चन्दा उठाएर पीसीआर मेसिन

सरकारले पीसीआर मेसिन थप्न ढिलाइ गरेपछि स्थानीय स्तरबाट चन्दा संकलन गरी मेसिन खरिद गर्न थालिएको छ ।
डीआर पन्त

डडेलधुरा — ह्युमनिटी फाउन्डेसनले चन्दा संकलन गरी डडेलधुरा अस्पताललाई पीसीआर मेसिन हस्तान्तरण गरेको छ । विदेशबाट समेत दाताहरूले रकम उपलब्ध गराएपछि पीसीआर मेसिनलगायत सामग्री खरिद गरिएको हो ।

धनगढीमा रहेको फाउन्डेसन र सुदूरपश्चिम अमेरिकी समाजले सामाजिक सञ्जालबाट अभियान सुरु गरेका थिए । गत जेठ २ गतेदेखि भारतबाट फर्किरहेका नेपालीलाई सीमामा निःशुल्क खाना खुवाउने अभियान सुरु गरेका धनगढीका व्यवसायी श्याम तायल, पुष्कर ओझा, मानसिंह साउँद, पत्रकार दीर्घराज उपाध्यायलगायतको नेतृत्वमा चन्दा संकलन अभियान सुरु भएको थियो ।

पीसीआर मेसिन र अन्य सामानसहित ९६ लाख लागतमा प्रयोगशाला स्थापना हुने फाउन्डेसनका अध्यक्ष श्याम तायलले बताए । ‘मेसिन मात्र ३५/४० लाखमा आउँदो रहेछ,’ उनले भने, ‘यसमा चाहिने अन्य सामग्रीसहित ९६ लाख खर्च लाग्ने भएको हो ।’ मंगलबार इन्जिनियर र प्राविधिकको टोली आएपछि मेसिन जडान सुरु गरिने डडेलधुरा अस्पताल विकास समितिका अध्यक्ष करुणाकर ओझाले बताए ।

सुदूरपश्चिमको सेती प्रादेशिक प्रयोगशाला धनगढीमा एकमात्र पीसीआर मेसिन छ । त्यहाँ दैनिक २ सयदेखि २ सय ५० स्वाब परीक्षण भइरहेको छ । परीक्षण क्षमता कम हुँदा थन्किएका स्वाब पछिल्लो साता केन्द्रीय प्रयोगशाला टेकुमा पनि पठाइएको छ । प्रदेश सरकारले पीसीआर मेसिन थप्न ढिलाइ गरेपछि स्थानीयको पहलमा चन्दा संकलन गरी मेसिन खरिद गरिएको हो ।

प्रकाशित : असार ८, २०७७ १९:२१
प्रतिक्रिया
पठाउनुहोस्

भक्तपुरको पाँचतले मन्दिर ३ सय १९ वर्षमा प्रवेश

कान्तिपुर संवाददाता

भक्तपुर — विश्वसम्पदा सूचीमा सूचीकृत भक्तपुरको पाँचतले (ङातापोल) मन्दिर ३ सय १९ वर्षमा प्रवेश गरेको छ । ३ सय १८ वर्ष पुरा भइ ३१९ प्रवेशको अवसरमा मन्दिरमा विशेष पूजा गरी गजुरमा झण्डा फहराइएको छ । 

प्रत्येक वर्ष असार शुक्ल प्रतिपदाको दिनलाई पाँचतले मन्दिर जन्मोत्सव मनाइँदै विशेष पूजा गरी मन्दिरको गजुरमा झण्डा फहराइने परम्परा छ । सेतो कपडामा रातो चन्द्र आकार भएको ठूलो झण्डा फहराइएको हो ।

कोरोना महामारीका कारण सिमित व्यक्तिको उपस्थितीमा सामान्य पूजा गरेर झण्डा फहराइएको पुजारी पदम कर्माचार्यले बताए । यसअघि पूजामा बोकाको बली दिने परम्परा रहेको थियो ।

पाँचतले मन्दिरमा राजोपाध्याय, कर्माचार्य, जोशी र ताल्चाभडेल पुजारीहरुले पूजा गर्ने परम्परा छ । मन्दिरको गजुरमा तुछिमला टोलका अवालहरुले झण्डा फहराउने गर्दछन् । मन्दिरमा झण्डा राख्‍नका लागि तुछिमलाको अवालबाहेक अरुलाई मन्दिरमाथि प्रवेश नदिने परम्परा रहेको भक्तपुर तलेजुका मूल नाइके नरेन्द्र जोशीले बताए ।

नेपाल सम्वत ८२२ राजा भूपतिन्द्र मल्लले सिद्ध अग्‍नी कोत्याहुती होम लगाएर श्री सिद्धिलक्ष्मी देवीलाई पाँचतले मन्दिरमा प्रतिस्थापना गरी झण्डा फहराइएको इतिहासमा उल्लेख छ । सोही दिनको सम्झनामा प्रत्येक वर्ष असार शुक्ल प्रतिपदाका दिनलाई पाँचतले मन्दिरको जन्मोत्सवको रुपमा झण्डा फहराइने गरिन्छ ।

२०७२ वैशाखको भूकम्पको धक्काले क्षति पुगेको पाँचतले मन्दिर जीर्णोद्धारको कार्य भइरहेको छ । भक्तपुर नगरपालिकाले जीर्णोद्धार थालेको उक्त मन्दिरको चौथो तलासम्मको कार्य सम्पन्न भइसकेको छ ।

प्रकाशित : असार ८, २०७७ १८:५१
पूरा पढ्नुहोस्
प्रतिक्रिया
पठाउनुहोस्
×