गौरीफन्टा नाकामा आइतबार पनि भीड- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

गौरीफन्टा नाकामा आइतबार पनि भीड

बुधबारदेखि दैनिक २ हजारजना नाकामा, एक सातामै आए ८ हजार २ सय
मोहन बुढाऐर

धनगढी — भारतका विभिन्‍न सहरबाट कैलालीको गौरीफन्टा नाका हुँदै आउने क्रम रोकिएको छैन । आइतबार मात्रै २ हजार ७ सयभन्दा बढी नेपाली नाकामा आइपुगेका छन् ।

जिल्ला प्रशासन कार्यालय कैलालीका सूचना अधिकारी शिवराज जोशीले बुधबारदेखि दैनिक दुई हजारभन्दा बढी नेपाली सीमा नाकामा आइरहेको बताए । ‘सीमानाका पुगेका नेपालीलाई प्रदेश र स्थानीय सरकारको समन्वयमा सम्बन्धित जिल्लामा पठाउने गरेका छौं,’ उनले भने, ‘सम्बन्धित जिल्ला तथा स्थानीय तहबाट बसको व्यवस्था गरेर पठाउने बेलासम्म नाकामै उनिहरुलाई रोकी राख्‍न गाह्रो भइसकेको छ ।’

प्रशासनको तथ्यांक अनुसार बुधबारदेखि शनिबारसम्ममा ८ हजार २ सय ७९ जना सम्बन्धित स्थानीय तहमा पठाइ सकिएको छ । जेठ २ र ३ गते ९ सय ५० जना आएकोमा बुधबार २ हजार ४ सय ९८ , बिहीबार २ हजार १४ र शनिबार १ हजार ८ सय ९९ जनालाई पठाइएको छ ।

जसमध्ये जेठ २ र ३ गते आएकाहरु र ८ गते भित्रिइएका ७ सय ७५ जनाको मात्रै नाकामा आरडीटी परीक्षण गरिएको छ । बाँकीको समान्य स्वास्थ्य जाँच गरेर पठाइएको छ । शनिबार त समान्य जाँच समेत नगरी बसमा चढेर उनीहरु घर फर्कन लागेका छन् ।


प्रकाशित : जेष्ठ ११, २०७७ १७:१४
प्रतिक्रिया
पठाउनुहोस्

बैतडीमा पाँच प्रहरीको आरडीटी रिपोर्ट पोजिटिभ

तृप्ति शाही

बैतडी — जिल्लामा कार्यरत ५ प्रहरीको आरडीटी पोजिटिभ देखिएको छ । आइतबार आरडीटी जाँच गरिएकोमा ५ जनाको पोजिटिभ देखिएको स्वास्थ्य कार्यालयका प्रमुख योगेश भट्टले बताए । उनका अनुसार १७ जनाको चेक गरिएकोमा ५ जनाको पोजिटिभ आएको हो । २२ जनाभन्दा बढीको जाँच भइरहेको उनले बताए । ५ जनामा १ जना महिला प्रहरी हुन् । 

शुक्रबार जिल्ला प्रहरी कार्यालयको थुनुवा कक्षमा रहेका एक पुरुषमा कोरोना देखिएपछि उनीसँग प्रत्यक्ष सम्पर्कमा आएका प्रहरी, अदालतका कर्मचारी, सरकारी वकिल कार्यालयका कर्मचारीसँगै संक्रमितका घरपरिवार र केही स्वास्थ्यकर्मी गरी ६८ जनाको स्वाब संकलन गरी पीसीआरका लागि धनगढी पठाइएको छ ।

पीसीआर गर्न बाँकी जोखिममा रहेका प्रहरीको आरडीटी गर्दा ५ जनामा पोजिटिभ देखिएको जिल्ला प्रहरी प्रमुख प्रहरी नायव उपरीक्षक डिल्लीनारायण पाण्डेयले पनि पुष्टि गरे । उनीहरुलाई बसपार्कमा रहेको थालीगाडा प्रहरीचौकी नजिकै टेन्टमा राख्ने व्यवस्था तयारी गरिएको छ ।

अस्पतालमा ३ वटा मात्र आइसोलेसन बेड रहेकोमा १ संक्रमित र २ शंकास्पद बिरामीलाई राखिएको छ । अस्पतालमा बेड अभावका कारण प्रहरीलाई टेन्टमा राख्‍न लागिएको उनले बताए ।


प्रकाशित : जेष्ठ ११, २०७७ १७:०८
पूरा पढ्नुहोस्
प्रतिक्रिया
पठाउनुहोस्
×