हिमाल हेर्न खप्तड

वसन्तप्रताप सिंह

बझाङ — खप्तडको चर्चा सबैतिर छ । फराकिला फाँट भएको २२ पाटन ५३ ताल रहेको यो गन्तव्य मनमोहक हिमशृंखलाहरूको दृष्यावलोकनका लागि पनि उत्तिकै आकर्षक मानिन्छ । हिउँदमा हिमाल हेर्न खप्तड आउनेको संख्या पछिल्ला वर्ष बढेको छ । बर्खामा बादल र सुक्खामा तुवाँलोले छोपिने हिमालहरू असोजको मध्येदेखि फागुनसम्म छर्लङ खुल्ने गर्छन् । यतिबेला खप्तड पुग्नेहरू यहाँका अग्ला थुम्कामा गएर हिमाली दृष्यमा रमाइरहेका भेटिन्छन् । यहाँका झुत्तिहरूबाट हेर्दा हिमालहरू खप्तडभन्दा तल रहेको जस्तो भान पर्छ । पाटनहरूबाट हेर्दासँगै जोडिए जस्ता देखिन्छन् । 

विहानीमा घामको झुल्को पर्दा लालीमय हुने साइपाल हिमश्रृङखलाले क्षणक्षणमा फेर्ने स्वरुपको मजा लिनेहरू खप्तड घुम्नका लागि हिउँदयाम नै रोज्ने गर्छ । साइपालको श्रृङखलामा पर्ने सुनपानी, फिरानकोफ, मडुंग्रा, जलजला, राइढुंगी, राक्सियो, निलखट्टीलगायत दर्जनौ हिमाल नजिकैबाट देख्न पाउँदा पर्यटक पनि खुसी हुन्छन् । खप्तडका फराकिला पाटनमा हिउँदको पहारिलो घाम ताप्दै हिमाल हेर्नुको मजा शब्दमा व्याख्या गर्न नसकिने खालको रहेको बुटवलका विनोद पाण्डेले बताए । ‘घण्टौ हेर्दा पनि मन अघाएन,’ उनले भने, ‘निलो आकासमा बग्दै गरेको तित्राप्वाँखे बादल र क्षणक्षणमा छोपिने अनि छिनमै खुल्ने लजालु दुलही जस्ता हिमाल दृष्यले मोहनी नै लगायो ।’ पहिलोपटक एक्लै घुम्न आएका उनले खप्तडको दृष्य देखाउन अर्को पटक परिवारसहित आउने सोच बनाएको बताए ।

यहाँबाट देखिने हिमालको दृष्यले खप्तडको सुन्दरतामा सुगन्ध थपेको नेपालगन्जका सुरेश गौतमले बताए । ‘खप्तड आफैमा सुन्दर त छँदै छ । हिमालको दृष्यले झनै सुगन्ध थपेको छ । जीवनमा एक पटक पुग्नै पर्ने ठाउँ रहेछ,’ उनले भने ।

सबै मौसममा घुम्नका लागि आउने गरेको भए पनि हिमाल प्रेमीहरूले भने हिउँदे याम नै रोज्ने गरेको खप्तडका होटल सञ्चालक बाजुराका लोक रावल बताउँछन् । ‘पर्यटक त बाह्रै महिना आउने गर्छन्, तर हिमाल हेर्न चाहनेहरू बढिजसो मंसिर पुसतिर आउँछन्,’ १३ वर्षदेखि खप्तडमा होटल सञ्चालन गर्दै आएका उनले भने, ‘हिमाल हेर्नकै लागि प्रत्येक वर्ष यही सिजनमा आउने पनि धेरै छन् ।’ उनले नियमित हिमाल हेर्न आउनेहरूमा जर्मनी, क्यानाडालगायतका देशबाट आउने विदेशी पर्यटक पनि रहेको बताए ।

यहाँको घोडादाउना पाटन, डाँफेकोट, सहश्रलिंग, गणेशस्थान पाटन, नागढुंगालगायत ठाउँबाट हिमाली दृष्यावलोकन गर्न सकिन्छ । डाँफेकोट र खप्तड दहको डाँडामा हिमाल हेर्न सजिलो होस् भनेर भ्यु टावरकोसमेत निर्माण गरिएको छ । तर हिमाली दृष्यको पुरै दृष्यावलोकन गर्न बझाङको लोखाडा भएर आउने बाटो उपयुक्त रहेको यहाँका स्थानीय बताउँछन् । २ सय २५ वर्ग मिटरमा खप्तड राष्ट्रिय निकुञ्ज फैलिएको छ । ती ठाउँका कारण पनि खप्तड नेपालकै सुन्दरतम् ठाँउ मध्ये एक मानिन्छ । रंगिविरंगी फुलले ढाकिएका ठुला पाटनहरूले फूल फुल्ने बेलाको छुट्टै आकर्षण दिन्छन् । खप्तड राष्ट्रिय निकुञ्जको कार्यालयका अनुसार यहाँ २ सय २४ प्रकारका वनस्पति पाइन्छन् । १२ गुफा रहेको खप्तडमा २ सय २६ किसिमका पंक्षिहरू, बाघ, भालुलगायत २० भन्दा बढि प्रजातिका वन्यजन्तु पाइन्छन् ।

