सीमामा अलपत्रहरूलाई यथास्थानमा क्वारेन्टाइन
धनगढी — लकडाउनपछि देश फर्कन नपाएका नेपाली र भारतीयलाई दुवैतर्फका सीमा सुरक्षा बल तथा स्थानीय प्रशासनले आआफ्नै भूमिमा क्वारेन्टाइनमा राखेका छन् ।
नेपालमा रोकिएका भारतीय मजदुरलाई मंगलबारदेखि धनगढीस्थित त्रिनगर माविमा व्यवस्था गरिएको क्वारेन्टाइनमा राखिएको छ ।
धनगढी उपमहानगर, जिल्ला प्रशासन कार्यालय र सशस्त्र प्रहरीको समन्वयमा डडेलधुरा र कैलालीलगायत जिल्लामा काम गर्दै आएका २० कामदारलाई व्यवस्थापन गरिएको हो । उनीहरूलाई सीमा–नाकाबाट फर्काएर त्रिनगरमा क्वारेन्टाइनमा राखिएको धनगढीस्थित सशस्त्र प्रहरीको गण नम्बर ३४ का गणपति एसपी कमल तिमिल्सिनाले बताए ।
त्यस्तै कैलालीको सीमा क्षेत्रमा अलपत्र परेका ६० नेपालीलाई भारतीय सीमा सुरक्षा बलले पलियामा क्वारेन्टाइनमा राखेको उनले जानकारी दिए । ‘दुवैतर्फका सीमा सुरक्षा अधिकारीको समन्वयमा आआफ्नै ठाउँमा क्वारेन्टाइनमा राख्ने सल्लाह भएको हो,’ उनले भने ।
