गुआइडोलाई देश छाड्न प्रतिबन्ध

भेनेजुएला संकट
रोयटर्स

काराकास — भेनेजुएलाको सर्वोच्च अदालतले विपक्षी नेता खुवान गुआइडोलाई देश छाड्न र आफ्नो बैंक खाता सञ्चालन गर्न प्रतिबन्ध लगाएको छ । भनेजुएलाका विपक्षी नेता गुआइडोले गतसाता राजधानी काराकासमा आफूलाई देशको ‘अन्तरिम राष्ट्रपति’ घोषणा गरेपछि भेनेजुएलामा सत्तासंघर्ष सुरु भएको हो ।

भेनेजुएलाका विपक्षी दलका नेता खुवान गुआइडो बुधबार संसद् भवनमा । आफूलाई अन्तरिम राष्ट्रपति घोषणा गरेपछि सर्वोच्च अदालतले बुधबार देश छाड्न प्रतिबन्ध गरेको छ । तस्बिर : रोयटर्स

उनलाई अमेरिका लगायतका २० भन्दा बढी राष्ट्रले समर्थन जनाएका छन् । रूस, चीन तथा अन्य केही देश भने राष्ट्रपति निकोलस मडुरोको पक्षमा छन् ।


महान्यायाधिवक्ता तारेक विलियम शाबले गुआइडोमाथि प्रतिबन्धको आहान गरेका गर्दै मुद्दा दायर गरेका थिए । मुद्दाको फैसलाका क्रममा सर्वोच्च अदालतले उक्त निर्णय सुनाएको बीबीसीले जनाएको छ ।


शाबले विपक्षी नेता गुआइडोमाथि लगाउनुपर्ने प्रतिबन्ध माग गरेलगत्तै मडुरोको पक्षमा रहेको सर्वोच्च अदालतले त्यसलाई अनुमोदन गरेको हो । ‘विपक्षी नेता गुआइडोले देशमा शान्ति र सुव्यवस्थामा खलल पुर्‍याएकाले पछिल्लो अवस्थाबारे प्रारम्भिक अनुसन्धान पूर्ण नहुन्जेल देश छाड्न नपाउने’ आदलेश दिइएको हो ।


विपक्षी नेता गुआइडोले संसद्मा पत्रकारसँग ‘अदालतको निर्णय नयाँ नभएको’ प्रतिक्रिया दिए । गुआइडोमाथि प्रतिबन्धका समाचार सार्वजनिक भएलगत्तै अमेरिकी राष्ट्रिय सुरक्षा सल्लाहकार जोन बोल्टनले भेनेजुएलाका शाब पूर्व महान्याधिवक्त भएको बताउँदै गुआइडोमाथि कुनै पनि हानि गरे गम्भीर परिणाम भोग्न तयार रहन चेतावनी दिए ।


मडुरोले राजनीतिक संकट अन्त्यका लागि विपक्षीहरूसँग वार्ताका लागि तयार भएको जनाइएको छ । ‘भेनेजुएलाको भलाइका लागि राम्रो हुन्छ भने म विपक्षीसँग वार्ताको टेबुलमा बस्न तयार छु,’ मडुरोले भने । तर उनले आफ्नो राष्ट्रपतीय कार्यकाल नसकी देशमा चुनाव नहुने प्रस्ट पारेका छन् ।

गत शनिबार युरोपेली संघले मडुरोलाई राष्ट्रपतीय चुनावको मिति एक साताभित्र नतोके मडुरोलाई समर्थन जनाउने चेतावनी दिएको थियो । विपक्षी दलले बुधबार मडुरोलाई सत्ता त्यागको माग गर्दै राजधानीमा दुई घण्टा लामो शान्तिपूर्ण विरोध गरेको छ ।


दक्षिण तथा उत्तर अमेरिकी देशको समूहले तत्काल कुनै पनि सैन्य हस्तक्षेप स्वीकार्य नहुने बताएका छन् । पेरूका विदेशमन्त्री नेस्टर पोपोलिजियोले भेनेजुएलामा जारी संकट शान्तिपूर्ण रूपमा अन्त्य गर्न सन् २०१७ मा बनेको क्यानडासहित १४ देशहरूको समूह लिमाले सैन्य हस्तक्षेपको विरोध गर्ने बताए ।


निर्वाचित राष्ट्रपति मडुरोले राष्ट्रपतिको दोस्रो कार्यकाल सुरु गरेको २ सातामै प्रतिपक्षी नेताले आफूलाई अन्तरिम राष्ट्रपति घोषणा गरेका हुन् ।


विद्यार्थी राजनीतिबाट उदाएका गुआइडोले पूर्वराष्ट्रपति हयुगो चाभेजले मडुरोलाई उत्तराधिकारी बनाउँदा विरोध गरेका थिए । मडुरो सन् २०१३ पहिलो कार्यकालका लागि भेनेजुएलाको राष्ट्रपति निर्वाचित भएका थिए ।


