सेते दमाईको सालिक बन्‍ने

ज्योति कटुवाल

दैलेख — छोराले अन्तरजातीय विवाह गरेको भन्दै हत्या गरिएका नौमूले गाउँपालिका–१ तोलीका सेते दमाईको ९ वर्षपछि सालिक बन्ने भएको छ । संघीय सांसद पार्वती विशुंखेको पहलमा दमाईको सालिक बन्न लागेको हो ।

२०६८ सालमा छोराले अन्तरजातीय विवाह गरेपछि विवाद हुँदा बुहारीका माइतीपक्षको खुकुरी प्रहारबाट उनको हत्या भएको थियो । उनका कान्छा छोरा सन्तबहादुरले सोही गाउँकी राजकुमारी शाहीसँग २०६८ साउन २८ गते विवाह गरेका थिए ।

जिल्लामा जातीय विभेदको समस्या कायमै रहेकाले घटना स्मरण गराउन सालिक बनाउन लागिएको विशुंखेले बताइन् । ‘जातीय विभेदमा परी ज्यान गुमाउने उनीजस्ता धेरै छन्,’ उनले भनिन्, ‘छुवाछुत अन्त्य किताबमा लेखेर मात्र हुँदैन, व्यवहारमा लागू गर्न पनि आवश्यक छ ।’ ढिलै भए पनि दमाईका परिवारले न्याय पाएको दलित मुक्ति समाजका केन्द्रीय सदस्य गोपाल नेपालीले बताए । उनका अनुसार हत्या घटनाका ९ दोषीमध्ये मुख्य योजनाकार विन्दकला शाहीसमेत ३ जनालाई २०/२० वर्षको जेल सजाय तोकिएको छ । उनीहरुले अहिले जिल्ला कारागारमा कैद भुक्तान गरिरहेका छन् ।


प्रकाशित : असार १८, २०७७ १७:४८
प्रतिक्रिया
पठाउनुहोस्

शान्ति मिसनमा खटिने सेनालाई निगमको चार्टर्ड विमानले लैजाने

रासस

काठमाडौँ — नेपाल वायु सेवा निगमले शान्ति मिसनमा खटिने नेपाली सेनालाई लैजान अफ्रिकन मुलुकमा चार्टर्ड उडान गर्ने भएको छ ।

नेपाली सेनालाई यूएनको शान्ति मिसनमा लैजान नेपाल एयरलाइन्सको चार्टर्ड उडान सेन्ट्रल अफ्रिकन रिपब्लिक र मालीमा गर्ने निगमको अपरेशन विभाग प्रमुख दीपु जुहार्चनले जानकारी दिए ।

निगमको बजार विविधीकरणको योजनाअनुरुप संयुक्त राष्ट्रसंघको सेन्ट्रल अफ्रिकन रिपब्लिकन र मलिको मिनुसामा सेनालाई लैजाने सम्बन्धमा बिहीबार निगम र नेपाली सेनाका उच्च अधिकारीबीच सम्झौता भएको हो । सम्झौता अनुसार मिसनका लागि खटिने नेपाली सेनालाई आगामी आसार २४ गते वाइड बडी जहाजमार्फत अफ्रिकन रिपब्लिक र माली लगिनेछ ।

निगमको वाइडबडी जहाज काठमाडौंबाट कतारको दोहामा प्राविधिक उडान गर्दै त्यहाँबाट सेन्ट्रल अफ्रिकन रिपब्लक पुग्ने जनाइएको छ । सोही जहाजबाट शान्ति मिसनमा रहेका ती मुलुकबाट सैनिक स्वदेश फर्काइनेछ । नयाँ गन्तव्यको चार्टर्ड उडानलाई कम्पनीले चुनौती र अवसर दुवैरुपमा लिएको अपरेशन प्रमुख जुहार्चनले बताए ।

निगमले जुन १२ तारिख र त्यसपछि हुने दक्षिणी सुडानलगायत गन्तव्यको उडान तालिका छिट्टै निर्धारण हुने उल्लेख गरेको छ ।

प्रकाशित : असार १८, २०७७ १७:४७
पूरा पढ्नुहोस्
प्रतिक्रिया
पठाउनुहोस्
×