जाजरकोट–डोल्पा सडक : पाँच बेलिब्रिज बन्दै- कर्णाली - कान्तिपुर समाचार

जाजरकोट–डोल्पा सडक : पाँच बेलिब्रिज बन्दै

ठूलीभेरी नदीमा २ र खदाङ, छलगाड र रुपागाड खोलामा बन्ने बेलिब्रिजको डिजाइन तयार भएपछि यसै आवमा टेण्डर
हरि गौतम

रुकुम पश्चिम — जाजरकोट–डोल्पा सडकअन्तर्गत रुकुम पश्चिम खण्डमा ५ वटा बेलिब्रिज निर्माण हुने भएको छ । सडक डिभिजन कार्यालय, चौरजहारीमार्फत रुकुम पश्चिमको आठबीसकोट नगरपालिका–४, छोटेबगरदेखि डोल्पा सदरमुकाम दुनैसम्म बेलिब्रिज निर्माण गर्न लागिएको हो ।

ठूलीभेरी नदीमा २ र अन्य खोलामा ३ वटा बेलिब्रिज निर्माणका लागि डिजाइन भइरहेको छ । सडक विभागले कन्सल्टेन्सीमार्फत बेलिब्रिजको डिजाइन गराइरहेको छ । त्यसलगत्तै पुल निर्माणका लागि टेन्डर आहृवान हुनेछ ।


डिभिजन कार्यालयका प्रमुख नरेन्द्र भट्टले एउटा बेलिब्रिजको लम्बाई ५० मिटरसम्म हुने बताए । ‘पहिलो चरणमा ५० मिटर र त्योभन्दा कम दूरी भएका ठाउँमा बेलिब्रिज बनाइन लागिएको हो,’ उनले भने, ‘डोल्पाको खदाङ र त्रिपुराकोटस्थित ठूलीभेरी नदीमा बेलिब्रिज बन्नेछन् ।’ उनले खदाङ, छलगाड र रुपागाड खोलामा पनि बेलिब्रिज बनाइन लागिएको जानकारी दिए । चालु आवमा सुरु भई आगामी आवभित्रै निर्माण सक्नेगरी बेलिब्रिज निर्माण हुने उनको भनाइ छ ।


ठेक्का लागिसकेपछि बेलिब्रिजका लागि ‘फाउन्डेसन’ तयार गरिने र सोपश्चात् ‘ट्रस्ट’ जोडिने कार्यालयले जनाएको छ । ‘ट्रस्ट’ ढुवानीका लागि हिउँदकै समय चाहिने भएकाले निर्माणको काममा ठेकेदार कम्पनीलाई बढी समय दिइने डिभिजन इन्जिनियर भट्टले बताए । भट्टले बेलिब्रिज निर्माणपछि वर्षाका कारण यातायात सेवा अवरुद्ध हुने समस्या समाधान हुने जनाए । वर्षायाममा आठबीसकोट नगरपालिकास्थित राडी र जाजरकोटको नगलगाड नगरपालिकास्थित बगराबीचको झोलुंगे पुलबाट सामान पल्टी गरेर ढुवानी गर्ने गरिएको छ ।


त्यस्तै, नलगाडको तातरीगाड र चौखेबजार नजिकको खोलामा पनि यातायातका साधन चल्दैनन् । झोलुंगे पुलबाट मोरसाइकल वारपार गराए पनि यी खोला ठूला गाडीका लागि बाधक मानिएका छन् । नलगाडबाट आठबीसकोटको छोटेबगर पुग्दा अर्को झोलुंगे पुल वारपार गर्नुपर्ने बाध्यता छ । वर्षातमा आठबीसकोट–६ स्थित रिजिगाड र दामाचौरको खोलामा पनि चारपांग्रे सवारीसाधन तर्न सक्दैनन् । हिउँदमा पनि राडीदेखि बगरा र तल्लुदेखि छोटेबगर जोड्ने पुल नबन्दा समस्या भएको यातायात व्यवसायीको गुनासो छ । ठूलीभेरी नदीमा पक्की पुल बने यातायातका साधन निर्वाध चलाउन सकिने व्यवसायीको भनाइ छ ।


३ जिल्ला जोड्ने पासागाड–आठबीसकोट–दुनै सडकखण्डको १ सय १८ किलोमिटर ट्र्याक २ वर्षअघि नेपाली सेनाले खोलेको थियो ।

प्रकाशित : माघ २, २०७६ ०९:२७
प्रतिक्रिया
पठाउनुहोस्

अब विद्यालय तहमै योग शिक्षा

कान्तिपुर संवाददाता

काठमाडौँ — विद्यालय तहमा योग शिक्षाको पठनपाठन हुने भएको छ । शिक्षा, विज्ञान तथा प्रविधि मन्त्रालयले कक्षा ९ देखि १२ सम्म ऐच्छिक विषयका रूपमा योग शिक्षाको पाठ्यक्रम तयार पारेको छ । तल्ला कक्षाको पाठ्यक्रममा पनि विशेष क्षेत्रका रूपमा योगका विषयवस्तु समेटेर लैजाने पाठ्यक्रम विकास केन्द्रले जनाएको छ । 

प्राविधिक धारतर्फ कक्षा ९ देखि १२ सम्म योग, प्राकृतिक चिकित्सा र आयुर्वेदका छुट्टाछुट्टै ३ विषय पढ्न सकिने व्यवस्था गर्न लागिएको हो । योग प्रशिक्षक हरिप्रसाद पोखरेलको संयोजकत्वमा गठित कार्यदलले माध्यमिक तहमा योग विषयको अध्ययन/अध्यापन गराउन सुझाव दिएको थियो । शिक्षा नीतिमा पनि सरकारले योग शिक्षालाई प्राथमिकता दिएको छ ।

शिक्षामन्त्री गिरिराजमणि पोखरेलले माध्यमिक तहदेखि उच्च शिक्षासम्म योग, प्राकृतिक चिकित्सा र आयुर्वेदको पठनपाठन गराइने बताए । मन्त्रालयले बुधबार राष्ट्रिय योग दिवस पनि मनाएको छ । राष्ट्रिय सभागृहमा आयोजित योग दिवस कार्यक्रममा मन्त्री पोखरेलले उच्च शिक्षामा पनि योग, आयुर्वेद र प्राकृतिक चिकित्सा विषयलाई प्राथमिकतामा राखेर योगमाया आयुर्वेद विश्वविद्यालय स्थापना गर्न लागिएको जनाए । संसद्को हिउँदे अधिवेशनमै उक्त विश्वविद्यालयको विधेयक लैजाने उनले जानकारी दिए ।

नेपालमा जुन २१ मा अन्तर्राष्ट्रिय र माघ १ गते राष्ट्रिय गरी दुई पटक योग दिवस मनाउने गरिएको छ । २०३६ सालदेखि जनस्तरमा दिवस मनाउन थालिएको हो । कार्यक्रममा परराष्ट्रमन्त्री प्रदीप ज्ञवाली र स्वास्थ्य मन्त्री भानुभक्त ढकालसमेत सहभागी थिए ।

प्रकाशित : माघ २, २०७६ ०९:२६
पूरा पढ्नुहोस्
प्रतिक्रिया
पठाउनुहोस्
×