भारतबाट नेपाल फर्किन लागेकालाई कञ्चनपुरको दशगजामै रोकियो 

भवानी भट्ट

कञ्चनपुर — भारतबाट नेपाल फर्किन लागेका नेपालीहरु सोमबार बिहानदेखि दशगजामा रोकिएका छन् । बिहानै नाकामा पुगेका उनीहरुलाई नेपाल प्रवेशमा रोक लगाइएको हो । उनीहरुलाई खाना र बासको व्यवस्था दशगजामै गरिएको छ । 

कञ्चनपुरको महाकाली नगरपालिका १ पशुपति टोल नजिकै ५५ जना र भीमदत्त नगरपालिका ९ को बादी वस्ती नजिकै १८ जना नेपालीहरु दशगजामै रहेका छन् । ‘हामीले दशगजामै पुगेर खाना खुवाइरहेका छौं । उनीहरुको बास पनि त्यहि छ’ महाकाली नगरपालिका १ का अध्यक्ष अर्जुनदत्त भट्टले भने, ‘दिनको घाम र रातिको चिसोले उनीहरु बिरामी हुन थालेका छन् ।’ उनका अनुसार भारतबाट उनीहरु कतै पैदल, कतै गाडीमा दुई/तीन दिन लगाएर दशगजासम्म आइपुगेका हुन् ।

‘ब्रहृमदेव नाकाबाट आएका सबैलाई दशगजामै रोकेका छौं’ भीमदत्त नगरपालिका ९ का अध्यक्ष राम नाथले भने, ‘दाल चामल दिएपछि उनीहरुले त्यॅही खाना बनाएर खाए ।’ सोमबार बिहानैदेखि नाकामा रोकिएका १८ जनालाई टनकपुर पुल छेउमै राखिएको छ । उनीहरु केलाली र कञ्चनपुरकै वासिन्दा रहेको नाथले बताए ।


आइतबारसम्म नाकामा पुगेका सबैलाई स्थानीय प्रशासनले भित्र्याएर सम्बन्धित जिल्लातर्फ पठाएको थियो । तर सोमबारबाट भने कडाइ गरिएको छ । उनीहरुलाई भारततर्फ क्वारेन्टाइनमा बस्नुपर्ने भन्दै नेपाल प्रवेशमा रोक लगाइएको वडाध्यक्ष भट्टले बताए । ‘१४/१५ दिनसम्म हामीले राशन धान्न सक्ने अवस्थामा छैनौं’ उनले भने, ‘स्थानीय प्रशासनले पहल गर्नुपर्छ ।’


कञ्चनपुरका सहायक प्रमुख जिल्ला अधिकारी गोकर्णप्रसाद उपाध्यायले नाकामा आएकालाई सरकारले अर्को निर्णय नगरेसम्म प्रवेश गर्न रोक लगाइएको बताए । उनीहरुलाई दशगजामा खाना बस्ने व्यवस्था मिलाउन छलफल भइरहेको उनले बताए ।

प्रकाशित : चैत्र १८, २०७६ १७:३३
ADVERTISEMENT
प्रतिक्रिया
पठाउनुहोस्
ADVERTISEMENT

धमाधम आकस्मिक कोष बन्दै

कोषबाटै स्वास्थ्यकर्मीलाई दैनिक ५ सय रुपैयाँ प्रोत्साहन भत्ता र मासिक २५ लिटर इन्धन
सीमा तामाङ

ललितपुर — ललितपुर महानगरपालिकाले कोरोना भाइरस (कोभिड–१९) को जोखिम न्युनीकरण र नियन्त्रका लागि आकस्मिक कोष नछुट्याए पनि विपद् व्यवस्थापन समितिमार्फत काम गर्दै आएको जनाएको छ ।

महानगरपालिकाका प्रवक्ता राजु महर्जनले नगरस्तरीय विपद् व्यवस्थापन समितिको कोषमा एक करोड ५० लाख रुपैयाँ रहेको र हाल उक्त समितिअन्तर्गत नै काम गरिरहेको बताए ।

