रूसी विमान दुर्घटनामा ४१ को मृत्यु

एजेन्सी

मस्को — रूसको राजधानी मस्कोमा आपत्कालीन अवतरणका क्रममा भएको विमान दुर्घटनामा कम्तीमा ४१ जनाको ज्यान गएको छ । ९ घाइते छन् । विमानमा ७३ यात्रु र चालक दलका ५ सदस्य थिए । रूसी समाचार संस्थाका इन्टरफयाक्सका अनुसार मृत्यु हुनेमा २ बालबालिका र एक विमान परिचारिका छन् ।

रूसको मस्कोस्थित विमानस्थलमा आपत्कालीन अवतरणका क्रममा आगलागी भएको हवाईजहाज । तस्बिर : एपी

चालक दलका सदस्य तथा यात्रुहरूका अनुसार विमानमा चटयाङ लागेपछि आपत्कालीन अवतरण गरिएको हो । इन्टरफयाक्सका अनुसार मस्कोको सेरेमेतएभो विमानस्थलबाट उडेको केही बरेमै विमान चालकले आपत्कालीन संकेत जारी गरेका थिए ।

दुर्घटनाग्रस्त सुखोई सुपरजेट-१०० विमान रूसको स्थानीय समयअनुसारआइतबार साँझ ५ बजेर ५० मिनेटमा मुर्मन्स्क सहरका लागि उडेको थियो ।

विमान चालक डेनिस यभ्दोकिमोभलाई उद्धृत गर्दै रूसी सञ्चारमाध्यमले 'विमानमा चटयाङ लागेपछि सञ्चार सम्पर्कविच्छेद भएको' जनाएका छन् । उनले भने, 'हामीले पुनः सञ्चारसम्पर्क कायम गर्ने प्रयास गर्‍यौं । तर तत्कालै पुनः सम्पर्कविच्छेद भएकाले केही शब्द मात्र भन्न सम्भव थियो ।'

तर आपत्कालीन अवतरणको पहिलो प्रयास विफल भएको जनाइएको छ । 'फ्लाइट राडार २४' वेबसाइटले विमान उडेको करिब आधा घण्टामा आपत्कालीन अवतरण गरिएको जनाएको बीबीसीले उल्लेख गरेको छ ।

सामाजिक सञ्जालमा सार्वजनिक दृश्यहरूमा आगो लागिरहेको विमानको आपत्कालीन द्वारबाट यात्रुहरू निस्कँदै दौडिरहेको देखिन्छ । यभ्दोकिमोभले विमानमा इन्धन भरी रहेकाले अवतरणका क्रममा आगो तीव्र भएको जनाए ।

रूसी स्वास्थ्य मन्त्रालयका अनुसार अस्पताल भर्ना गरिएका ९ मध्ये ३ अवस्था गम्भीर छ । एक प्रत्यक्षदर्शीले ७८ यात्रु रहेको जेट विमानबाट मानिस निस्किएरभाग्न सक्नु आफैंमा 'चमत्कार' भएको बताए ।

एक यात्रु मिखाइल सेभचेन्कोले धावनमार्गमा विमानलाई आगोको लप्काले छोप्दै गर्दा आफू विमानबाट हाम फाल्न सफल भएको बताए । उनले जलिरहेको विमानबाट यात्रुहरू दौडेर भागिरहेको भिडियो पोस्ट गर्दै आफू सकुशल रहेको जनाएका छन् ।

प्रत्यक्षदर्शी प्याटि्रक होर्लचरले आगोको लप्काले विमान जलिरहेको दृष्य निकै भयानाक रहेको बताए । गायक क्रिस्तियान कोस्तोफले घटना प्रत्यक्ष रूपमा देखेको सामाजिक सञ्जालमा उल्लेख गर्दै विमानस्थलमा मानिस डरले कापेको जनाए ।
रूसी राष्ट्रिय ध्वजावाहक एरोफ्लोटले विज्ञप्तिमार्फत प्राविधिक त्रुटिपछि जहाज विमानस्थलमा फर्किन बाध्य भएको बताएको छ । उसका अनुसार आपत्कालीन अवतरणपछि मात्र जहाजमा आगो लागेको हो ।

चालक दलले यात्रुलाई जोगाउन सबै प्रयास गरेको दाबी गर्दै एरोफ्लोटले एक मिनेटभन्दा कम समयभित्रै सबै याुत्रलाई विमानबाट बाहिर निकालिएको जनाएको छ ।

रूसी राष्ट्रपति भ्लादिमिर पुटिनले दुर्घटनाका पीडितका परिवारजनप्रति गहिरो समवेदना प्रकट गरेका छन् । अधिकारीहरूले घटनाको वस्तुस्थितिबारे राष्ट्रपतिलाई अवगत गराइएको र थप अनुसन्धान जारी रहेको उल्लेख गरेका छन् ।

