बैतडीमा नगर प्रमुख र वडा अध्यक्ष कुटिए

तृप्ति शाही

बैतडी — बैतडीमा नगर प्रमुख र वडा अध्यक्षमाथि स्थानीयले हातपात गरेका छन् । भिन्न—भिन्न पालिकाका उनीहरुलाई स्थानीय युवाहरुले कुटपिट गरेका हुन् ।

पुरचौर्डी नगरपालिकाका प्रमुख रणबहादुर कुँवर र दोगडाकेदार गाउँपालिका ७ का वडा अध्यक्ष भरत महरालाई स्थानीयले कुटपिट गरेका जिल्ला प्रहरी प्रमुख प्रहरी नायब उपरीक्षक डिल्लीनारायण पाण्डेयले बताए ।

आइतबार हुलाक कार्यालयमा कार्यरत कर्मचारी दिलबहादुर धानुक मदिरा सेवन गरेर कार्यालयमा जाँदा मेयरले केरकार गरेका थिए । त्यसपछि उनीहरुबीच विवाद भएको थियो ।

नगरप्रमुखमाथि धानुकले अभद्र व्यवहार गरेको भन्दै प्रहरीले प्रक्राउ समेत गरेको थियो । धानुकका दुई छोरा र एक स्थानीयले नगरप्रमुख आफैंले आफ्नो बुवालाई कुटेको र आफैं अभद्र व्यवहारमा मुद्दा दर्ता गरेको भन्दै सोमबार अपरान्ह कार्यकक्षमै गएर नगरप्रमुखलाई हातपात गरेका हुन् । साथै उनीहरुले कार्यकक्षमा पनि क्षति पुर्याएका छन् । कम्प्युटर, ल्यापटप र कुर्सीटेबुल समेत उनीहरुले तोडफोड गरेका छन् ।

यता दोगडाकेदार गाउँपालिका ७ का वडा अध्यक्ष भरत महरा सोमबार वडा नम्बर ३ को सिल्लेगडा बजारमा सवारीसाधन चलाउन लागेका युवाहरुलाई लकडाउनमा यस्तो नगर्न आग्रह गर्दा कुटिएका प्ररीले जनाएको छ । उनीलाई ४ जना स्थानीय युवाहरुको समूहले कुटपीट गरेको हो ।

उनलाई थप उपचारको लागि प्राथमिक स्वास्थ्य केन्द्र पाटन बैतडीले धनगढी रिफर गरेको प्रहरी प्रमुख पाण्डेयले बताए । उनको छातीमा चोट लागेको छ । नगरप्रमुख कुँवरको अवस्था भने सामान्य रहेको छ ।

नगरप्रमुखमाथि हातपात गर्ने र कार्यकक्ष तोडफोड गर्ने ३ जनालाई प्रहरीले फक्राउ गरिसकेको उनले बताए । रमेश धानुक , पुस्कर धानुक र चन्द्र भण्डारीलाई अभद्र व्यवहारको आरोपमा पक्राउ गरि कुटपिट गर्ने ४ जना कृष्ण जोशी , हरि जोशी , नरिनराज जोशी र राजिब धामीलाई प्रहरीले पक्राउ गरेको हो । उनीहरु सबैमाथि प्रहरीले अनुसन्धान जारी राखेको उनले बताए ।

यस्तै पुरचौर्डी नगरपालिकामा थप सुरक्षाकर्मी परिचालन गरिएको छ । नेपाल प्रहरीका २ जना प्रहरी निरीक्षक किसन चन्द र धनदेव साउदको नेतृत्वमा प्रहरी परीचालन गरिएको उनले बताए । लगातार २ दिन भएका घट्ना पछि फेरि अप्रिय घट्ना नहोस् भन्नको लागि प्रदेश प्रहरी कार्यालय डोटीको दिपायल बाट र सशस्त्र प्रहरी बल गुल्म नम्बर ५१ बैतडीबाट पनि टोली खटिएको छ ।

प्रकाशित : जेष्ठ ६, २०७७ १७:२६
प्रतिक्रिया
पठाउनुहोस्
ADVERTISEMENT
ADVERTISEMENT