तर उनको कार्यकालमा भेनेजुएलाको अर्थतन्त्र धराशायी भएपछि जनताहरू उनीसँग असन्तृष्ट छन् । राष्ट्रसंघका अनुसार मुद्रास्फीति, ऊर्जा समस्या र खाद्य सामग्रीको अभावका कारण विगत ३ वर्षमा २० लाखभन्दा बढी मानिसले भेनेजुएला छाडिसेका छन् ।


प्रकाशित : माघ १७, २०७५ ०८:५८

प्रतिक्रिया
पठाउनुहोस्

विवाद टुंग्याउने चीन–अमेरिकी प्रयास 

एएफपी

वासिङ्टन — अमेरिका र चीनबीच दोस्रो चरणको व्यापार वार्ता बुधबार वासिङ्टनमा सुरु भएको छ । अमेरिकाले चिनियाँ  दूरसञ्चार कम्पनी हुवावेविरुद्ध दुई दर्जनभन्दा बढी फौजदारी अभियोग लगाएपछि उत्पन्न गतिरोधबीच वार्ता सुरु भएको छ । 

अमेरिकी राष्ट्रपति कार्यालयमा बुधबार वार्ताका क्रममा अमेरिकी र चिनियाँ टोली । तस्बिर : रोयटर्स


विश्वका दुई ठूला अर्थतन्त्र अमेरिका र चीनबीच उच्च प्रविधि उद्योगको भविष्यबारे संघर्ष रहेको अमेरिकी प्रतिनिधि रोबर्ट लाइटिजरले बताए ।

दुई देशबीच जारी वार्तामा उनी अमेरिकी मध्यस्थकर्ता हुन् । तीन वर्षअघि बेइजिङले महत्त्वाकांक्षी ‘मेड इन चाइना–२०२५’ कार्यक्रम सार्वजनिक गरेको थियो । चीनलाई अन्तरिक्ष, रोबोटिक्स, आर्टिफिसियल इन्टेलिजेन्स, नयाँ पुस्ताको कार तथा अन्य क्षेत्रमा अग्रणी स्थानमा पुर्‍याउने कार्यक्रमको मुख्य उद्देश्य थियो । अमेरिकी अधिकारीका अनुसार यी क्षेत्रहरूमा अमेरिकी प्रविधि र खोजको मुख्य हिस्सा रहेको छ ।

अमेरिकी राष्ट्रपति डोनाल्ड ट्रम्पले पटकपटक आफू स्वस्थ चिनियाँ अर्थतन्त्रको पक्षमा रहेको बताउँदै आएका छन् । तर त्यो अमेरिकी व्यवसाय र प्रविधिको बदलामा नभएको उनको भनाइ छ ।

अमेरिकी अधिकारीहरूले विशेषगरी चिनियाँ व्यापारिक अभ्यासमाथि आक्रमण गरिरहेका छन् । उनीहरूको भनाइमा चीनको व्यापार अभ्यास अस्वस्थ छ । चीनले अमेरिकी प्रविधिको बौद्धिक चोरी गरेको अधिकारीहरूको आरोप छ ।

चीनले अमेरिकी कम्पनीलाई आफ्नो देशमा व्यवसाय गर्न चिनियाँ कम्पनीसँग साझेदारी गर्नैपर्ने बाध्यकारी अवस्था सिर्जना गर्ने गरेको छ । बेइजिङमाथि दबाब सिर्जना गर्न ह्वाइटहाउसले २ सय ५० अर्ब अमेरिकी डलर बराबरका चिनियाँ सामानमा करवृद्धि गरेको छ ।

अमेरिकी राष्ट्रपति ट्रम्पले दुई देशबीचको वार्तामा सहमति नभए आगामी मार्च २ देखि २ सय अर्ब डलर बराबरका चिनियाँ सामानमा २५ प्रतिशत कर लगाउने घोषणा गरिसकेका छन् । बेइजिङले पनि करिब १ सय १० अर्ब डलरबराबरका अमेरिकी सामानमा करवृद्धि गरिसकेको छ ।

अमेरिकी राष्ट्रपति ट्रम्प र चिनियाँ राष्ट्रपति सी चिनफिङबीच औद्योगिक राष्ट्रहरूको सम्मेलन क्रममा ब्युनर्स आयर्समा भएको बैठकमा ३ महिने व्यापार युद्धविराम गर्ने सहमति भएको थियो । उक्त सहमतिबमोजिम तीन महिनाभित्र वार्ता गरी दुई देशबीचका असमझदारी हल गर्ने र नयाँ व्यापार सम्झौता गर्ने उद्देश्यले दुवै देशका उच्च अधिकारीहरूबीच वार्ता जारी छ ।

यसअघि चीनको बेइजिङमा पहिलो चरणको प्रारम्भिक वार्ता भइसकेको छ । वार्ताका विवरणहरू भने सार्वजनिक गरिएको छैन ।

प्रकाशित : माघ १७, २०७५ ०८:५६
पूरा पढ्नुहोस्
प्रतिक्रिया
पठाउनुहोस्
×