जबरजस्ती करणी र शरीर बन्धक मुद्दामा पालिका अध्यक्षलाई सफाइ- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

जबरजस्ती करणी र शरीर बन्धक मुद्दामा पालिका अध्यक्षलाई सफाइ

टीकाप्रसाद भट्ट

रामेछाप — जबरजस्ती करणी र शरीर बन्धक मुद्दामा रामेछापको लिखु तामाकोसी गाउँपालिकाका अध्यक्ष गोविन्दबहादुर खड्काले सफाइ पाएका छन् ।

जिल्ला अदालत रामेछापका न्यायाधीश बद्रीप्रसाद ओलीको मंगलबारको इजलासले सफाइ दिएको हो । खड्कामाथि लगाइएको दुवै मुद्दामा सरकारी दाबी प्रमाण नपुग्ने भन्दै अदालतले सफाइ दिएको राजिष्ट्रार रामप्रसाद पौडेलले जानकारी दिए । खड्कामाथि करिब डेढवर्षअघि मुद्दा चलाइएको थियो ।

खड्का माथि लिखु तामाकोसी गाउँपालिकाका एक उपभोक्ता समितिका पदाधिकारी दर्पण घिसिङलाई पालिकाको कोठामा थुनेर योजनाको भुक्तानीका बारेमा दबाब दिएको भन्दै शरीर बन्धक मुद्दा र पालिकामै काम गर्ने एक स्वास्थ्यकर्मीमाथि जबरजस्ती करणी मुद्दा दायर भएको थियो ।

उक्त मद्दामध्ये रामेछाप जिल्ला अदालतले खड्कालाई जबरजस्ती मुद्दामा पुर्पक्षका लागि रामेछाप कारागार पठाएकोमा उच्च अदालतको आदेशले करिब ४ महिनापछि खड्का तारेखमा रिहा भएका थिए ।

खड्काले दुवै मुद्दा राजनीतिक प्रतिशोधको आधारमा लगाइएको भन्दै आफू निरपराध रहेको जिकिर गर्दै आएका थिए । गाउँपालिकामा निर्वाचित जनप्रतिनिधिबीच विवाद हुँदा एक अर्काबीच मुद्दा हाल्नेदेखि विकास निर्माणका कार्य समेत यसबीचमा प्रभावित हुँदै आएका थिए ।

प्रकाशित : कार्तिक ९, २०७८ १९:१३
प्रतिक्रिया
पठाउनुहोस्

नेपालमा विदेशी लगानी भित्र्याउन बोर्ड र एफएनसिसिआईबीच सहकार्य हुने 

कान्तिपुर संवाददाता

काठमाडौँ — नेपालमा विदेशी लगानी आकर्षित गर्न लगानी बोर्ड र उद्योग वाणिज्य महासंघ (एफएनसिसिआई)बीच समझदारी हुने भएको छ । बोर्डका कार्यकारी अधिकृत सुशील भट्ट र महासंघका अध्यक्ष शेखर गोल्छाले एकअर्कासँग सहकार्य गर्ने प्रतिबद्धता जनाएका हुन् । सो अवसरमा भट्टले लगानी आकर्षित गर्न नीतिगत सुधारका सम्वन्धमा निजी क्षेत्रसँग सहकार्य गरी अघि बढ्ने बताए ।  

‘हामीसँग लगानी सम्भावनाका क्षेत्र धेरै छन् र लगानीकर्तालाई हाम्रा विविध क्षेत्रमा प्रोत्साहन गर्नुपर्छ’ भट्टले भने ‘यसका लागि लगानी बोर्ड र निजी क्षेत्रले संयूक्त रुपमा कार्य गर्नुपर्नेछ ।’ उनले परियोजनाको प्राविधिक, वातावरणीय तथा वित्तीय अवस्थाको गहिरो अध्ययन गरेर मात्रै अगाडि बढाउनुपर्नेमा जोड दिए ।

बैठकमा महासंघका अध्यक्ष गोल्छाले विदेशी निजी लगानीकर्तासँग छलफल तथा समन्वय गर्न एफएनसिसिआई सक्षम निकाय भएको बताए । बैठकमा उद्योग वाणिज्य तथा आपूर्ति मन्त्रालयका सहसचिव डा. नारायण रेग्मीले नेपालमा लगानीको प्रतिबद्धता र प्राप्तीमा ठूलो अन्तर देखिने गरेको बताउँदै यस सम्वन्धमा थप अध्ययन गर्नुपर्नेमा जोड दिए । नेपालमा लगानी आकर्षित गर्न आवश्यक नीतिगत तथा सुधारका कार्यमा मन्त्रालय प्रतिबद्ध रहेको बताए ।


प्रकाशित : कार्तिक ९, २०७८ १८:५७
पूरा पढ्नुहोस्
प्रतिक्रिया
पठाउनुहोस्
×