सोती घटना : छानबिन समिति घटनास्थलको अवलोकन र भेटघाटमा
रुकुम पश्चिम — सोती घटना छानबिनका लागि गृह मन्त्रालयले गठन गरेको समितिले घटनास्थलको अवलोकन र भेटघाटलाई तीव्रता दिएको छ ।
समितिले निष्पक्ष छानबिनमा शंका नहुने गरी प्रतिवेदन आउने जनाएको छ । ‘घटनाको निष्पक्ष छानबिन गरी तोकिएकै समयमा प्रतिवेदन पेस गर्छौं,’ छानबिन समितिका संयोजक गृह मन्त्रालयका सहसचिव जितेन्द्र बस्नेतले भने, ‘सबैतिर मिहीन ढंगले भेटघाट र छलफल गरिरहेका छौं ।’ सोमबार जिल्ला प्रशासन कार्यालयमा पुगेको टोलीले दलित अधिकारकर्मी र सञ्चारकर्मीसित घटनाबारे छलफल गर्यो ।
घटना भएका दुवै जिल्लाका सुरक्षा प्रमुख, पीडित, उनीहरुका आफन्त र घटनामा जोडिएका व्यक्तिसँग भेटघाट सकिएको टोलीले जनाएको छ । टोलीले घटनास्थलको अवलोकनसमेत सकेको छ । चौरजहारी नगरपालिका–८, सोतीगाउँमा गत शनिबार जाजरकोटबाट आएका युवाहरु गाउँलेको आक्रमणमा परेका थिए । प्रेमिकालाई भगाउन आएका जाजरकोटका युवामाथि गाउँलेले आक्रमण गर्दा ५ जनाको मृत्यु भएको थियो भने एक बेपत्ता छन् । घटनामा संलग्न भएको भन्दै प्रहरीले ८ नम्बर वडाध्यक्ष डम्मरबहादुर मल्लसहित १८ जनालाई पक्राउ गरी अनुसन्धान थालेको छ ।
मन्त्रालयले सहसचिव जितेन्द्र बस्नेतको नेतृत्वमा ५ सदस्यीय छानबिन समिति गठन गरेको थियो । बस्नेत नेतृत्वको छानबिन समितिमा नेपाल प्रहरीका एसएसपी जनक भट्टराई, अनुसन्धान विभागका सह–अनुसन्धान निर्देशक ओमबहादुर खड्का, गृह मन्त्रालयका उपसचिव वशिष्ट घिमिरे र माधव ढकाल सदस्य छन् ।
प्रकाशित : जेष्ठ २०, २०७७ ११:१९
