कोरोना संक्रमण पुष्टि भएको भोलिपल्ट युवा मृत भेटिए, आत्महत्याको आशंका

जेठ १९ गते १६ जनाको समूहमा भारतबाट फर्किएका १८ वर्षीय शेरबहादुर राउतले शुक्रबार बिहान क्वारेन्टाइन नजिकैको जंगलमा रुखमा झुण्डिएरको अवस्थामा फेला परेका हुन् । विहीबारदेखि उनी वडा नं ७ मै रहेको लामागडा प्राथमिक विद्यालयमा रहेको क्वारेन्टाइनमा एक्लै बसेका थिए । उनीसँगै आएका १६ जनाको असार १ गते आरडीटी परीक्षण गर्दा ३ जनाको पोजिटिभ नतिजा आएको थियो । आरडीटी नेगेटिभ आएकालाई घर पठाएर राउत लगायत ३ जनाको पीसीआर परीक्षण गरिएको थियो । उनको मात्रै पोजिटिभ रिपोर्ट आएको थियो ।

'बिहान ७ बजेसम्म आफन्तसँग कुरा गरेको रहेछ', खप्तड छान्ना गाउँपालिका ७ का वडाध्यक्ष रामबहादुर सिंहले भने, 'संक्रमण भयो, अब बाँच्दैन होला भन्ने खालका निरास कुरा गरेको थियो रे ! त्यसै कारण आत्महत्या गरेको हुन सक्छ ।'

प्रमुख जिल्ला अधिकारी कमलराज भण्डारीले शव ब्यवस्थापनका लागि जिल्लाबाट चिकित्सकसहित नेपाली सेना र प्रहरी टोली घटनास्थलतर्फ पठाइएको बताए । उनको घटनास्थलमै पोस्टमार्टम गरिने भण्डारीले जानकारी दिए ।