अवैध संरचनामा लाग्यो डोजर

डिभिजन कार्यालयले स्थानीय प्रशासन र जनप्रतिनिधिसँग छलफल गरेर संरचना भत्काउन सुरु गरेको जनाएको छ । सोमबार भएको छलफलमा सब्जीमण्डी क्षेत्रमा निर्माणाधीन संरचना भत्काउने मोटामोटी सहमति भएको छलफलमा सहभागी वडा ४ का अध्यक्ष लक्ष्मीदत्त बोहराले बताए ।

डिभिजन कार्यालयले आन्दोलनरत पक्षसँग कुनै छलफल नगरे पनि अवैध संरचना भत्काउने कामलाई सकारात्मक रूपमा लिएको अनेरास्ववियु क्रान्तिकारीका जिल्ला अध्यक्ष वीरेन्द्रराज विष्टले बताए । ‘हाम्रो आन्दोलन रोकिएको छैन, डिभिजन कार्यालयको सुरुवातलाई सकारात्मक रूपमा लिएका छौं,’ उनले भने ।

अवैध संरचना भत्काउन भीमदत्त नगरपालिका–४ को सब्जीमण्डी क्षेत्रमा ठूलो संख्यामा सुरक्षाकर्मी परिचालन गरिएको थियो । उक्त क्षेत्रमा संरचना निर्माण गर्नेहरू विरोधमा उत्रेका थिए । आन्दोलनरत पक्षले भत्काउन सुरु गरे पनि अहिले नै आन्दोलन नरोकिने जनाएको छ ।

कञ्चनपुर बन्द

बजार क्षेत्रको जमिनमा अवैध निर्माण भएका भौतिक संरचना भत्काउनुपर्ने माग गर्दै मंगलबार नै युवा–विद्यार्थी संगठनले अनिश्चितकालीन बन्द घोषणा गरेका थिए । मंगलबार बन्दका कारण यहाँको यातायात सेवा पूर्ण रूपमा ठप्प भयो । बिहानैदेखि विद्यार्थी सडकमा आएर यातायात र बजार बन्द गराउँदै हिंडेका थिए ।

महेन्द्रनगर तथा आसपासका बजार सँगै जिल्लाका शैक्षिक संस्थाहरू पनि ठप्प भए । विभिन्न राजनीतिक दलका युवा र विद्यार्थी संघ संगठनले संयुक्त रूपमा अवैध संरचना भत्काउन माग गर्दै एक महिनादेखि चरणबद्ध रूपमा आन्दोलन गर्दै आएका छन् । एक महिनासम्म पनि अवैध संरचना भत्काउन आलटाल भइरहेकाले कञ्चनपुर बन्द गर्नुपरेको युवा संघ कञ्चनपुरका अध्यक्ष रामचन्द्र रेग्मीले बताए । आन्दोलनरत युवा विद्यार्थी संगठनले अवैध रूपमा निर्माण गरिएका संरचना भत्काउनुका साथै, अवैध लिज खारेज र प्रक्रिया बिना नै लिजमा जमिन वितरण गर्नेलाई कारबाही हुनुपर्ने माग गरेका छन् । ‘नगरको स्वरूप नै बिग्रिने गरेर सरकारी जमिनमा धमाधम भौतिक संरचना निर्माण भइरहेका छन्,’ रेग्मीले भने, ‘तत्काल अवैध संरचना भत्काउनुपर्ने हाम्रो माग हो ।’

अवैध संरचना हटाउन जिल्ला प्रशासन कार्यालय कञ्चनपुरले एक महिनाअघि सूचना जारी गरेको थियो । गत साता मात्रै सहरी विकास तथा भवन निर्माण डिभिजन कार्यालय धनगढीले पनि अवैध संरचना र निर्माण सामग्री हटाउन सूचना जारी गरेको छ । जिल्ला प्रशासन कार्यालयले एक महिने अल्टिमेटम दिंदा पनि अवैध संरचना नभत्काइएको भन्दै विद्यार्थीहरू आन्दोलनमा उत्रेका हुन् । उनीहरूले भौतिक संरचना भत्काउन सुरु नगरेसम्म आन्दोलन जारी रहने जनाएका छन् । युवा–विद्यार्थीको आन्दोलनले दिनभर कञ्चनपुर बन्द भएपछि सहरी विकास तथा भवन निर्माण डिभिजन कार्यालय धनगढीले मंगलबार साँझदेखि डोजर

लगाएर अवैध संरचना भत्काउन सुरु गरेको छ ।