कालीकोटमा ३ सय ५८ घर भत्किए, ५ सय ९५ परिवार विस्थापित- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

कालीकोटमा ३ सय ५८ घर भत्किए, ५ सय ९५ परिवार विस्थापित

तुलाराम पाण्डे

कालीकोट — यसपालिको बाढीपहिरोका कारण कालीकोटमा ३ सय ५८ घर भत्किएका छन् । पहिरोले १८ को मृत्यु भएको छ भने ७ अझै बेपत्ता छन् । सबैभन्दा बढी क्षति नरहरिनाथ गाउँपालिकामा पुगेको छ, त्यहाँ १० जनाको मृत्यु भएको छ भने एक जना बेपत्ता छन् । ५३ घर भत्किएको र ४ सय ९४ परिवारका १ हजार ९ सय १९ जना विस्थापित भएको जिल्ला प्रशासन कार्यालयले जनाएको छ ।

सहायक प्रमुख जिल्ला अधिकारी युवराज गुरागाईंका अनुसार रास्कोटमा २ को मृत्यु र ५ जना बेपत्ता भएका छन् । ३० घर भत्किएकोमा १६ घरका ८९ जना विस्थापित भएको उनले बताए । पचालझरना गाउँपालिकाको खार्दुगाउँमा १ सय २२ घर पहिरोको उच्च जोखिममा छन् । सदरमुकाम रहेको खाडाचक्रमा बाढीले एक जना र सान्नीत्रिवेणीमा २ जनाको मृत्यु भएको छ । २ जना बालबालिकाले ज्यान गुमाएको महाबैमा ५ घर भत्किएको र १२ जना विस्थापित भएको स्थानीय प्रशासनको तथ्यांक छ ।

त्यस्तै, पहिरोले मानवीय क्षति नभएको शुभकालिकामा ९ परिवारका १२ जना विस्थापित भएका छन् । एक जनाले ज्यान गुमाएको पलातामा ८ घर भत्किएका छन् । ‘गाउँका सबै घरधुरी जोखिममा छन्,’ गाउँपालिका अध्यक्ष धीरबहादुर विष्टले भने, ‘घर–खेतपाखो जताततै चिरैचिरा परेको छ ।’ प्रमुख जिल्ला अधिकारी चन्द्रप्रसाद गैरेले बाढीपहिरोले जिल्लाभर झन्डै १५ करोड रुपैयाँको क्षति पुर्‍याएको बताए ।


पहिरोको जोखिममा रहेका नरहरिनाथ–४ अदेलाका घर । तस्बिर : तुलाराम/कान्तिपुर


प्रकाशित : श्रावण २१, २०७७ २०:२५
प्रतिक्रिया
पठाउनुहोस्

लेखापाल, श्रीमती र भतिजाको खातामा जम्मा भएको सरकारी रकम फिर्ता

हरि गौतम

रुकुम पश्चिम — त्रिवेणी गाउँपालिकाका लेखापाल हेमन्त केसी उनकी श्रीमती विर्मा र भतिजा सुवासको खातामा जम्मा भएको सरकारी रकम फिर्ता भएको छ । तीन दिनमा ४ पटक गरी गाउँपालिकाको सञ्चित खातामा २४ लाख ९२ हजार ३ सय ७२ रुपैयाँ फिर्ता भएको हो ।

यसअघि २ दिन ३ पटक र बुधबार गरी उक्त रकम गाउँपालिकाको खातामा जम्मा भएको हो । साउन १६ गते ७ लाख ८२ हजार ५ सय ९५, साउन १९ गते ६ लाख र सोही दिन ८ लाख ५९ हजार ७ सय ७७ तथा साउन २१ गते २ लाख ५० हजार रुपैयाँ गाउँपालिकाको खातामा जम्मा भएको हो । यी ३ जनाको खाताबाट उक्त रकम गाउँपालिकाको खातामा जम्मा भएको गाउँपालिकाले जनाएको छ ।

आर्थिक वर्ष २०७६/०७७ मा लेखापाल केसीले विभिन्न शीर्षकको सरकारी रकम आफू, श्रीमती र त्रिवेणीमै लेखा सहयोगीको काम गर्ने भतिजा सुवासको नाममा जम्मा गरेको खुलेको थियो । विभिन्न शीर्षक र तीन जनाको खातामा जम्मा गरेको पाइएपछि कार्यपालिकाले त्यसको अनुसन्धान समेत थालेको थियो । कार्यपालिकाले अनुसन्धान गर्ने भन्ने निर्णय गरेपछि उक्त रकम गाउँपालिकाको खातामा जम्मा गर्न सुरु भएको बताइएको छ ।

सरकारी रकम आफ्नो, श्रीमती र भतिजाको खातामा जम्मा गरेको विषयमा प्रशासनले समेत छानविन थालेको छ । बुधबार जिल्ला प्रशासन कार्यालयको ३ सदस्यीय टोलीले गाउँपालिकामै पुगेर आगजात अध्ययन तथा स्टेटमेन्ट अध्ययन थालेको हो ।

मंगलबार इकान्तिपुरमा यो सम्बन्धिको समाचार प्रकाशन भएको थियो । त्यसपछि जिल्ला प्रशासन कार्यालयले छानबिन सुरु गरेको हो । एक जना अधिकृत, एक जना मुद्दा फाँटवाला र एक जना लेखापाल गरी ३ सदस्यीय छानबिन समिति बनाइएको प्रमुख जिल्ला अधिकारी उपेन्द्रराज पौड्यालले बताए । उनले अख्तियारको दुरुपयोग भएको पाइए कानून बमोजिम सजाय हुने पनि बताएका छन् ।

प्रकाशित : श्रावण २१, २०७७ २०:१५
पूरा पढ्नुहोस्
प्रतिक्रिया
पठाउनुहोस्
×