पहिरोले बीपी राजमार्ग अवरुद्ध
सिन्धुली — खुर्कोट–नेपालथोक खण्डअन्तर्गत सिन्धुलीको सुनकोसी गाउँपालिका–२ को कमेरे फाँटमा लेदोसहितको पहिरो झरेपछि बीपी राजमार्ग आइतबार बिहानबाट अवरुद्ध भएको छ । लगातारको वर्षापछि खसेको पहिरोले राजमार्ग अवरुद्ध बनेको प्रहरीले जनाएको छ ।
पहिरो पन्छाउन मेसिन पठाइए पनि वर्षाले काम गर्न मुस्किल परेको जिल्ला प्रहरी कार्यालयका डीएसपी मनोजकुमार लामाले जानकारी दिए । राजमार्गमा जताततै सानाठूला पहिरो खसेको र खहरेहरूमा समेत बाढी आएकाले जानकारी लिएर मात्र यात्रामा निस्कन लामाले सुझाएका छन् ।
राजमार्गकै सिन्धुलीमाडी–बर्दिबास खण्डको फाल्चुरीनजिक खसेको पहिरो पन्छाएर एकतर्फी यातायात सञ्चालनमा ल्याइएकोमा फेरि पनि खुल्ने र बन्द हुने क्रम जारी छ ।
प्रकाशित : भाद्र १३, २०७८ ०९:३८प्रतिक्रिया