गौरीफन्टाबाट भित्रिए सुदूरपश्चिमका १८ हजार

अर्जुन शाह

धनगढी — कैलालीको धनगढीस्थित गौरीफन्टा नाका हुँदै पछिल्लोपटक भारतबाट सुदूरपश्चिमका ९ वटै जिल्लाका गरी १८ हजारभन्दा बढी बासिन्दा भित्रिएका छन् ।

जेठ २ देखि १३ सम्म गौरीफन्टाबाट भित्रिएका १९ हजार २ सय ९३ जनामध्ये १८ हजार १ सय ६६ जना सुदूरपश्चिमका रहेको सशस्त्र प्रहरीको धनगढीस्थित ३४ नम्बर गणको तथ्यांक छ ।

गौरीफन्टाबाट भित्रिएकाहरूमा सबैभन्दा धेरै कैलालीका ४ हजार ३ सय ५१ जना रहेको गणका एसपी कमल तिमिल्सिनाले बताए । यस्तै कञ्चनपुरका २ हजार २ सय ३४ जना छन् ।

कैलाली र कञ्चनपुरबाहेक सात पहाडी जिल्लाका ११ हजार ५ सय ८१ जना आएका छन् । पहाडी जिल्लामध्ये डोटीका सबैभन्दा धेरै ३ हजार ५ सय ३३ जना जिल्ला फर्किएका छन् । त्यसपछि क्रमशः बैतडीका २ हजार ८ सय १४, डडेलधुराका १ हजार ८ सय ५६, अछामका १ हजार २ सय ९१, बझाङका १ हजार १४, बाजुराका ८ सय ३२ र सबैभन्दा कम दार्चुलाका २ सय १५ जना छन् ।

सीमा खुला गरिएपछि पछिल्लो पटक ४९ जिल्लाका बासिन्दा गौरीफन्टाबाट भित्रिएका छन् ।

पहाडी जिल्लाकालाई सम्बन्धित स्थानीय तहले आफैं सवारीसाधन पठाएर पालिकाहरूमा लगिरहेका छन् । ‘हाम्रा सवारी चालकहरूले सुत्न नपाएको धेरै दिन भइसक्यो,’ डोटीको दिपायल सिलगढी नगरपालिकाकी प्रमुख मञ्जु मलासीले भनिन्, ‘गौरीफन्टाबाट हाम्रो पालिकाका बासिन्दालाई ल्याएर सम्बन्धित वडाका क्वारेन्टाइनमा राख्ने गरेका छौं ।’

प्रकाशित : जेष्ठ १४, २०७७ ०९:४३
प्रतिक्रिया
पठाउनुहोस्

बर्दियाको क्वारेन्टाइनमा एक जनाको मृत्यु 

कमल पन्थी

बर्दिया — गुलरियाको बबई बहुमुखी क्याम्पसमा रहेको क्वारेन्टाइनमा बसेका एक जनाको मंगलबार राति मृत्यु भएको छ । गुलरिया नगरपालिका-९ का ५५ वर्षीय पुरुषको क्वारेन्टाइनमा मृत्यु भएको स्वास्थ्य अधिकृत सुनिल पाण्डेले जानकारी दिए ।

अछाममा मजदुरी गरी फर्केका १६ जनामध्ये ती पुरुष बबई क्याम्पसको क्वारेन्टाइनमा थिए । मंगलबार राति ८ बजे उनको मृत्यु भएपछि बबई क्याम्पस सिल गरिएको छ । उनको शव जिल्ला अस्पताल गुलरियामा ल्याई स्वाब संकलन गरी पठाउने तयारी भएको स्वास्थ्य अधिकृत पाण्डेले जनाए ।

उनीसँग आएका ४ जना आधारभूत विद्यालय खैरीको क्वारेन्टाइनमा छन् । अन्य १४ जनासहित २९ जना बबई बहुमुखी क्याम्सको क्वारेन्टाइनमा छन् । मृत्युको कारण अनुसन्धान भइरहेको प्रहरीले जनाएको छ ।

प्रकाशित : जेष्ठ १४, २०७७ ०९:३०
पूरा पढ्नुहोस्
प्रतिक्रिया
पठाउनुहोस्
×