आजदेखि सीमा नाका बन्द

रासस

बैतडी — भारतसँग सीमा  जोडिएको बैतडीको झुलाघाट नाका चार दिनका लागि बन्द हुने भएको छ । जिल्ला प्रशासन कार्यालय बैतडीका अनुसार शुक्रबारदेखि  मंसिर ९ गतेसम्म झुलाघाट नाका बन्द हुने भएको हो । 

यही मंसिर ८ गते (नोभेम्बर २५ तारिख)मा भारतमा विधानसभाको उपनिर्वाचन हुन लागेकाले सुरक्षा संवेदनशीलता कारण जनाउँदै शुक्रबार साँझ ५ बजेदेखि मंसिर ९ गते साँझ ५ बजेसम्म सीमानाका बन्द हुने जनाइएको छ । सीमा बन्द रहेको अवधिमा आकस्मिक रुपमा खोल्नुपरेमा आपसी सहमतिमा खोल्न सकिने सहायक प्रजिअ लोकेन्द्र सिंह नेगीले जानकारी दिए ।

यसअघि गत असोज १८ गते भारतको पिथौरागढमा जिल्ला पञ्चायत तथा ग्राम पञ्चायत सदस्य निर्वाचन हुँदा पनि असोज १६ देखि असोज १८ गते तीन दिनसम्म झुलाघाट नाका बन्द गरिएको थियो ।

प्रकाशित : मंसिर ६, २०७६ ११:५२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बाटो अवरुद्ध भएकाले बेंसी झर्न पाएनन् व्यासवासी

मनोज बडू

(दार्चुला) — हिमाली क्षेत्रमा चिसो बढेपछि स्थानीय बेंसी झर्ने बेला भइसक्यो । हिउँदका बेला भेडाच्यांग्रा र पशुबस्तुलाई चरिचरनको पनि समस्या हुने भएकाले दार्चुलाको व्यास क्षेत्रका बासिन्दालाई औल झर्नुपर्ने बाध्यता पुस्तौंदेखिकै हो । तर बाटो अवरुद्ध भएकाले अहिलेसम्म उनीहरू बेंसी झर्न पाएका छैनन् । 

‘हिमाली क्षेत्रमा असोजबाट चिसो बढ्न थाल्छ । कात्तिकमा त हिमपात नै सुरु हुन्छ,’ नौगाड गाउँपालिका ३ का भेडापालक किसान विशनसिंह रावलले भने, ‘उहिले कात्तिकको सुरुमै बेंसी आइसक्थ्यौं । यो वर्ष बाटो नहुँदा झर्न सकिएको छैन ।’ दार्चुला–तिंकर घोरेटो बाटो बन्द छ । विगतमा बर्खाका बेला भत्किएको बाटो मर्मत गरेर भए पनि उनीहरू भेडीगोठ औलमा झारिसक्थे । तर यस वर्ष व्यासकै बुदीमा चिसो खपेर बस्नुपरेको उनको भनाइ छ ।
गत भदौमा व्यास १ मौर्‍याभीरमा खसेको ठूलो चट्टान अझै हटेको छैन । चट्टान खोल्ने पहल पनि भएको छैन ।

भदौमा पहिरो खसेको र त्यहाँदेखि नै सम्बद्ध निकायलाई निवेदन दिए पनि आफूहरूको मागबारे सुनुवाइ नभएको स्थानीय बताउँछन् । भत्केको बाटो तत्काल मर्मत गर्न नसकिने भएपछि वडा कार्यालयले गाउँपालिकालाई भारतीय बाटो भएर भेडीगोठ सार्न सिफारिस गरेको व्यास गाउँपालिका १ का वडाध्यक्ष अशोकसिंह बोहराले बताए ।

‘मौर्‍याभीरमा खसेको पहिरो पन्छाउन नसकिने भएपछि व्यासका भेडीगोठ बेंसी सार्न भारतीय बाटो प्रयोग गर्ने तयारी गरेका थियौं,’ किसान मानसिंह डोबालले भने, ‘त्यसका लागि भारतीय प्रशासनबाट अनुमतिपत्रसमेत बनाइसकेका थियौं । तर पछिल्लो समय कालापानी क्षेत्रमा देखिएको समस्याले दुःख पाउन सकिने डरले भेडीगोठ सार्न सकेका छैनौं ।’ बाटो खोज्दै भेडाच्यांग्राका गोठाला जंगली क्षेत्रमा दिनहुँजसो जाने गरे पनि फेला नपरेको डोबालको भनाइ छ ।
भारतीय पशु क्वारेन्टाइनबाट गत असोज दोस्रो साता भारतीय बाटो भएर भेडीगोठ सार्न प्रतिभेडाच्यांग्रा भारु २० तिरेर ७ सय ३७ वटाको अनुमति लिइएको महाकाली नगरपालिका २ का डम्मरसिंह साहुले बताए ।

विगतमा असोजको अन्तिमतिर बुदीको चरन क्षेत्रमा भेडाबाख्रा चराइने र त्यसपछि कात्तिकमा दोपख्या हुँदै घाटीबगडसम्म भेडीगोठ सार्दै बेंसी झर्ने गरिएको उनको भनाइ छ । व्यासलगायत दुहु तथा नौगाड गाउँपालिका र महाकाली नगरपालिकाका झन्डै २७ भेडीगोठ चरिचरनका लागि व्यास क्षेत्रमा छन् । यहाँबाट नजिकको चरन क्षेत्र बुदी हो ।

व्यासका कुञ्चा पनि एक दशकदेखि भारतीय बाटो हुँदै सदरमुकाम झर्दै आएका छन् । सदरमुकामबाट व्यास उक्लिँदा र व्यासबाट झर्दा वर्षमा दुईपटक भारतीय बाटो प्रयोग गर्नुपरेको यहाँका स्थानीय बताउँछन् । कात्तिकदेखि वैशाखसम्म लालावाला, चौपायासहित तल खलंगा बस्ने र गर्मी सुरु भएपछि व्यासतिर फर्कने चलनलाई यहाँका सौका समुदाय ‘कुञ्चा’ सार्ने भन्ने गरिएको छ ।

प्रकाशित : मंसिर ६, २०७६ ११:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×