेपालीका लागि ठूलो अवसर भएको समेत सुनाए । 'हारजित निर्वाचनमा हुन्छ नै तर यसले नेपाली समुदायका लागि ठूलो अवसर र सम्भावनाहरु सिर्जना गरिदिएको छ' निर्वाचनपछि उनले कान्तिपुरसँग भने ।
विपक्षी दल लेबरबाट लामो समयदेखि राजनीति गरिरहेकी उनका प्रतिद्वन्द्वी बर्नि लेबरको परिवार तथा सामाजिक सेवा छायाँ मन्त्री हुन् । ८० प्रतिशत मतगणना भइसक्दा श्रेष्ठले २५ हजार २ सय ४१ मत ल्याएका छन भने बर्निले ३७ हजार ६ सय २४ मत ल्याएकी छिन् । २६ वर्षका श्रेष्ठले आफू सम्पूर्ण नेपाली तथा यहाँको सत्तारुढ दलको प्रतिनिधि बनेर निर्वाचनमा आउन पाउनुले भविष्यमा नेपालीहरुलाई यहाँको मूल राजनीतिमा आउन बाटो प्रशस्त गरिदिएको दाबी गरे ।

प्रकाशित : जेष्ठ ४, २०७६ २१:४४
प्रतिक्रिया
पठाउनुहोस्

भरतपुर गोल्डकपको उपाधि संकटालाई 

रमेशकुमार पौडेल

चितवन — पहिलो भरतपुर गोल्डकप फुटबल प्रतियोगितामा संकटा क्लब विजयी भएको छ । एजे इन्टरनेशनलले नारायणगढ क्याम्पाचौरमा सञ्चालन गरेको गोल्डकपको शनिबार भएको फाइनल खेलमा संकटाले झापा-११ लाई शून्यका विरुद्ध तीन गोलले पराजित गरेको हो । उपाधिसँगै संकटले ६ लाख नगद प्राप्त गर्‍यो । दोस्रो हुने झापाले तीन लाख पायो ।

पुरस्कार राशिका हिसाबले यो चितवनको सर्वाधिक ठूलो प्रतियोगिता हो ।

सुरुमा आक्रमक देखिएको झापाले खेलमा बिस्तारै लय गुमाउँदै जाँदा संकटा सफल भएको हो । खेल सुरु भएको १४ औं मिनेटमा संकटाका लागि पहिलो गोल कप्तान अमित तामाङले गरेका थिए । अमितले पोष्टतर्फ गरेको लामो प्रहारको झापाका गोल रक्षक किशोर गिरीले केही भेउ नपाउँदै बलले जाली छोएको थियो । खेलमा पहिलो गोल खाएपछि झापा दबावमा देखियो । झापाले गरेको केही राम्रा प्रहार पनि गोलमा परिणत हुन सकेन ।

मध्यान्तरपछि ३७ औं मिनेटमा संकटाले आत्माघाती गोलका रुपमा झापाबाट एक गोल उपहार पायो । झापा-११ का सुमिन मैनालीले पोष्ट नजिक आफ्ना गोल रक्षकतर्फ हेड गरेर बल फालेका थिए । तर, झापाका गोल रक्षक किशोर गिरीले बल समाउन नसक्दा दुर्भाग्यपूर्ण गोल भएर झापा २-० ले पछाडि पर्‍यो । मध्यान्तरपछिको इन्जुरी समयमा संकटाका लागि लक्ष्मण रुचालले गोल थपेका थिए ।

संकटाका कप्तान अमित तामाङ शनिबारको खेलको म्यान अफ दि म्याच हुनुका साथै प्रतियोगिता अवधिकै सर्वोत्कृष्ट खेलाडी घोषित भए । उनले म्यान अफ दि म्याचको १० र सर्वोत्कृष्ट खेलाडीको ४० हजार रुपैयाँ नगद पुरस्कार पाए । खेल अवधिभर कुनै पनि गोल नखाएका संकटाका गोल रक्षक राजाबाबु थापा उत्कृष्ट गोल रक्षक घोषित भएर २० हजार रुपैयाँ नगद पाए ।

त्यसैगरी २० हजार राशिकै उत्कृष्ट स्ट्राइकरको पुरस्कार झापा-११ का निशान लिम्बुले पाए । उत्कृष्ट मिडफिल्डर पनि झापा-११ कै संजोग राई भएका छन् । उत्कृष्ट डिफेन्डर घरेलु टोली चितवन-११ का सुन्दास चौधरी भएका छन् । बैशाख २४ गतेदेखि सुरु भएको प्रतियोगितामा १२ वटा टिमले प्रतिस्पर्धा गरेका थिए । विजयी टिम र खेलाडीलाई भरतपुर महानगरपालिकाकी मेयर रेनु दाहालले पुरस्कार र कप दिएकी थिइन् ।

प्रकाशित : जेष्ठ ४, २०७६ २१:२६
पूरा पढ्नुहोस्
प्रतिक्रिया
पठाउनुहोस्