बझाङ, बाजुरा, डोटी र अछामको संगम स्थलमा रहेको खप्तड धार्मिक हिसाबले पनि महत्वपुर्ण मानिन्छ । पौराणिक कालमा मायावी शक्ति भएका देविदेवताहरूले गगनचरीको भेष धारणगरि खप्तडको आकासमा रमाउने गरेको, शिव आदि देवता र सिद्धहरूको क्रिडास्थलको रुपमा रहेको खप्तड क्रृषिमुनिहरूको पनि तपस्थली भएको आर्षपुराण लगायत विभिन्न धार्मिक ग्रन्थहरूमा उल्लेख छ ।

प्रकाशित : मंसिर ३, २०७६ १०:१६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

६ वर्षमा पनि बनेन पुल

साँफे–मार्तडी खण्डअन्तर्गत बाजुराको बूढीगंगा नगरपालिका ८ र अछामको मेल्लेख गाउँपालिका जोड्ने पुल नबन्दा आउजाउमा समस्या 
मेनुका ढुंगाना

(अछाम) — अछाम र बाजुरा जोड्ने बिडाबगर पुल ६ वर्षदेखि अलपत्र परेको छ । मेल्लेख गाउँपालिकाको कुस्कोट, ठाँटिलगायत क्षेत्रका यात्रुलार्ई आउजाउमा समस्या भएपछि डोलिडारले ७५ मिटर लामो पुल बनाउन लागेको हो ।

मुआब्जाका विषयमा स्थानीयको अबरोधले निर्माण अघि बढाउन नसकेको स्वाँर कन्सट्रक्सनका ठेकेदार रवि स्वाँरले बताए । ‘२०७१ मा सम्झौता भएको पुल २ वर्षमा बनाइसक्ने गरि जिम्मा लिएको हो र तर स्थानीयले अवरोध गरेका कारण बाँकि काम अघि बढाउन सकेको छैन,’ उनले भने, ‘काम गर्ने वातावरण भए तत्काल काम सुरु गर्छु ।’ अछाम र बाजुरा जोड्ने पक्की पुल करिब ४ करोडमा बन्न लागेको हो । साँफे–मार्तडी खण्डअन्तर्गत बाजुराको बुढिगंगा नगरपालिका ८ र अछामको मेल्लेख गाउँपालिका जोड्ने पुल नबन्दा आउजाउमा समस्या भएको कुस्कोटका धनजित साउँदले बताए । निर्माण भइरहेको पुल आसपासका जग्गा धनिले मुआब्जा नपाएको भन्दै उनीहरूले काम गर्न रोक लगाएका हुन् ।

अछामका स्थानीयका अनुसार सरोकारवालाले समन्वय सहकार्य नगर्ने र बाजुराका स्थानीयको अबरोधका कारण पुलको काम अघि बढ्न सकेको छैन । ‘अछामक् ाबजार आउनलाई हामीले बाजुराको बाटो प्रयोग गर्नुपर्छ । दुःख यहाँका जनतालाई छ । सरोकारवालाबाट काम सुरु गर्न आवश्यक पहल हुन सकेको छैन ’ उनले भने ।

दुइटा पिलर र आसपासको पर्खालको काम सकिए पनि काम रोकिँदा निर्माणका लागि ल्याएका सामग्री बाजुराको रिठा बजारमा अलपत्र परेका छन् । मुआब्जा नदिएसम्म काम अघि बढ्न नदिने किसानहरूले बताए । यही कारण एक वर्षदेखि खेती गर्न नपाएको स्थानीय भक्त थापाले बताए । ‘एकै टोलका २३ जनाको जग्गा पुल निर्माण स्थलसम्म जाने रोडमा परेको छ । यसअघि सरकारी दरअनुसार १४ लाख दिने सहमती भएपछि हामीले काम गर्न अवरोध गरेका थिएनौं’ थापाले भने, ‘दिन्छौं ंभनेर झुटो मात्र बोल्ने तर मुआब्जा नदिने भएकाले हामीले काम गर्न नदिएका हौं ।’ पहिलो किस्ता बापत ४ लाख रुपैंया पाएको र अझै १० लाख रुपैंया पाउन बाँकि रहेको उनको भनाइ छ ।
स्थानीय तह गठन भइसकेपछि अछामको मेल्लेख गाउँपालिकाबाट १० लाख रकम उपलब्ध गराउने सहमतीपछि काम अगाडी बढाउन दिइएको थियो । तर हालसम्म उक्त रकम दिने बारे गाउँपालिकाले कुनै वास्ता नगरेको बाजुराको बुढिगंगा नगरपालिका ८ का वडा सदस्य सुरेन्द्रबहादुर थापाले बताए । ‘१० लाख रकम ल्याएर प्रभावित स्थानीय बासिन्दालाई दिएपछि काम तत्काल सुचारु हुन्छ । त्यसको लागि अछामबाट पहल हुन जरुरी छ’ उनले भने ।

मेल्लेख गाउँपालिका अछामले बाजुराका प्रभावितलाई तत्काल दुइ किस्तामा रकम उपलब्ध गराउने र काम अघि बढाउने सहमति भएको ठेकेदार कम्पनीका स्वारले बताए ।

प्रकाशित : मंसिर ३, २०७६ १०:१२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×