गण्डक ब्यारेजको १६ वटा ढोका खोलियो- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

गण्डक ब्यारेजको १६ वटा ढोका खोलियो

नवीन पौडेल

परासी — नारायणी नदीमा पानीको बहाव बढेपछि गण्डक ब्यारेजको १६ वटा ढोका खोलिएको छ । २ लाख १५ हजार क्युसेक प्रति सेकेन्ड पानीको बहाव पुगेपछि ब्यारेजको ढोका खोलिएको गण्डक ब्यारेजका भूआर्जन अधिकृत तारा सिहंले बताए । ‘पानीको बहाव बढ्दो क्रममा भएकाले ब्यारेजको १६ वटा ढोका खोलियो ।,’ उनले भने, ‘ब्यारेजको ढोका खोल्ने नखोल्ने भारतीय पक्षमा निहित छ । पानीको प्रवाह अनुसार क्रमश थप ढोका खुल्दै जानेछन् ।’

शुक्रबार दिउँसो १० दशमलव ४५ मिटर पानीको सतह पुगेपछि सम्भावित जोखिम हुने भन्दै ढोका खोलिएको हो । ११ मिटरपछि खतरा मानिन्छ । जिल्ला प्रशासन कार्यालय पश्चिम नवलपरासीले तटीय क्षेत्रका स्थानीयलाई सजग हुन आग्रह गरेको छ ।

जिल्ला आपतकालीन कार्य सञ्चालन केन्द्रमा रहेको मापन मिटरमा पानीको बहाव बढ्दै गएको र खतराको संकेत नजिक पुगेकाले सजग रहन आग्रह गरिएको प्रमुख जिल्ला अधिकारी सागरमणी पाठकले बताए । सम्भावित दुघर्टनालाई मध्यनजर राखेर जिल्लामा उद्धार र व्यवस्थापनका लागि सुरक्षाकर्मीलाई ‘अलर्ट’ अवस्थामा राखिएको छ ।


प्रकाशित : असार २६, २०७७ १६:१४
प्रतिक्रिया
पठाउनुहोस्

पश्‍चिम नवलपरासीमा खोलाले बगाउँदा २ जनाको मृत्यु

नवीन पौडेल

परासी — पश्चिम नवलपरासीमा खोलाले बगाउँदा २ जनाको मृत्यु भएको छ । 

शुक्रबार दिउँसो बर्दघाट नगरपालिकाको खहरे खोलाले बगाउँदा स्थानीय २० वर्षीय सुधीर बिक र १८ वर्षीय प्रवीण बिकको मृत्यु भएको हो । उनीहरु बाढी आएको समयमा माछा मार्न गएका थिए ।

इलाका प्रहरी कार्यालय बर्दघाटका प्रमुख होमनाथ रेग्मीका अनुसार माछा मार्न जाँदा प्रवीणलाई खोलाले बगाएको र साथीलाई बचाउन खोज्दा सुधीरलाई समेत बगाउँदा ज्यान गएको हो । दुबै शवलाई अहिले पोस्टमार्टमका लागि जिल्ला पृथ्वीचन्द्र अस्पतालमा राखिएको छ ।

प्रकाशित : असार २६, २०७७ १६:०४
पूरा पढ्नुहोस्
प्रतिक्रिया
पठाउनुहोस्
×