सल्यानमा क्वारेन्टाइनबाट घर पठाइएकामा कोरोना
सल्यान — पीसीआर रिपोर्ट आउन ढिलाइ भएपछि क्वारेन्टाइनबाट आरडीटी गरेर घर पठाइएकामा कोरोना देखिएको छ । सिद्धकुमाख गाउँपालिकामा बुधबार संक्रमण पुष्टि भएका तीन जनालाई गाउँपालिकाले साताअघि क्वारेन्टाइनबाट पठाएको थियो ।
स्वाब संकलन गरेको दुई साता बितिसक्दा पनि रिपोर्ट नआएपछि आरडीटी गरेर घर पठाइएको गाउँपालिका अध्यक्ष चित्रबहादुर चलाउनेले बताए । उनका अनुसार अहिले तीनै जनाको घर सिल गरिएको छ । ‘बाहिरकालाई पनि संक्रमितको घरमा आउजाउ गर्न रोक लगाएका छौं,’ उनले भने, ‘संक्रमितलाई आइसोलेसनमा पठाइनेछ । उनीहरूका परिवार र भेटघाट गरेका अन्यको पनि पीसीआर परीक्षण गरिनेछ ।’
जिल्ला स्वास्थ्य कार्यालय प्रमुख डा. अर्जुन बुढामगरले बुधबार मात्र सल्यानमा २५ जना संक्रमित थपिएको जानकारी दिए । आरडीटीका भरमा घर पठाउनुले ठूलो जोखिम निम्याउन सक्ने भएकाले पीसीआर रिपोर्ट आउन ढिलाइ भए पनि नआत्तिन उनले स्थानीय तहलाई आग्रह गरे । यससँगै जिल्लाभर संक्रमितको संख्या १ सय ६२ पुगेको छ ।
कपुरकोटमा ५० शय्याको आइसोलेसन
जिल्लाको कपुरकोट गाउँपालिका–४ मा ५० शय्याको आइसोलेसन कक्ष तयार पारिएको छ । नेपाल राष्ट्रिय मावि किमुचौरमा कोरोना विशेष आइसोलेसन सेन्टर निर्माण गरिएको हो ।
नेपाली सेनाको प्राविधिक सहयोग र गाउँपालिकाको आर्थिक लगानीमा आइसोलेसन कक्ष निर्माण गरिएको अध्यक्ष भीमबहादुर सेनले बताए । उनका अनुसार कर्णाली प्रदेश सरकारले ९ लाख २० हजार रुपैयाँ सहयोग गरेको थियो ।
आइसोलेसनमा महिला–पुरुषका लागि छुट्टाछुट्टै शौचालय, धारा, बिजुली बत्तीलगायतको व्यवस्था गरिएको कपुरकोटका कोभिड–१९ फोकल पर्सन देवेन्द्रकुमार सेनले बताए ।
प्रकाशित : असार ४, २०७७ ०९:२७