घर जान पाउनु पर्ने भन्दै आन्दोलनमा उत्रिए भारतीय मजदुर

दुर्गालाल केसी

दाङ — घर जान पाउनुपर्ने माग गर्दै भारतीय इँटा मजदुर आन्दोलनमा उत्रिएका छन् । लकडाउन भएदेखि कामविहीन बनेर इँटा उद्योगमा बसिरहेका मजदुरहरुले मंगलबार घोराहीमा प्रदर्शन गरेका हुन् ।पटक-पटक अनुरोध गर्दा पनि घर जान नपाएपछि आन्दोलन गर्नु परेको मजदुरहरुले बताएका छन् ।

‘मोदी सरकार, हामीलाई घर लैजाऊ नत्र यहीं गोली मार्देऊ’ भन्ने प्लेकार्ड बोकेका सयौं मजदुरहरुले विभिन्न इँटा उद्योगसहित घोराही उपमहानगरपालिका १० नारायणपुरमा प्रदर्शन गरेका थिए ।

जिल्लामा रहेका २६ इँटा उद्योगमा अहिले ६ हजार ५ सय भारतीय मजदुर रहेका इँटा व्यवसायी समितिका जिल्ला अध्यक्ष रोम वलीले बताए । ‘लकडाउन भएदेखि मजदुरहरु खाली बसिरहेका छन् । घर जान पटक-पटक प्रयास गर्दा पनि पाएनन्,’उनले भने,‘धेरैपटक बाटोबाट फर्काइए । अहिले यहाँ खानबस्न समस्या भएको छ । उता उनीहरुका परिवारको पनि बिचल्ली भएको छ ।’

अहिले इँटाको सिजन सकिएकाले मजदुरहरुलाई राखिरहन कठिन भएको उनले बताए । जिल्ला प्रशासन कार्यालयमा पटक-पटक छलफल गर्दा पनि भारतीय मजदुरलाई घर पठाउनेबारे कुनै गम्भिरता नभएको वलीले बताए । उनका अनुसार हजारौं मजदुरहरु असुरक्षित तरिकाले इँटाभट्टामा बसिरहेका छन् । ‘अहिले कामको सिजन पनि छैन । अहिले इँटाको काम नै छैन । बिनाकाम के खाएर बस्ने ?,’ उनले भने,‘सरकारले छिटो पहल गरी उनीहरुलाई भारत पठाउनुपर्छ । नत्र उनीहरुलाई ठूलो संकट पर्दैछ ।’

दुई देशको मामिला भएकाले जिल्लाबाट केही गर्न नसकिएको प्रमुख जिल्ला अधिकारी गोविन्दप्रसाद रिजालले बताए । ‘यसअघि गएका मजदुरहरु सीमा पार गर्न पाएका छैनन् । भौवा नाकामा पुगेका २६ जना अलपत्र छन्,’उनले भने,‘भारतले उता पस्न नदिएपछि हामीले यहाँबाट के गर्नु ? उता जान दिएमा हामी पठाउन तयार छौं ।’ बाटोमा अलपत्र पर्ने भएकाले पठाउने केही उपाय नभएको रिजालले बताए ।

यसअघि बसेको जिल्ला कोरोना संकट व्यवस्थापन केन्द्रको बैठकले इँटा उद्योगमा रहेका मजदुरलाई उद्योगले खानबस्न व्यवस्था गर्नुपर्ने निर्णय गरेको थियो । निर्णयअनुसार आजसम्म खानेबस्ने व्यवस्था गरे पनि लामो समयसम्म व्यवस्थापन गर्न कठिन भएको व्यवसायीहरुको भनाइ छ । यसअघि उद्योगहरुले जिल्लामा समन्वय गरी मजदुरहरुलाई पठाउन खोजे पनि पूर्वपश्चिम राजमार्गअन्तर्गत बाँके प्रवेशद्वार अमिलियाबाट फर्काइएका थिए । पैदल हिँड्दै गएका मजदुरहरु पनि नाकाबाट फर्काइएका छन् । धेरैपटक प्रयास गर्दा पनि घर जान नपाएपछि उनीहरु आन्दोलनमा उत्रिएका छन् ।

प्रकाशित : जेष्ठ ६, २०७७ १७:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×