पहिलो खेप स्वास्थ्य उपकरण तथा सामग्री आइपुग्यो- सुदूरपश्चिम - कान्तिपुर समाचार

पहिलो खेप स्वास्थ्य उपकरण तथा सामग्री आइपुग्यो

१०० थर्मामिटर मागेकोमा जम्मा १० वटा आए
चित्रांग थापा

धनगढी — कोरोना भाइरस संक्रमण रोकथामका लागि सरकारले चीनबाट ल्याएको विभिन्न स्वास्थ्य उपकरण तथा सामग्रीमध्ये सुदूरपश्चिम प्रदेशका लागि पहिलो खेप सोमबार धनगढी आइपुगेको छ । नेपाली सेनाको स्काइ ट्रकबाट ती सामग्री धनगढीको गेटा विमानस्थलमा ल्याइएको हो । 

सुदूपश्चिम क्षेत्रीय स्वास्थ्य सेवा निर्देशनालयका प्रमुख क्षेत्रीय स्वास्थ्य निर्देशक डा. गुणराज अवस्थीले प्रदेशका ९ वटै जिल्लाको आवश्यकतालाई मध्यनजर गरी पहिलो खेपमा सामग्री आइपुगेको बताए ।


‘अहिले प्राप्त भएका स्वास्थ्य सामग्रीहरु कोरोना भाइरस संक्रमण नियन्त्रणका लागि स्वास्थ्यकर्मीहरुलाई आवश्यक पर्ने आधारभूत आवश्यकताका सामग्री हुन्,’ उनले भने । माग गरेअनुसारको मात्रामा सामाग्री भने नआएको उनले बताए । ‘थप सामग्री छिटै आपूर्ति हुने स्वास्थ्य सेवा विभागबाट आश्वासन प्रप्त भएको छ,’ उनले भने ।


डा. अवस्थीका अनुसार सोमबार प्राप्त भएका स्वास्थ्य सामग्रीहरुमा गाउन, एन ९५ मास्क, सर्जिकल मास्क, थर्मोमिटर र ग्लब्स छन् । ‘प्रदेशका सबै स्थानीय तहलाई पुग्नेगरी १ सय थर्मोमिटर माग गरेका थियौं,’ डा. अवस्थीले भने, ‘१० वटा मात्र आयो, त्यस्तै गाउन १ हजार ३० थान, एन ९५ मास्क ९ सय ६० थान, ग्लब्स २० हजार थान र सर्जिकल मास्क १० हजार थान रहेको छ ।’


डा. अवस्थीले सुदूरपश्चिमबाट माग गरे बमोजिमको संख्यामा सामग्री आइनपुगेको भए पनि प्रदेश सरकारले पनि आवश्यक पर्ने स्वास्थ्य उपकरण र सामग्री खरिद गर्ने तयारी गरिरहेको बताए । उनले कोरोना भाइरस संक्रमणको शंका रहेकाहरुको स्वाब परीक्षणका लागि धनगढीको सेती प्रादेशिक अस्पतालमा पिसिआर मेसिन खरिद प्रकृया सुरु भएको जानकारी दिए । ‘यस्तै चीनबाट आएका ४ वटा पिसिआर मेसिनमध्ये एउटा सुदूरपश्चिम प्रदेशलाई उपलव्ध गराइने स्वास्थ्य सेवा विभागबाट आश्वासन दिइएको छ,’ डा. अवस्थीले भने ।


सोमबार आइपुगेका सामग्रीहरु बुधबारदेखि सुदूरपश्चिमका ९ वटै जिल्लाका प्राथमिक स्वास्थ्य केन्द्रसम्म पुर्‍याउने तयारी सुरु भएको डा. अवस्थीले जानकारी दिए ।

प्रकाशित : चैत्र १७, २०७६ १८:४०
प्रतिक्रिया
पठाउनुहोस्

लोकतन्त्रको आवरणमा लुटतन्त्र चल्यो : कमल थापा

चित्रांग थापा

महेन्द्रनगर — राष्ट्रिय प्रजातन्त्र पार्टीका अध्यक्ष कमल थापाले देशमा लोकतन्त्रको नाममा लुटतन्त्र चलेको बताएका छन् । प्रमुख राजनीतिक दलका प्रमुख नेता, केही व्यापारी तथा कर्मचारीको त्रिकोणात्मक गठबन्धनमा मुलुकमा अर्बौ रकमको भ्रष्टाचार भइरहेको उनले आरोप लगाए ।

उनले सत्तारुढ नेकपासँंगै प्रमुख प्रतिपक्षी कांग्रेसको पनि कुनै न कुनै रुपमा भ्रष्टाचारमा संलग्नता रहेको देखिने बताए ।
‘एनसेलको कर छली, वाइड बडी जहाज खरिद, ३३ क्विण्टल सुन तस्करी संगठित भ्रष्टाचारका ज्वलन्त उदाहरण हुन्,’ आइतबार महेन्द्रनगरमा पत्रकार भेटघाटमा बोल्दै थापाले भने, ‘पछिल्लो घटनामा नेपाल ट्रस्टको सम्पति एक व्यापारिक घरानालाई सुम्पने कार्य र भूमाफियाले सार्वजनिक जग्गा कब्जा गर्ने कामले नेपालमा नीतिगत र संस्थागत रुपमा भ्रष्टाचारलाई प्रोत्साहित गर्ने काम भइरहेको प्रष्ट हुन्छ ।’

‘दुई तिहाई बहुमतको बलियो सरकार गठन भएको अढाइ बर्ष हुनलाग्दा समेत नेपाली जनताले सकारात्मक अनुभुति गर्न पाएका छैनन्,’ उनले भने । उनले पछिल्लो समयमा भएका धर्म परिवर्तनले सामाजिक संरचना नै खल्बल्याउन थालेको पनि दावी गरे ।

नेपालले ठूलो आर्थिक सहयोग पाउनेगरी अमेरिकासग हुन लागेको सम्झौता एमसीसीलाई राजनीतिक पूर्वाग्रहका कारण खतरामा पार्न खोजिएको पनि उनले बताए । ‘पूर्वाधार विकासका लागि आउन लागेको ठूलो सहयोगलाई धरापमा पार्न विवाद सिर्जना गर्न खोजिएको छ,’ उनले भने ‘जसरी अरुण तेस्रोलाई धरासयी पारियो एमसीसी पनि त्यस्तै हुने त होइन भन्ने शंका उत्पन्न भएको छ ।’

उनले कालापानी, लिम्पियाधुरा र लिपुलेक नेपालको अखण्ड भूमि भएकोले भारतद्वारा अतिक्रमित भूमि फिर्ता गराउने बिषयमा राष्ट्रिय सहमतिसमेत कायम भएको अवसरलाई सरकारले सदुपयोग गर्नु पर्ने बताए ।

प्रकाशित : पुस २०, २०७६ १७:४७
पूरा पढ्नुहोस्
प्रतिक्रिया
पठाउनुहोस्
×