बहुविवाहको आरोपमा वडाध्यक्ष पक्राउ
सल्यान — बहुविवाहको आरोपमा वडाध्यक्ष पक्राउ परेका छन् । बहुविवाह आरोपमा बन्गाड कुपिण्डे नगरपालिका-९ का वडाध्यक्ष इन्द्रबहादुर कुमाईलाई कान्छी श्रीमतीसँगै प्रहरीले पक्राउ गरेको हो । स्थानीयले बहुविवाह गरेको भन्दै उजुरी दिएपछि प्रहरीले वडाध्यक्ष कुमाईलाई जयतपानी बजारबाट पक्राउ गरेको हो ।
स्थानीयले उजुरी दिएसँगै जिल्ला अदालत सल्यानबाट पक्राउ पुर्जी लिएर वडाध्यक्ष कुमाई र उनकी कान्छी श्रीमती भनिने ग्वामी बिष्टलाई पक्राउ गरिएको जिल्ला प्रहरी कार्याल्य सल्यानका डीएसपी गोबिन्द थापाले बताए । घटनाको अनुसन्धान भइरहेको पनि उनले बताए ।
वडाध्यक्ष कुमाईले तिहारको दिनमा ग्वामी बिष्टलाई भगाएका थिए । उनले बिष्टका श्रीमानलाई ३ लाख ८० हजार नगद जारी तिरेर वहुविवाहको केस गाउँमै मिलाउने प्रयास समेत गरेका थिए । उनका दुई श्रीमती पहिले नै छन् ।