अवैध संरचना भत्काउन माग गर्दै महेन्द्रनगर बन्द
कञ्चनपुर — महेन्द्रनगर नगर विकास समिति मातहत रहेको महेन्द्रनगर बजार क्षेत्रको जमिनमा अवैध रुपमा निर्माण भएको संरचना भत्काउनुपर्ने माग गर्दै मंगलबार कञ्चनपुर बन्द गरिएको छ । अवैध संरचना भत्काउन स्थानीय प्रशासन र सरोकारवाला निकायले आलटाल गरिरहेको भन्दै युवा र विद्यार्थी संगठनले अनिश्चितकालिन बन्द घोषणा गरेका हुन् ।
बन्दका कारण यहाँको यातायात पूर्ण रुपमा ठप्प हुन पुगेको छ । मंगलबार बिहानैदेखि विद्यार्थीहरु सडकमा आएर यातायात र बजार बन्द गराउँदै हिँडेका छन् । महेन्द्रनगर तथा आसपासका बजारसँगै जिल्लाका शैक्षिक संस्थाहरु पनि बन्द भएका छन् ।
विभिन्न राजनीतिक दलका युवा र विद्यार्थी संघ संगठनले संयुक्त रुपमा अवैध संरचना भत्काउन माग गर्दै एक महिनादेखि चरणबद्ध रुपमा आन्दोलन गर्दै आएका छन् । एक महिनासम्म पनि अवैध संरचना भत्काउन आलटाल भईरहेकाले अनिश्चितकालिन बन्द गर्नुपरेको युवा संघ कञ्चनपुरका अध्यक्ष राम चन्द्र रेग्मीले बताए ।