प्रकाशित : वैशाख २४, २०७६ ०८:४०
प्रतिक्रिया
पठाउनुहोस्

मानिसकै कारण १० लाख प्रजाति संकटमा 

एपी

पेरिस — मानिसका विभिन्न क्रियाकलापका कारण मानव इतिहासकै बढी अर्थात् १० लाखभन्दा बढी प्रजातिका जीवजन्तु तथा रूखविरुवा संकटमा परेका छन् । तर तत्काल कदम चालेको खण्डमा संकटमा परेका त्यस्ता प्रजातिको सरक्षण गर्न सकिने जलवायु विविधतासम्बन्धी सोमबार सार्वजनिक संयुक्त राष्ट्रसंघीय विस्तृत प्रतिवेदनले उल्लेख गरेको छ । 

'हामीले नाटकीय रूपमा ग्रहमा जीवनको पुनर्निर्माण गरेका छौं,' अमेरिकाको इन्डियाना विश्वविद्यालयका एडुआर्डो ब्रोन्डिजियोले पत्रकार सम्मेलनमा भने । उनले प्रजातिहरूको संकट विगतमा भन्दा दसौं वा सयौं गुणासम्म बढेको बताए । ब्रोन्डिजियोका अनुसार पृथ्वीमा रहेका ५ लाखभन्दा बढी प्रजातिहरूले आफ्नो जीविकाका लागि बासस्थान बनाउन पर्याप्त जमिन पाएका छैनन् ।

'मानिसले अञ्जानमै पृथ्वी र आफ्नो भविष्यको नै घाँटी थिचिरहेका छन्,' जर्ज मासन विश्वविद्यालयका जीवविज्ञ थोमस लभजोयले भने । उनले पृथ्वीको जैविक विविधता क्रमशः विनाश भइरहेको बताउँदै यसलाई जोगाउने हामीसँग अन्तिम विकल्प भएको दाबी गरे ।

एक हजार पृष्ठभन्दा लामो प्रतिवेदन सार्वजनिक गर्न संसारका संरक्षण वैज्ञानिकहरू पेरिसमा भेला भएका थिए । इन्टर गभर्नमेन्टल साइन्स पोलिसी प्ल्याटर्फम अन बायोडाइभर्सिटी एन्ड इकोसिस्टक सर्भिसेज (आईपीबीईएस) का लागि ४ सय ५० अनुसन्धानका आधारमा प्रतिवेनद तयार पारिएको हो । प्रतिवेन १०९ देशका प्रतिनिधिले पारित गर्नुपर्नेछ ।

प्रतिवेदनमा उल्लेख नतिजाले जीवजन्तु वा रुखबिरुवा जोगाउनुपर्ने मात्र नभई मानिसको जीवनयापनका लागि आवश्यक पर्ने अन्य वस्तुको संरक्षण गर्नसमेत सुझाव दिएको छ । 'हाम्रा लागि वास्तवमाखाद्यान्न तथा पानीको सुरक्षा, मानव स्वास्थ्य लगायतका संकट बढिरहेका छन्,' बेलायती वैज्ञानिक रोबर्ट वाट्सनले भने ।

प्रतिवेदनले मानिसका कार्यले ५० वर्षयताकै गहिरो संकट निम्तिएको हो । सन् १९७० को तुलनामा संसारको जनसंख्या हाल दोब्बर भएको छ भने विश्व अर्थतन्त्र ४ गुणा बढेको छ । त्यसैगरी अन्तर्राष्ट्रिय व्यापार १० गुणाले बढेको छ ।

हाल विश्वमा रहेका मानिसका लागि खाद्यान्न, लत्ताकपडा र उर्जाको व्यवस्था गर्न जंगल तीव्र रूपमा फँडानी गरिएको छ । सन् १९८० र २००० बीचमादक्षिण अमेरिका र दक्षिण-पूर्वी एसियामा १० करोड हेक्टर जंगल फाँडिएको छ ।

त्यसैगरी, सीमसार क्षेत्र हाल १३ प्रतिशतमा सीमित भएको छ भने सहरीकरण सन् १९९२ को तुलनामा दोब्बर वृद्धि भएको छ । प्रतिवेदनअनुसार मानिसका यी सब क्रियाकलापका अनुसार विभिन्न प्रजाति विगतको तुलनामा ठूलो संकटमा परेका हुन् । विश्वव्यापी मूल्यांकनअनुसार २५ प्रतिशत जीवजन्तु र रुखबिरुवा जोखिममा छन् । सन् २०१४ मा ३ प्रतिशत समुद्र मात्र मानव दबाबमुक्त छ । माछा हालसम्मकै जोखिमको अवस्थामा छन् भने प्रदूषण तीव्र रूपमा बढिरहेको छ ।

यस्तो क्रम कम्तीमा सन् २०५० सम्मै जारी रहने अनुमान प्रतिवेदनले गरेको छ । प्रतिवेदनमा सरकारहरूले के गर्ने भन्ने प्रस्ट उल्लेख नगरिए पनि जैविक विविधतामाथि नकारात्मक प्रभाव पार्ने कार्य नगर्न संकेत दिएको छ । त्यसका लागि सरकारले मात्रनभई व्यक्तिले पनि जैविक विविधताप्रति सचेत हुनुपर्ने प्रतिवेदनले सुझाएको छ ।

प्रकाशित : वैशाख २४, २०७६ ०८:३९
पूरा पढ्नुहोस्
प्रतिक्रिया
पठाउनुहोस्