आरडीटी पोजिटिभ देखिएका दुवैको पीसीआर रिपोर्ट नेगेटिभ

भीमदत्त नगरपालिकाले किटद्वारा परीक्षण गर्दा एक सुरक्षाकर्मी र नगरपालिकाकै एक कर्मचारीमा एन्टीबडी पोजिटिभ देखिएको थियो । तत्पश्चात स्वाव संकलन गरी परीक्षणका लागि धनगढी पठाइएको हो ।

‘दुवैजनाको रिपोर्ट नेगेटिभ रहेको मौखिक जानकारी आएको छ,’ महाकाली अस्पतालका डा. सरोज आचार्यले भने, ‘लिखित जानकारी भने आउन बाँकी छ ।’ उनका अनुसार दुवैजना अस्पतालको आइसोलेसनमै छन् । लिखित रिपोर्ट आएपछि मात्रै उनीहरुलाई घर पठाइने डा. आचार्यले बताए ।

भीमदत्त नगरपालिकाले किटद्वारा परीक्षण गर्दा सुरक्षाकर्मीको बिहीबार र नगरपालिकाकै कर्मचारीको शुक्रबार एन्टिबडी पोजिटिभ देखिएको थियो । रिपोर्ट पोजिटिभ देखिने बितिक्कै उनीहरुलाई आइसोलेसनमा राखेर स्वाब संकलन गरी पीसीआर परीक्षणका लागि धनगढी पठाइएको थियो ।