न्युजिल्याण्डका दुई मस्जिदमा बन्दुकधारीद्वारा आक्रमण, ४९ जनाको हत्या

नारायण खड्का

अष्ट्रेलिया — न्युजिल्याण्डको क्राईस्टचर्चको दुई मस्जिदमा बन्दुकधारीहरुले अन्धाधुन्ध गोली हानी ४९ जनाको हत्या गरेका छन् । घटनामा घाइते भएका ४८ जनाको क्राइष्टचर्च अस्पतालमा उपचार भइरहेको र २० जनाको अवस्था गम्भिर रहेको प्रहरीले जनाएको छ ।

घटनामा संलग्न एक अष्ट्रेलियाली नागरिकसहित तीन पुरुष र एक महिलालाई पक्राउ गरिएको न्युजिल्याड प्रहरीले जनाएको छ ।

न्युजिल्याण्डको पर्यटकीय शहर मानिने क्राईस्टचर्चमा रहेको दुई छुट्टछुट्टै मस्दिजमा शुक्रबारको नमाज पढिरहेका सयौं मुस्लिम धर्मावलम्बीहरुमाथि जथाभावी गोली प्रहार गरिएको थियो । न्युजिल्याण्डको स्थानीय समय अनुसार १ बजेर ४५ मिनेटमा क्राइष्टचर्चको सिटी सेन्टरमा रहेको अल नुर मस्जिदमा अत्याधुनिक हतियारधारी आक्रमणकारीले जथाभावी गोली प्रहार गरेका थिए ।

उक्त गोली प्रहारमा ४१ जनाले ज्यान गुमाएका थिए । त्यसैगरि नजिकै रहेको लिनउडमा रहेको अर्काे मस्जिदमा करिब १० मिनेटपछि गोली प्रहार गरि ७ जनाको हत्या गरिएको थियो । एक ब्यक्तिको अस्पतालमा उपचारको क्रममा मृत्यु भएको हो ।

घटनामा संलग्न एक महिलासहित चारजनालाई न्युजिल्याण्ड प्रहरीले पक्राउ गरेको छ । प्रहरीद्वारा पक्राउ परेका एक अष्ट्रेलियाका नागरिक समेत रहेको प्रहरीले बताएको छ । आक्रमणकारीले आक्रमणको सामाजिक सञ्जालमा प्रत्यक्ष प्रसारण गरेका थिए । बन्दुकधारी सेनाले लगाउने जस्तो पोशाक लगाएर मस्जिदमा छिरेको र जथाभावी गोली चलाएको प्रत्यक्षदर्शीहरुले बताएका छन् । बन्दुकधारीले अत्याधुनिक तथा अटोमेटिक हतियार प्रयोग गरेको प्रत्यक्षदर्शीहरुलाई उद्धृत गर्दै सञ्चारमाध्यमहरुले जनाएका छन् ।
आक्रमणको जानकारी पाएपछि प्रहरीले आसपासका विद्यालय, पसल तथा स्थानीय क्षेत्रलाई निषेधित क्षेत्र घोषणा गरेको थियो । यसैगरि विष्फोटक पदार्थ राखिएका कारहरुलाई प्रहरीको विशेष टोलीले निष्त्रिmय पारेको थियो । न्युजिल्याण्डको एक टेलिभिजनलाई घटनाका प्रत्यक्षदर्शीहरुले ६ मिनेटभन्दा लामो समयसम्म बन्दुकधारीले अत्याधुनिक हतियारद्वारा जथाभावी गोली चलाएको बताए ।

उनले मस्जिदमा सबै प्रार्थना गरिरहेको शून्य समयमा बन्दुकधारी पसेर अन्धाधुन्ध गोली प्रहार गरेको सुनाए । घटनामा परेका सर्वसाधारणहरुले बन्दुकधारीबाट ज्यान बचाउन मस्जिदको पछिल्लो ढोका तथा झ्याल फुटाएर भागेका थिए भने कोही शौचालमा लुकेको सञ्चारमाध्यमहरुलाई बताएका छन् ।

