बालिका बलात्कारकाे आरोपमा दुई जना पक्राउ- सुदूरपश्चिम - कान्तिपुर समाचार

बालिका बलात्कारकाे आरोपमा दुई जना पक्राउ

तृप्ति शाही

बैतडी — बैतडीको पुर्चौडी नगरपालिकामा १३ वर्षीया बालिकालाई बलात्कार गरेको आरोपमा प्रहरीले २ जनालाई बिहीबार पक्राउ गरेको छ ।

बालिकालाई जबर्जस्ती करणी गरेको अपराधमा बैतडीको सुर्नया गाउँपालिका–८ का अर्जुन साउद र कैलालीको गोदावरी नगरपालिका–२ का बासुदेव पन्तलाई बालिकाका आफन्तको उजुरीको आधारमा पक्राउ गरिएको पाटन इलाका प्रहरी कार्यालयका प्रहरी निरीक्षक गौरीप्रसाद जैशीले बताए ।

पक्राउ परेका दुवैजनाले घरबाटै बालिकालाई मोटरसाइकलमा सिगास गाउँपालिका–९ मा लगेर बलात्कार गरेको प्रारम्भिक अनुसन्धानबाट देखिएको प्रहरीले जनाएको छ । उनीहरु दुवै जनालाई शुक्रबार जिल्ला अदालतबाट ५ दिन म्याद थप गरी कारबाही प्रक्रिया अघि बढाइएको छ ।

प्रकाशित : भाद्र २६, २०७७ २२:०२
प्रतिक्रिया
पठाउनुहोस्

भारतका सामाजिक अभियन्ता स्वामी अग्निवेशको निधन

एजेन्सी

नयाँ दिल्ली — भारतका सामाजिक अभियन्ता स्वामी अग्निवेशको ८० वर्षको उमेरमा निधन भएको छ । 'हिन्दुस्तान टाइम्स'का अनुसार कलेजोको समस्याका कारण मंगलबार अस्पताल भर्ना गरिएका उनको शुक्रबार निधन भएको हो । 

बँधुवा मुक्ति मोर्चाका संस्थापक अग्निवेशले आर्य समाजका सिद्धान्तहरुमा आधारित राजनीतिक दल आर्यसभाको स्थापना गरेका थिए । उनको मृत्युमा कांग्रेस आईका नेता राहुल गान्धी, शशि थरुर, नोबेल शान्ति पुरस्कार विजेता सामाजिक अभियन्ता कैलाश सत्यार्थी तथा अभिनेत्री शबाना आजमीलगायतले दु:ख व्यक्त गरेका छन् ।

बँधुवा मजदुरको मुक्तिका लागि लामो समय अभियान चलाएका स्वामी अग्निवेशलाई ‘राइट लाइभ्लीहुड अवार्ड’ बाट सम्मानित गरिएको थियो । सन् १९३९ मा आन्ध्र प्रदेशमा जन्मिएका अग्निवेशले केही समय शिक्षण र वकालत पेसा पनि गरेका थिए । उनले टेलिभिजन कार्यक्रममा प्रस्तोताको भूमिका निभाउनुका साथै रियालिटी शो ‘बिग बोस’ को पाँचौँ संस्करणमा समेत सहभागी भएका थिए ।

उनले सन् १९७० मा ‘आर्यसभा’ नामक राजनीतिक दलसमेत गठन गरे । उनी संकटकालपछि हरियाणा सरकारमा मन्त्रीसमेत बनेका थिए । सन् १९८० को दशकमा भारतमा मन्दिरमा दलितहरुलाई मन्दिर प्रवेशमा लगाइएको रोकविरुद्ध उनले व्यापक अभियान नै चलाएका थिए ।

सन् २०११ मा भ्रष्टाचारविरुद्ध अन्ना हजारेले चलाएको ‘जनलोकपाल आन्दोलन’ मा समेत सहभागी भएका अग्निवेश पछि भने केही मतभेदका कारण उक्त आन्दोलनबाट बाहिरिएका थिए ।

सन् २०१८ मा भाजपासमर्थित युवा मोर्चाले ‘जय श्री राम’ को नारा लगाउँदै झारखण्डमा अग्निवेशमाथि आक्रमण गरेका थिए । झारखण्डको पाकुरमा आदिवासी समुदायले सरकारले गरेको भूमि अधिग्रहणविरुद्धको आन्दोलनमा स्वामी अग्निवेशले समर्थन गरेका थिए ।

प्रकाशित : भाद्र २६, २०७७ २१:३८
पूरा पढ्नुहोस्
प्रतिक्रिया
पठाउनुहोस्
×