क्वारेन्टाइन व्यवस्थापनमा जुटेका वडाध्यक्षको मृत्यु

भवानी भट्ट

कञ्‍चनपुर — कञ्चनपुरको कृष्णपुर नगरपालिका वडा नम्बर ७ का अध्यक्ष कल्लु रानाको क्वारेन्टाइन व्यवस्थापनकै क्रममा मृत्यु भएको छ । मंगलबार राति सोही वडाको राष्ट्रिय माविमा क्वारेन्टाइन व्यवस्थापनकै क्रममा ५५ वर्षीय वडाध्यक्ष रानाको मृत्यु भएको प्रहरीले जनाएको छ । 

वडाध्यक्ष राना मंगलबार दिनभरि क्वारेन्टाइन व्यवस्थापनामा थिए । उक्त विद्यालयमा २० जनालाई क्वारेन्टाइनमा राखिएको छ । जिल्ला प्रहरी कार्यालय कञ्चनपुरका डीएसपी रवीन्द्र पौडेलका अनुसार साँझपख खाना खाएर क्वारेन्टाइनमा आएका उनको मोबाइल चलाउँदा चलाउँदै मृत्यु भएको हो । उनको शव धनगढीको सेती प्रादेशिक अस्पतालमा राखिएको छ ।

‘हामी दिनभरि सँगै क्वारेन्टाइनको व्यवस्थापनमा जुटेका थियौं,’ कृष्णपुर नगरपालिकाका मेयर कर्ण हमालले भने, ‘राति अचानक मृत्युको खबर आयो ।’ उनले सेती प्रादेशिक अस्पतालमा रानाको स्वाब परीक्षणको तयारी भइरहेको बताए ।

प्रकाशित : जेष्ठ १४, २०७७ १०:२१
प्रतिक्रिया
पठाउनुहोस्

रुकुम पश्चिम घटनामा २० जनाविरुद्ध जाहेरी, १२ पक्राउ

हरि गौतम

रुकुम पश्चिम — जिल्लाको चौरजहारी नगरपालिका–८ सोतीमा अन्तरजातीय सम्बन्धलाई लिएर भएको घटनामा पीडित परिवारले २० जनाविरुद्ध किटानी जाहेरी परेको छ । तीमध्ये १२ जना पक्राउ परिसकेका छन् ।

प्रहरीले वडाध्यक्ष डम्मरबहादुर मल्ल, डिल्ली मल्ल, तुलबहादुर मल्ल, प्रेमबहादुर ठकुरी, वीरबहादुर मल्ल, प्रकाशी मल्ल, सन्तोष मल्ल, मोहन पुनमगर, रमेशबहादुर मल्ल, मानबहादुर मल्ल, टोपबहादुर मल्ल र १७ वर्षीया एक किशोरीलाई पक्रेको हो । उनीहरूलाई १० दिनको म्याद थप गरी अनुसन्धान कार्य अघि बढाइएको जिल्ला प्रहरीप्रमुख प्रहरी नायब उपरीक्षक ठगबहादुर केसीले बताए । मंगलबार जिल्ला ल्याइएका उनीहरूलाई सोही दिन म्याद थप गरिएको उनले जानकारी दिए । अरू ८ जनाको खोजी भइरहेको केसीले बताए ।

जेठ १० गते शनिबार सोती पुगेका युवकहरूलाई गाउँलेले लखेटेपछि ३ जनाको मृत्यु भएको छ भने ३ जना बेपत्ता छन् । जाजरकोटको भेरी नगरपालिका–४ का नवराज विक, गणेश बुढामगर र चौरजहारी नगरपालिका–१, रुकुम पश्चिमका टीकाराम नेपालीको शव भेरी नदीमा भेटिएको थियो । त्यस्तै भेरी नगरपालिका–११ का लोकेन्द्र सुनार, गोविन्द शाही र ४ नम्वर वडाका सञ्जु विक बेपत्ता छन् ।

उनीहरूको खोजीका लागि बुधबार गोताखोर टोली परिचालन गरिएको छ । सशस्त्र प्रहरीका ३ गोताखोर र सहयोगीसहित ७ जनाको टोलीले भेरी नदीमा खोजी गरिरहेको हो । पीडित पक्षले जाजरकोट प्रहरीमा उजुरी दिएको थियो । त्यसैका आधारमा रुकुम पश्चिम प्रहरीले पक्राउ गर्ने र अनुसन्धानको काम अघि बढाएको हो ।

प्रकाशित : जेष्ठ १४, २०७७ १०:२०
पूरा पढ्नुहोस्
प्रतिक्रिया
पठाउनुहोस्
×