उक्त मस्जिदमा न्युजिल्याण्डसँग टेस्ट खेल खेल्न आएका बंगलादेशका राष्ट्रिय टोलीका सदस्यहरु समेत नमाज पढ्न आएका थिए तर उनीहरु सबै सुरक्षित रहेको सञ्चारमाध्यमहरुले जनाएका छन् । घटनापछि न्युजिल्याण्ड र बंगलादेशबीच शनिबार हुने भनिएको टेस्ट क्रिकेट समेत स्थगित गरिएको छ । घटनापछि न्युजिल्याण्डले आतंकवादी सुरक्षाको प्रक्रियालाई न्यूनबाट उच्च सर्तकतामा बृद्धि गरेको छ । यसैगरी क्राईष्टचर्चको एयरपोर्टमा समेत सुरक्षा सर्तकता बढाएको छ ।

न्युजिल्याण्डका प्रधानमन्त्री जसिन्था आर्डेनले घटनालाई आतंककारी आक्रमणको संज्ञा दिदै यो दिन न्युजिल्याण्डको लागि कालो दिन भएको प्रतिक्रिया दिएकी छिन् । उनले यस्तो कायर आक्रमणले न्युजिल्याण्डबासीलाई हतोत्साही गर्न नसक्ने बताएकी छिन् । घटनाको बारेमा सञ्चारमाध्यमहरुलाई जानकारी दिदैं घटनाबाट भावुक बनेकी प्रधानमन्त्री आर्डेनले न्युजिल्याण्ड सबैको घर भएको बताउँदै यस्ता सोच तथा घटनालाई सम्पुर्ण न्युजिल्याण्डवासीहरुले अस्वीकार गर्ने बताएकी छन् । अष्ट्रेलियाका प्रधानमन्त्री स्कट मरिसनले आक्रमणकारी अतिवादी आतंककारी भएको बताउँदै यो समयमा सम्पूर्ण अष्ट्रेयिाली न्युजिल्याण्डको साथमा रहेको बताएका छन् ।

घटनास्थलमा रहेका नेपालीहरुले समेत घटना अत्यासलाग्दो भएको बताए । क्राइष्टचर्चमै रहेको युनिभर्सिटी अफ ओट्टागोमा रिसर्च गर्ने भुवनेश्वर ढकालले आफू ५ मिनेटको दूरीमा रहेको र घटना अकल्पनीय भएको बताए । सुरक्षाकर्मीहरुले जारी गरेको निषेधित क्षेत्रमा घरभित्रै रहेका एनआरएन न्युजिल्याण्डका कार्यवाहक अध्यक्ष घनश्याम सापकोटाले घटना भएको क्षेत्र आसपासमा करिब दुई दर्जन नेपाली परिवार बस्दै आएको जानकारी दिदैं कुनै पनि नेपाली घटनाबाट प्रभावित नभएको बताए ।

उनले घटना अत्यन्तै निन्दनीय भएको बताउँदै पीडितहरुलाई सहयोग पुरयाउन आफूहरुले पहल गरिसकेको समेत बताए । न्युजिल्याण्ड समेत हेर्ने अष्ट्रेलियास्थित नेपाली दूतावासकी कार्यवाहक राजदूत दु्रपदा सापकोटाले घटनामा नेपाली हताहत नभएको जानकारी दिईन् ।

प्रकाशित : चैत्र १, २०७५ १०:३५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

आधा दर्जन मन्त्रीद्वारा राजनीतिबाट सन्यासको घोषणा 

नारायण खड्का

अस्ट्रेलिया — अस्ट्रेलियाका आधा दर्जन मन्त्रीहरूले राजनीतिबाट सन्यास लिने घोषणा गरेका छन् । राष्ट्रिय निर्वाचन नजिकिँदै गर्दा आएको उच्च नेताहरूको यो निर्णयले सत्तारुढ दललाई आगामी निर्वाचन जित्न कठिनाइ हुनसक्ने विश्लेषण गरिएको छ । 

सत्तारुढ दल लिबरलबाट अहिलेसम्म सुरक्षामन्त्री त्रिष्टोफर पाइन, महिलामन्त्री केली ओड्वायर, इण्डिजिनस मन्त्री नाइजल स्कलियन, मानव संसाधन मन्त्री माइकल किनन र सुरक्षा उद्योगमन्त्री स्टिभ सियाबोले आगामी निर्वाचनमा पुनः उम्मेदवार नहुने घोषणा गरिसकेका छन् । उनीहरूले आफ्नो परिवार र समुदायलाई अझ समय दिनका लागि भन्दै राजनीतिबाट सन्यास लिने घोषणा गरेका हुन् ।

