रामेछापमा खुल्दै विद्यालय

नगर प्रमुख रमेशकुमार बस्नेतले सरकारले तोकेका मापदण्ड पूरा गरेर विद्यालयमा पठनपाठन थाल्न अब ढिलाइ गर्नु नहुने बताए । अनलाइन कक्षा सीमित वर्गका बालबालिकाहरूको मात्रै पहुँचमा रहेकाले कोरोना महामारीमा शैक्षिक क्षेत्र चौपट भएको उनको भनाइ छ । उनका अनुसार नगर क्षेत्रभित्रका ६६ विद्यालयमध्ये बालबालिकाहरूको भौतिक उपस्थितिमा पठनपाठन गराउँदा ४ वटा विद्यालयहरूलाई केही असजिलो हुने अवस्था छ ।

यसैबीच, गोकुलगंगा गाउँपालिकाले आइतबारदेखि नियमित कक्षा सञ्चालन गर्दै छ । पालिका प्रमुख खड्गबहादुर सुनुवारका अनुसार सरकारले तोकेको कार्यविधिबमोजिम १ बेन्चमा २ जना विद्यार्थी राखेर विद्यालय सञ्चालनको तयारी गरिएको छ ।

रामेछाप नगरपालिकाले केही दिनभित्रै विद्यालय सञ्चालन गर्नेबारे निर्णय लिने नगर प्रमुख नरबहादुर थापामगरले बताए । दोरम्बा गाउँपालिकामा आधिकारिक निर्णय नभए पनि विद्यालयमा पठनपाठन थाल्ने विषयमा प्रधानाध्यापकबीच छलफल चलिरहेको प्रमुख प्रशासकीय अधिकृत धिराज मरासिनीले बताए ।

कोरोनाको दोस्रो लहर फैलिएपछि गरिएको निषेधाज्ञाका कारण जिल्लाका अधिकांश सामुदायिक विद्यालय ठप्प छन् । केही विद्यालयले वैकल्पिक माध्यम अपनाएका थिए । तर यस्तो कक्षा सबैको पहुँचमा नरहेको भन्दै अभिभावकले विरोध जनाएका थिए ।