कैलालीमा परीक्षा तालिका परिवर्तन

टीकापुर नगरपालिकाले फागुन २८ गतेबाट वार्षिक परीक्षा सुरु गर्ने निर्णय गरेको छ । यसअघि चैत १६ गते गर्ने भनिएकोमा नयाँ तालिका अनुसार कक्षा ८ र एसईई बाहेकका परीक्षा फागुन २८ गतेदेखि चैत ६ गतेसम्म सञ्चालन हुनेछन् । कक्षा ८ को परीक्षा चैत ६ गते बिहान र एसईई दिउँसो हुने जनाएको छ ।

यसैगरी जानकी गाउँपालिकाले पनि परीक्षा फागुन २९ देखि सुरु गर्न थालेको छ भने कक्षा ८ को परीक्षा पनि फागुन २८ बाटै सुरु गर्न लागिएको शिक्षा अधिकृत कलम खड्काले बताए ।

जोशीपुर गाउँपालिकाले फागुन २२ गतेदेखि चैत ५ सम्मको कार्यतालिका सार्वजनिक गरेको छ । जोशीपुर गाउँपालिका स्तरीय परीक्षा समितिका सचिव राजेशकुमार चौधरीद्वारा हस्ताक्षरित सूचनामा उक्त कुरा जनाइएको छ ।

भजनी, लम्की चुहा नगरपालिकामा पनि परीक्षा तालिका परिवर्तनको तयारीको लागि छलफल भइरहेको जनाइएको छ ।