डोटीमा सुत्केरीको मृत्यु
डोटी — सुत्केरी भएको तीन दिनपछि एक महिलाको डोटीमा मृत्यु भएको छ । केआई सिंह गाउँपालिका ४ कार्कीबगरकी २६ वर्षीया नारु कार्कीको आइतबार बिहान मृत्यु भएको हो ।
कार्कीले जेठ १६ गते शल्यक्रिया मार्फत छोरी जन्माएकी थिइन् । ब्यथा लागेपछि उनलाई दुर्गामाण्डौं स्वास्थ्यचौकीले दिपायल राजपुरस्थित सुजङ्ग अस्पताल रिफर गरेको थियो । स्वास्थ्य चौकीमा ८ घण्टा लामो ब्यथामात्र लाग्दा सहज रुपमा बच्चा जन्माउन शल्यक्रियाका लागि सुजङ्ग अस्पतालमा रेफर गरिएको केआईसिंह गाउँपालिकाका स्वास्थ्य संयोजक तिल बहादुर बोहराले जानकारी दिए ।
उनको मृत्युको कारण भने थाहा हुन सकेको छैन । शुक्रबार अप्रेसन गरिएकी महिलाको शनिबारसम्म स्वास्थ्य अवस्था सामान्य रहेको थियो । जण्डिस र टाइफाइडको समस्या देखिएकी उनलाई आइबार बिहान साढे चार बजे एक्कासी वान्ता भएको अस्पतालका प्रशासन प्रमुख अर्जुन बलायरले बताए ।
स्वासमा समस्या देखिएपछि अक्सिजन तथा बाफ समेत दिइएको थियो । स्वास्थ्यमा सुधार नभएपछि उनलाई थप उपचारका लागि बाहिर पठाउने तयारी हुँदा मृत्यु भएको थियो । नवजात शिशुको स्वास्थ्य अवस्था सामान्य रहेको छ ।
प्रकाशित : जेष्ठ १८, २०७७ १७:२७