पावर टिलरको माग बढ्दो

रानी जमरा कुलरिया सिँचाई आयोजनाको कृषितर्फको कार्यालयले किसानलाई ५० प्रतिशत अनुदानमा गत वर्ष ६ सय बढी कृषि यन्त्र वितरण गरेको छ । पावर टिलर मात्र ३ सय बढी अनुदानमा दिइएको थियो । यसले पनि किसानलाई यान्त्रिकरणमा आकर्षण भएको हो ।

थोरै मात्रामा स्थानीय तहले पनि किसानलाई अनुदानमा पावर टिलर दिएपनि प्रयाप्त नभएको रानी जमरा कुलरिया सिँचाई आयोजनाको कृषितर्फको कार्यालयका प्रमुख भरत कँडेलले बताए । उनले भने, ‘माग धेरै छ । यो वर्ष पनि गत वर्षकै हाराहारीमा पावर टिलरलगायतका कृषि यन्त्र अनुदानमा दिने कार्यक्रम रहेको छ ।’ यो बाहेक प्रदेश सरकार, कृषि ज्ञान केन्द्रलगायतका संस्थाबाट पनि कृषि यन्त्र वितरण गर्ने गरिएको छ ।

एउटै पावर टिलर ट्याक्टरबाट खेत जोत्न, बोरिङबाट सिँचाइ गर्न, बाली काट्न, थ्रेसिङ गर्न, मिल चलाउन, ढुवानी गर्न, जेनेरेटर चलाउन सकिने भएकाले कृषिका लागि पावर टिलर राम्रो, बहुउपयोगी यन्त्र भएको टीकापुर नगरपालिका–१ किसान तेजबहादुर चौधरीले बताए । उनले भने, ‘राँगा पाल्न झन्झट भन्दा पावर टिलर राम्रो छ । अनुदान पाएपछि राँगा किन्नु र पावर टिलर किन्न उस्तै पैसा लाग्छ ।’

पावर टिलर भएपछि काममा छिटो अनि सजिलो पनि भएको जानकी गाउपालिका–१ सुवर्णपुरका भोजबहादुर चौधरीले बताए । ‘पावर टिलर भएपछि पशु पाल्न झन्झट छैन । काममा पनि छिटो र सजिलो भएको छ’ उनले भने, ‘पहिला एक जोर रागा पाल्न दिनभरी खटिनुपर्ने हुन्थ्यो । अब त्यो समय अरु काममा खर्च गर्न सकिने भएको छ ।’