राजीनामा दिएका सबै मन्त्रीहरू एक दशकदेखि सत्तारुढ दलबाट बलियो पकड बनाएका राजनीतिकर्मी मानिन्छन् । उनीहरूको यो घोषणाले लामो समयदेखि जित्दै आएको चुनावी क्षेत्रमा पुनः जित हासिल गर्न कठिनाइ हुनेसक्ने अस्टेलियाली सञ्चारमाध्यमहरूले जनाएका छन् ।

यसैगरी लामो समयसम्म लिबरल पार्टीमा राम्रो पकड जमाएकी पूर्व विदेशमन्त्री जुलि बिशपले समेत राजनीतिबाट सन्यास लिएकी छन् । उनले आफूले निर्वाचन लड्दै आएको पर्थको निर्वाचन क्षेत्रबाट पुन: उम्मेदवार नहुने बताएकी छन् । उनी विदेशमन्त्री भएकै समयमा लिबरल पार्टीभित्र प्रधानमन्त्री छान्ने प्रक्रियामा हार ब्योहोरेकी थिइन् । अस्ट्रेलियाको राजनीतिमा राजनीति करियर त्याग्नेमा पुरुषहरूका साथै महिलाहरूको सङ्ख्या समेत उल्लेख्य छ ।

बितेको करिब एक महिनाको अवधिमा आएको यो घोषणाले अस्ट्रेलियाली राजनीतिमा तरंग ल्याइदिएको छ । यहाँका राजनीतिक विश्लेषकहरूले युवा उमेरमै रहेका यी नेताहरूको राजनीतिक सन्यासले नयाँ पुस्ताहरूलाई अवसर दिने बताएका छन् भने केहीले अहिल्यै राजीनामा दिने समय नभएको समेत चर्चा गरेका छन् ।

तर पछिल्लो समयमा राजीनामा दिएका सुरक्षामन्त्री पाईनले भने राजनीतिमा आफ्नो आवश्यता महसुस भइरहेको समयमा छोड्नु नै उपयुक्त हुने प्रतिक्रिया दिएका छन् । उनले राजनीतिमा कसैले छोडेर गए हुन्थ्यो भन्ने समय आउनुअघि नै छोड्नु राम्रो निर्णय भएको बताएका छन् ।

अस्ट्रेलियाका प्रधानमन्त्री तथा सत्तारुढ दल लिबरलका नेता स्कट मरिसनले नेताहरूको राजीनामाले आगामी निर्वाचनमा आफ्नो दलको जितलाई असर नपर्ने प्रतिक्रिया दिएका छन् ।
अस्ट्रेलियाको राजनीतिलाई नजिकबाट बुझेका डा. भरतराज पौडेल लिबरल पार्टीभित्र आफ्नो पक्षमा पार्न शक्तिशाली पुरुष नेताहरूबाट दिइएको दबाब खप्न नसकेर महिला नेतृहरूबाट राजीनामा आएको बताउँछन् ।

यसै गरी पार्टीको जनमत खस्किँदै गएको मौकामा आफ्नो भविष्य सुरक्षित गर्न र पेसागत र सामाजिक क्षेत्रमा काम गर्ने अवसर पाउनका लागि समेत पछिल्लो समयमा प्रभावशाली नेताहरूबाट राजीनामा आएको उनको विश्लेषण छ ।

अस्ट्रेलियाली राजनीतिमा यसअघि पूर्व प्रधानमन्त्रीद्वय जुलिया गिलार्ड, केभिन रडका साथै अन्य नेताहरू जेनी म्याकलिन, निकोला रक्सन, केट एलिस, जुलिया बैंक्स लगायतले पनि राजनीतिबाट सन्यास लिइसकेका छन् । यहाँ राजनीतिबाट सन्यास लिने अधिकांश नेताहरू युवा अवस्थाका छन् ।

प्रकाशित : फाल्गुन २७, २०७५ १६:१८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×