बस दुर्घटनामा चालकको मृत्यु

ज्योति कटुवाल

दैलेख — भारतबाट मजदुरी गरी फर्किएका स्थानीयलाई दैलेख पुर्‍याएर महेन्द्रनगर फर्किरहेको ना–५ ख १६५० नम्बरको बस गुराँस गाउँपालिकास्थित घोडाबासमा दुर्घटना हुँदा चालकको ज्यान गएको छ भने सहचालक सख्त घाइते भएका छन् । 

प्रहरी चौकी गुराँसेका अनुसार दुर्घटनामा चालक महेन्द्रनगर–९ का ४२ वर्षीय कल्याणसिंह बोहराको मृत्यु भएको हो । सहचालक महेन्द्रनगर–५ का ३१ वर्षीय जयराम अवस्थी सख्त घाइते भएका छन् । उनको टाउकोमा गम्भीर चोट लागेको छ भने खुट्टा भाँचिएको छ ।

तल्लो डुंगेश्वरबाट महेन्द्रनगर फर्किरहेको उक्त बसमा २ जनामात्र थिए । ब्रेक फेल भएर गाडी दुर्घटनामा परेको गुराँसे प्रहरी चौकीका इञ्चार्ज (असई) चन्द्रलाल गिरीले बताए । उनका अनुसार बस सडकबाट ३ सय मिटर तल खसेको छ ।


प्रकाशित : जेष्ठ २१, २०७७ १८:३०
प्रतिक्रिया
पठाउनुहोस्

संघीयता खारेजीको माग गर्दै जनमोर्चाद्वारा संविधान संशोधन विधेयक दर्ता 

कान्तिपुर संवाददाता

काठमाडौँ — राष्ट्रिय जनमोर्चाले संघीयता खारेजीको माग गर्दै संविधान संशोधन विधेयक दर्ता गरेको छ । जनमोर्चाकी सांसद दुर्गा पौडेलले बुधबार गैर सरकारी विधेयकका रूपमा संविधान संशोधन विधेयक दर्ता गरेकी हुन् । 

यससँगै संविधान संशोधनको चौथो विधेयक संसदमा दर्ता भएको हो । सरकारले नेपालको नक्साअनुसार निशान छापमा रहेको नक्सा सच्याउन संविधान संशोधन विधेयक दर्ता गरेको थियो । उक्त विधेयक संशोधनको प्रक्रियामा गइसकेको छ ।

त्यसपछि समाजवादी र राजपाले पनि आफ्ना माग सम्बोधन हुनुपर्ने भन्दै संविधान संशोधनको गैरसरकारी विधेयक दर्ता गरेका छन् भने कांग्रेसका ८ जना सांसदले मंगलबार संविधान संशोधन विधेयक दर्ता गरेको थियो ।

मुलुकको विकास नहुनुको प्रमुख कारक संघीयता रहेको भन्दै जनमोर्चाले संविधानमा रहेको संघीयताको व्यवस्था हटाउनुपर्ने विधेयकमा उल्लेख गरेको छ । देशले संघीयता धान्न नसक्ने भएकाले केन्द्रीय र स्थानीय तह कायम हुनेगरी संविधान संशोधन गर्न विधेयक दर्ता गरिएको पार्टीका अध्यक्ष चित्रबहादुर केसीले बताए । संघीयता खारेज गरी स्थानीय निकायलाई बलियो बनाउने गरी अधिकार प्रदान गर्नुपर्ने उनको भनाइ थियो । जनमोर्चाले संघीयताको विरोध गर्दै आएको छ ।

आफूहरुले २०६४ सालबाट नै प्रदेशको संरचना उपयुक्त नहुने मत राख्दै आएको केसीले बताए । अहिले सरकारले संविधान संशोधन प्रकृया अघि सारेपछि अन्य दलहरूले पनि आफ्नो संशोधन विधेयक दर्ता गरेका कारण पार्टीले पनि विधेयक दर्ता गरेको उनले बताए ।

यस्तो छ जनमोर्चाको संविधान संशोधन विधेयकः

प्रकाशित : जेष्ठ २१, २०७७ १८:२८
पूरा पढ्नुहोस्
प्रतिक्रिया
पठाउनुहोस्
×