महानगरको २९ वटै वडाको विपद् व्यवस्थापन समितिमा पनि एक/एक लाख रुपैयाँ रहेको उनले जानकारी दिए । ‘वडाले वडास्तरीय समितिबाट कोरोना भाइरससम्बन्धित जनचेतनामूलक कार्यक्रम, मास्क र सेनिटाइजर वितरण र किटनाशक औषधि छर्किरहेको छ,’ उनले भने, ‘अहिले विदेशबाट आएका र मजदुरहरुको तथ्यांक सकंलन भइरहेको छ ।’

दैनिक ज्याला मजदुरी गर्नेलाई राहत वितरण गर्न संघीय सरकारले २५ लाख रुपैयाँ दिने जानकारी प्राप्त भएको उनले बताए । उनका अनुसार नगरस्तरिय समितिमै उक्त रकम राखेर राहत वितरण गरिनेछ । ‘अझ लकडाउनको समय लम्बियो र छुट्टै कोष नै बनाउनु पर्ने अवस्था आयो भने बताउँछौं,’ उनले भने ।

काठमाडौं महानगरपालिकाले कोरना भाइरस संक्रमण, रोकथाम तथा नियन्त्रणका लागि १० करोडको रुपैयाँको आकस्मिक कोष स्थापना गरेको छ । वडाअनुसार दुईदेखि चार लाख रुपैयाँसम्म बजेट पठाइसकिएको र पुनः सोही मात्रामै पठाउने तयारी भइरहेको महानगरले जनाएको छ ।

महानगरपालिकाका प्रवक्ता इश्वरमान डंगोलले कोषबाटै कोरोना भाइरस रोकथामको लागि आवश्यक पर्ने अत्यावश्यक सामाग्रीदेखि व्यवस्थापनसम्मको खर्च भइरहेको बताए । ‘कोरोनासम्बन्धी जनेतनामूलक पम्पलेट, ब्यानर र पर्चादेखि मास्क तथा किटनाशक औषधि छर्कदैछौं,’ उनले भने, ‘अब क्वारेन्टाइन तथा आइसोलेसन बनाउन छलफल गर्दैछौं ।’

गोदावरी नगरपालिकाले ५१ लाख रुपैयाँको आकस्मिक कोष खडा गरेको जनाएको छ । नगरपालिकाले कोषबाटै स्वास्थ्यकर्मीलाई दैनिक ५ सय रुपैयाँ प्रोत्साहन भत्ता समेत दिइरहेको नगरप्रमुख गजेन्द्र महर्जनले बताए । उनका अनुसार कोषमा रकम जम्मा गर्न नगरपालिकाले अन्य संघसस्थालाई पनि आहृवान गरेको छ ।

जनचेतना फैलाउन नगरबाट परिचालन भएका स्वास्थ्यकर्मी, जनप्रतिनिधि तथा कर्मचारी संक्रमित भई उपचार गर्नुपरेमा निःशुल्क गर्ने र संक्रमणबाट मृत्यु भएमा तिनको परिवारलाई १० लाख रुपैयाँ पनि कोषबाटै उपलब्ध गराउने निर्णय भएको उनले बताए । लकडाउनको अवधिभर स्वास्थ्य चौकीमा खटिएका स्वास्थ्यकर्मीलाई मासिक २५ लिटरका दरले इन्धनसमेत दिइनेछ । आवश्यक परेको खण्डमा नगरपलिकाले फेरि बजेट छुट्याउने उनले जनाए ।

गोकर्णेश्वर नगरपालिकाले पनि ५० लाख रुपैयाँको आकस्मिक कोष बनाएको नगप्रमुख सन्तोष चालिसेले बताए । कोषबाट कोरोना भाइरससम्बन्धी जनचेतनामूलक कार्यक्रमदेखि विपन्नलाई राहत, क्वारेन्टाइन तथा आइसोलेसन कक्ष तयार गरिने उनले जानकारी दिए ।

प्रकाशित : चैत्र १८, २०७६ १७:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×