१० घण्टापछि खुल्यो अरनिको राजमार्ग
बनेपा — पुण्यमाता खोलामा आएको बाढीका कारण डुबानमा परेर अवरुद्ध भएको अरनिको राजमार्ग अन्तर्गत काभ्रेको बनेपा पुलबजार खण्डको सडक सुचारु भएको छ । पानीको बहाव घटेपछि करिब १० घण्टापछि यातायात सञ्चालनमा आएको हो ।
पुलबजार डुबानमा परेपछि सोमबार बिहानदेखि अवरुद्ध भएको थियो । आइतबार रातिदेखि परेको भारी वर्षाका कारण नालाहुँदै बनेपा–पनौती भएर बग्ने पुण्यमाता खोलामा आएको बाढीका कारण बनेपा पुलबजार क्षेत्र डुबानमा परेको थियो ।
बाढीले बनेपा नगरपालिका– ९ र १० को सिमानामा पर्ने पुलबजार क्षेत्रको पुललगायत बजार क्षेत्र नै पूरै डुबानमा परेपछि चल्न नसकेको यातायातका साधन अहिले सञ्चालन भएको जिल्ला ट्राफिक प्रहरी कार्यालयले जनाएको छ ।
प्रकाशित : भाद्र २१, २०७८ १४:४०