डोल्पामा जंगली साग खाँदा बिरामी परेकाहरुको उद्धार- कर्णाली - कान्तिपुर समाचार

डोल्पामा जंगली साग खाँदा बिरामी परेकाहरुको उद्धार

हरि गौतम

रुकुम पश्चिम — जंगली साग खाएर डोल्पामा बिरामी भएकामध्ये ४ जनाको उद्धार गरिएको छ । कामका लागि डोल्पा पुगेका जाजरकोटको नलगाड नगरपालिकाका विभिन्न वडाका ५ जना पुरुष स्थानीय 'जोक' नाम गरेको साग खाएपछि बिरामी परेका थिए । 

डोल्पाका प्रमुख जिल्ला अधिकारी सुरेश सुनारअनुसार ३६ वर्षीय गोपाल ओली, १९ वर्षीय नरेन्द्र ओली, १८ वर्षीय अजय ओली, ३३ वर्षीय शिवराज केसी र ३८ वर्षीय टेकबहादुर ओली बिरामी परेका थिए । उनका अनुसार नरेन्द्रबाहेक अरुको उद्धार गरिएको हो ।

उनीहरु माथिल्लो डोल्पाको शे फोक्सुण्डो गाउँपालिका–१, निजालगुम्बामा काम गर्न पुगेका थिए । नरेन्द्रलाई जिल्ला अस्पतालमै उपचारमा राखिएको छ ।

सुर्खेतबाट आएको हेलिकप्टरले २ पटकमा गरी ५ जनालाई निजालगुम्बाबाट जिल्ला सदरमुकाम दुनैसम्म ल्याएको थियो । ४ जना बिरामीलाई हेलिकप्टरमार्फत सुर्खेतस्थित प्रदेश अस्पताल लिएको हो । उनीहरु कामका लागि डोल्पा उक्लिएकाहरु हुन् । सोमबार बेलुकी साग खाएका उनीहरु बिरामी परेपछि राति १ बजेपछि मात्रै जिल्लामा खबर आएको प्रजिअ सुनारले जानकारी दिए ।

प्रकाशित : भाद्र २३, २०७७ १७:४४
प्रतिक्रिया
पठाउनुहोस्

भुक्तानी अवधिभर घर र गाडी कर्जामा ब्याजदर परिवर्तन गर्न नपाइने

यज्ञ बञ्जाडे

काठमाडौँ — घर र गाडी कर्जामा बैंक तथा वित्तीय संस्थाले कर्जाको भुक्तानी अवधिभर ब्याजदर परिवर्तन गर्न नपाउने भएका छन् । राष्ट्र बैंकले मंगलबार सार्वजनिक गरेको एकीकृत निर्देशनमार्फत सो व्यवस्था गरेको हो ।

नयाँ व्यवस्था अनुसार बैंक तथा वित्तीय संस्थाले प्रवाह गरेको एक वर्ष भन्दा बढी भुक्तानी अवधि भएका सबै व्यक्तिगत आवधिक कर्जाका ब्याजदर परिवर्तन गर्न पाउने छैनन् । यसको अर्थ ग्राहकले ऋण लिँदाको बखत जति ब्याजदर तय भएको सोही दर नै कर्जाको परिपक्वको अवधिभर लागू हुनेछ । बैंक तथा वित्तीय संस्थाले सुरुमा सस्तो दरमा कर्जा प्रवाह गर्ने तर, केही महिना भित्रैमा ब्याजदर बढाएर महँगो बनाउने प्रवृति बढिरहेको बेला राष्ट्र बैंकले यो व्यवस्था ल्याएको हो ।

‘एक वर्ष भन्दा बढी भुक्तानी अवधि भएका व्यक्तिगत आवधिक कर्जाको ब्याजदर परिवर्तन नहुने गरी स्थिर ब्याजदर कायम गर्नु पर्नेछ,’ निर्देशनमा उल्लेख छ, ‘यस प्रयोजनको लागि, इजाजतपत्र प्राप्त संस्थाले एक वर्ष भन्दा बढी भुक्तानी अवधि भएका प्रत्येक व्यक्तिगत आवधिक कर्जाको ब्याजदर भुक्तानी अवधीभर परिवर्तन नहुने गरी स्थिर ब्याजदर निर्धारण गर्नुपर्नेछ ।’ तर, ग्राहक स्वयंले इजाजतपत्र प्राप्त संस्थाको आधार दर परिवर्तन हुँदा परिवर्तन हुने परिवर्तनीय ब्याजदरमा कर्जा लिन चाहेमा ग्राहकको अनुरोधमा परिवर्तनीय ब्याजदर कायम गर्न पाउनेछन् ।

यो व्यवस्था व्यक्तिको नाममा प्रवाह भएका/हुने घर कर्जा, गाडी कर्जा लगायतका मासीक वा कुनै पनि आवधिक किस्तामा भुक्तानी हुने गरी प्रवाह गरिएका/हुने एक वर्ष भन्दा बढी भुक्तानी अवधि भएका कर्जामा लागू हुने राष्ट्र बैंकले प्रस्ट्याएको छ ।

यो निर्देशन जारी हुनुपूर्व मासिक/त्रैमासिक/आवधिक किस्तामा भुक्तानी हुने गरी ब्यक्तिको नाममा प्रवाह भएका घर कर्जा, गाडी कर्जा लगायतका आवधिक कर्जाको हकमा ग्राहकको अनुरोधमा स्थीर ब्याजदर कायम हुने गरी कर्जाका शर्तहरु परिवर्तन गर्न पनि राष्ट्र बैंकले निर्देशन दिएको छ ।

योसँगै गत आर्थिक वर्षमा जारी भएका निर्देशनहरुलाई एकीकृत गरी राष्ट्र बैंकले एकीकृत निर्देशन जारी गरेको हो ।

यस्तो छ राष्ट्र बैंकले मंगलबार सार्वजनिक गरेको एकीकृत निर्देशन :

प्रकाशित : भाद्र २३, २०७७ १७:२७
पूरा पढ्नुहोस्
प्रतिक्रिया
पठाउनुहोस्
×